ભારત પોતાના લોકોને અફઘાનિસ્તાનથી લાવવા માટે તૈયાર- વિદેશ મંત્રાલય

લાઇવ કવરેજ

1. 16 ઓગસ્ટ 2021કાબુલ છોડવાની હોડ

   તાલિબાનના શાસનમાં રહેવાનું ન ઇચ્છનારા કેટલાય લોકો દેશ છોડવાના પ્રયાસમાં કાબુલ ઍરપૉર્ટ પર પહોંચવાની હોડ લગાવી રહ્યા છે. કેટલાય લોકોએ દેશમાં લોકશાહીના આટલી જલદી થયેલા પતન પર દુઃખ વ્યક્ત કર્યું છે. બીબીસી સંવાદદાતા કવુન ખામોશે ટ્વીટ કરીને જણાવ્યું છે, "એવું લાગે છે કે કાબુલ ચિંતત ચહેરા, હતાશ યુવાનો અને એવાં દુ:ખી કુટુંબોનો ગઢ બની ગયું છે, જેઓ કાબુલમાંથી બહાર જવા માગે છે."

   અફઘાનિસ્તાનમાં છોકરીઓની બૉર્ડિંગ સ્કૂલનાં વડાં શબાના બાસિજ-રસીખે ટ્વીટ કર્યું, "મને લાગે છે કે મારા હૃદય પર સાડા ત્રણ કરોડ (દેશની વસતી)નો ભાર આવી પડ્યો છે."

2. 16 ઓગસ્ટ 2021અફઘાનિસ્તાનમાં તાલિબાનને પૈસા ક્યાંથી મળે છે અને એમાં ડ્રગ્સની ભૂમિકા કેટલી?

   અફઘાનિસ્તાનમાં લગભગ 85 હજાર તાલિબાનો સક્રિય છે, જે 2001 પછીની સર્વોચ્ચ સંખ્યા છે.

   એક અઠવાડિયામાં તાલિબાનોએ 34માંથી 12 પ્રાંતની રાજધાનીઓ તથા મહત્ત્વપૂર્ણ શહેરો પર કબજો કરી લીધો છે.

   2001માં સરકારનું પતન થવા છતાં છેવાડાના વિસ્તારોમાં પ્રભુત્વ જાળવી રાખવામાં તાલિબાનને સફળતા મળી હતી, વિશેષ કરીને પાકિસ્તાન સાથે જોડાયેલા સરહદી વિસ્તારોમાં.

   છેલ્લાં કેટલાંક વર્ષોથી તેમની આવક વર્ષે દોઢ અબજ ડૉલર હોવાનું અનુમાન મૂકવામાં આવે છે.

   અફઘાન તથા અમેરિકન સુરક્ષાબળોએ તાલિબાનોના આવકના સ્રોતો પર નિયંત્રણ લાદવાના પ્રયાસ કર્યા છે, પરંતુ તેમાં ખાસ સફળતા નથી મળી.ત્યારે અહીં વાંચો : અફઘાનિસ્તાનમાં તાલિબાનને પૈસા ક્યાંથી મળે છે?

3. 16 ઓગસ્ટ 2021તાલિબાનના કબજા બાદ કાબુલમાં કેવી સ્થિતિ?

   અફઘાનિસ્તાનની રાજધાની કાબુલ પર તાલિબાને હવે કબજો કરી લીધો છે. તાલિબાને એક નિવેદનમાં કહ્યું હતું કે શહેરમાં લૂંટફાટની સ્થિતિને અટકાવવા તેમના લડવૈયાઓને કાબુલમાં પ્રવેશવાનું કહેવાયું છે.

   શહેરની અંદર કેવી સ્થિતિ છે? જુઓ ખાસ રિપોર્ટ.

4. 16 ઓગસ્ટ 2021કાબુલ પર તાલિબાનનો કબજો, અફઘાનિસ્તાનમાં અત્યાર સુધી શુંશું થયું?

