Arsenal za ta buga Champions League karon farko bayan 2016/17

Arsenal za ta karɓi baƙuncin PSV Eindhoven a Emirates ranar Laraba a wasan farko a cikin rukuni a Champions League.

Karon farko da Gunners wadda ta buga Europa League za ta koma karawa a babbar gasar tamaula ta Turai tun bayan 2016/17.

Wannan shi ne wasa na tara da za su kara a tsakaninsu, inda Arsenal ta ci wasa uku da canjaras uku, PSV ta yi nasara a biyu.

Sun kuma fafata ne sau shida a Champions League da kuma wasa biyun da suka kara a Europa League a bara.

Sun fara wasa a Champions League ranar Laraba 25 ga watan Satumbar 2002 a Eindhoven, inda Gunners ta ci 4-0.

PSV tana da Champions League ɗaya da ta ɗauka a shekarar 1987/1988, yayin da har yanzu Gunners ke fata.

Ɗaya wasan rukuni na biyun za a yi ne tsakanin Sevilla da RC Lens.

Jerin wasa tsakanin Arsenal da PSV Eindhoven:

Kakar 2022/2023 Europa League

Kakar 2006/2007 Champions League

Kakar 2004/2005 Champions League

Kakar 2002/2003 Champions League