Barau FC ta damƙa wa Rabi'u Tata aikin kociyanta

Ƙungiyar ƙwallon kafa ta Barau FC ta damƙa wa Rabi'u Tata aikin horar da ita, mai buga gasar Nigerian National League (NNL).

Tun farko ya ja ragamar wasa biyu a matakin riƙon ƙwarya, bayan da ta dakatar da Salisu Yusuf.

Cikin wasa biyu da Tata ya ja ragama ya fara da yin nasara a kan Sokoto United da cin 1-0 a Kano ranar 11 ga watan Janairu karawar mako na biyar.

Okeke Ekechikwu ne ya ci wa Barau FC kwallon a minti na biyar da suka koma zagaye na biyu a fafatawar.

A wasa na biyu Tata ya je ya tashi 1-1 da Zamfara United a wasannin mako na shida a gasar mai daraja ra biyu ta Najeriya ranar 19 ga watan Janairu.

Osondu Jonathan ne ya ci wa Barau FC ƙwallon da ya sa ta tashi canjaras a karawar daga ita aka je hutu a wasannin na NNL na bana.

A mako biyu da suka gabata Barau FC ta dakatar da Yusuf, wanda ya fara aiki kafin fara kakar bana, wanda ya ja ragamar wasa huɗu a gasar ta NNL.

A cikin karawar ya yi canjaras biyu a gida aka doke Barau FC fafatawa biyu da ta yi a waje a gasar ta Najeriya.

Kawo yanzu Barau FC wadda take shiyya ta uku tana da maki shida a mataki na biyar a ƙungiya bakwai, Wikki Tourist ce ta farko mai maki 13 a rukunin.

Yanzu ana hutu a gasar ta NNL, sai cikin watan Fabrairu za a ci gaba da wasannin zagaye na biyu.