   • રવિવારે અફઘાનિસ્તાનની રાજધાની કાબુલથી માત્ર અમુક કલાકોના અંતરે જ આવેલા જલાલાબાદ શહેર પર કબજો કર્યા બાદ તાલિબાનના લડવૈયા કાબુલ શહેરની બહારના વિસ્તારો સુધી પહોંચી ગયા.
   • એ બાદ તાલિબાને કહ્યું કે અફઘાન સરકાર સાથે સત્તાના શાંતિપૂર્ણ હસ્તાંતરણ અંગે વાતચીત કરાઈ રહી છે અને વાતચીત જ્યાં સુધી ચાલુ રહેશે, તાલિબાની લડવૈયાઓ રાજધાનીમાં નહીં પ્રવેશે. તાલિબાન તરફથી જાહેર કરાયેલા અધિકૃત નિવેદનમાં જણાવાયું છે કે કાબુલ એક ગીચ વસતી ધરાવતું શહેર છે અને નાગરિકોનો જીવ જોખમમાં મુકાઈ શકે એમ છે.
   • આ દરમિયાન જ અફઘાન રાષ્ટ્રપતિ અશરફ ઘનીએ ટ્વિટર હૅન્ડલ પર એક સંદેશ પોસ્ટ કરીને નાગરિકોને વિશ્વાસ અપાવ્યો કે રાજધાનીમાં સ્થિતિ નિયંત્રણ હેઠળ છે.
   • અફઘાનિસ્તાનમાં સતત બદલાઈ રહેલા ઘટનાક્રમને જોતાં અમેરિકાએ પોતાના નાગરિકોની સુરક્ષા માટે વધુ 5,000 જવાનો કાબુલ મોકલ્યા છે. બીજી તરફ પોતાના નાગરિકો અને દૂતાવાસના કર્મચારીઓને વહેલી તકે અફઘાનિસ્તાનમાંથી બહાર કાઢવાના કામમાં પણ અમેરિકા જોતરાઈ ગયું છે.
   • અફઘાનિસ્તાનનાં મહિલા સાંસદ ફરઝાના કોચાઈએ બીબીસીને કહ્યું છે કે લોકો રાજધાની છોડીને ભાગવાનો પ્રયાસ કરી રહ્યા છે, પણ ભાગવા માટે કોઈ જગ્યા નથી બચી. તેમણે એવું પણ જણાવ્યું કે તાલિબાનના નિયંત્રણમાં આવી ગયેલા વિસ્તારોમાં મહિલાઓએ કામ પર જવાનું બંધ કરી દીધું છે અને તે શાળા કે કાર્યાલયોમાં નથી જઈ રહી.

