Palmer ya zama na farko da ya ci ƙwallo huɗu a Premier kan hutu

Cole Palmer ya zama na farko da ya ci ƙwallo huɗu a Premier kan hutu, bayan da Chelsea ta doke Brighton 4-2 ranar Asabar a Stamford Bridge.

Sun kara a wasan mako na shida, inda Palmer mai shekara 22 ya buga ƙwallo ya bugi turki, da wanda ya zura a raga aka ce an yi satar gida.

Brighton ce ta fara cin ƙwallo ta hannun Georginio Rutter a minti na bakwai da fara tamaula a babbar gasar tamaula ta Ingila.

Daga baya Chelsea ta farke ta hannun Palmer, sannan ya kara na biyu a minti na bakwai tsakani, sannan ya ci na uku a bugun fenariti

Haka kuma Palmer ya kara na huɗu a raga, bayan da Brighton ta zare na biyu ta hannun Carlos Baleba, wasan ya koma Chelsea 4-2 tun kan hutu.

Jadon Sancho ne ya bai wa Palmer ƙwallo na huɗu da ya zura a raga, ya zama na uku da ya bayar da tamaula karo na uku a jere ana zurawa a raga.

Wanda yake da wannan bajintar a Chelsea shi ne Eden Hazard a 2012 da kuma Cech Fabregas a 2014.

Da wannan sakamakon Chelsea tana da maki 13 a Premier League, za ta kara da Gent a gasar zakarun Turai a mako mai zuwa.

Daga nan za ta fafata da Nottingham Forest a Stamford Bridge a Premier League da kuma Liverpool a Anfield.