   • બામિયાન પ્રાંતમાં પણ કોઈ પણ પ્રકારના પ્રતિરોધ વગર તાલિબાને કબજો કરી લીધો. તાલિબાને 20 વર્ષ પહેલાં અહીં વિશ્વપ્રસિદ્ધ બૌદ્ધ પ્રતિમાઓને બૉમ્બથી તોડી પાડી હતી.
   • અફઘાનિસ્તાનના કાર્યવાહક ગૃહમંત્રી અબ્દુલસત્તાર મીરઝકવાલે ‘ટોલો ન્યૂઝ’ને આપલા એક નિવેદનમાં જણાવ્યું કે સત્તાનું હસ્તાંતરણ શાંતિપૂર્ણ રીતે થશે અને કાર્યકારી સરકાર બનશે. તેમણે એવું પણ કહ્યું કે કાબુલ પર હુમલો નહીં થાય.
   • તાલિબાને કાબુલની બહારના વિસ્તારોમાં આવેલાં બગરામ ઍરફિલ્ડ અને જેલને કબજામાં લેવાનો દાવો કર્યો છે. આ જ સૈન્ય-ઍરપૉર્ટ પરથી અમેરિકાએ અફઘાનિસ્તાનમાં 20 વર્ષ ચાલેલા યુદ્ધને સંચાલિત કર્યું હતું.
   • ભારતીય સમયાનુસાર રવિવાર સાંજે અફઘાનિસ્તાનના રાષ્ટ્રપતિ અશરફ ઘની અને ઉપરાષ્ટ્રપતિ અમીરુલ્લાહ સાલેહે દેશ છોડી દીધો. બીજી તરફ તાલિબાને એક નિવદેન જાહેર કરીને જણાવ્યું કે તેના લડવૈયા અધિકૃત રીતે કાબુલના વિસ્તારોમાં પ્રવેશી રહ્યા છે અને કાર્યાલયોનો કબજો લઈ રહ્યા છે. આ દરમિયાન કેટલીય જગ્યાએ ગોળીબારના અવાજ સંભળાયા.
   • અમેરિકન વિદેશમંત્રી ઍન્ટની બ્લિંકને કહ્યું છે કે અમેરિકાએ અફઘાનિસ્તાનસ્થિત દૂતાવાસ કાબુલ ઍરપૉર્ટ પર શિફ્ટ કરી દીધું છે. દૂતાવાસની ઇમારત પરનો ઝંડો પણ ઍરપૉર્ટ લઈ જવાયો છે, જે બાદમાં અફઘાનિસ્તાનમાંથી હઠાવી લેવાશે.
   • એ બાદ તાલિબાને દાવો કર્યો કે તેણે કાબુલમાં આવેલા રાષ્ટ્રપતિભવનને પોતાના નિયંત્રણમાં લઈ લીધું છે. આના અમુક કલાકો બાદ ‘અલ ઝઝીરા’એ જાહેર કરેલા એક વીડિયોમાં તાલિબાની લડવૈયાઓ રાષ્ટ્રપતિભવનમાં જોવા મળ્યા.
   • તાલિબાને દાવો કર્યો છે કે તેણે કાબુલનાં કેટલાંય જિલ્લાકેન્દ્રો સુધી પહોંચ વધારી છે છે અને એમાંથી 11ને કબજામાં લઈ લીધાં છે.
   • કાબુલ આંતરરાષ્ટ્રીય ઍરપોર્ટ પર તમામ કૉમર્શિયલ ફ્લાઇટને નિલંબિત કરી દેવાઈ છે. અહીં માત્ર સૈન્યવિમાનોને જ સંચાલનની મંજૂરી અપાઈ છે.
   • અફઘાનિસ્તાનના પૂર્વ રાષ્ટ્રપતિ હામિદ કરઝઈએ ફેસબુક પર એક વીડિયો જાહેર કરીને પોતાના પ્રશંસકોને જણાવ્યું છે કે તેઓ કાબુલમાં જ રહેશે. અમેરિકાએ અફઘાનિસ્તાન પર કરેલા સૈન્યઅભિયાન બાદ વર્ષ 2001માં કરઝઈ દેશના નેતા બન્યા હતા.
   • અમેરિકાના પૂર્વ રાષ્ટ્રપતિ ડોનાલ્ડ ટ્રમ્પે અફઘાનિસ્તાનને લીધે ચોતરફ ટીકાઓનો સામનો કરી રહેલા વર્તમાન રાષ્ટ્રપતિ જો બાઇડનના રાજીનામાની માગ કરી છે. તેમણે દાવો કર્યો છે કે જો તેઓ રાષ્ટ્રપતિ હોત તો અમેરિકા અફઘાનિસ્તાનમાંથી ‘અત્યંત અલગ રીતે અને ભારે સફળતાપૂર્વક’ બહાર નીકળ્યું હોત. બીજી તરફ બાઇડન સરકારે તેમના પર જવાબી હુમલો કરતાં કહ્યું છે કે અમેરિકા-તાલિબાન ડ્રિલ ટ્રમ્પ રાષ્ટ્રપતિ હતા ત્યાર જ થઈ હતી.

5. 16 ઓગસ્ટ 2021નમસ્કાર, ગુડ મોર્નિંગ

   બીબીસી ગુજરાતીના લાઇવ પેજમાં આપનું સ્વાગત છે. અહીં અમે આપને અફઘાનિસ્તાનમાં ઘટી રહેલી મહત્ત્વની ઘટનાઓ વિશેની લેટેસ્ટ અપડેટ આપીશું. અગત્યના મુદ્દાઓ પર સ્થાનિકથી લઈ રાષ્ટ્રીય અને આંતરરાષ્ટ્રીય દૃષ્ટિકોણ પણ આપને અહીં વાંચવા મળશે.