પાકિસ્તાનથી અફઘાનિસ્તાનમાં રૉકેટથી હુમલો
અફઘાનિસ્તાન તાલિબાને સ્વીકાર્યું કે ગુરુવાર રાત્રે પાકિસ્તાની વિસ્તારથી પૂર્વી કુનાર પ્રાંતની ઉપર રૉકેટ છોડવામાં આવ્યાં હતાં.
ત્યાં મીડિયામાં ચાલતી અફવાઓ મુજબ કુનાર પ્રાંતના શાલન્તન જિલ્લામાં એક પાકિસ્તાની તાલિબાન નેતાને ટાર્ગેટ કરીને ડ્રોન હુમલો કરવામાં આવ્યો હતો.
પરંતુ અફઘાન તાલિબાનના ઉપ પ્રવક્તા બિલાલ કરીમીએ બીબીસી પશ્તો સેવાને જણાવ્યું કે ડ્રોન હુમલાના સમાચાર ખોટા હતા. જોકે તેમણે પાકિસ્તાન તરફથી રૉકટ હુમલાની વાત જરૂર સ્વીકારી લીધી.
કરીમીએ પોતાના નિવેદનમાં આ હુમલા પાછળનાં કારણો અને કોને નિશાન બનાવવામાં આવ્યા એ વિશે ઉલ્લેખ નહોતો કર્યો. તેમણે કહ્યું કે આ રૉકેટ પહાડો સાથે ટકરાઈ ગયાં હતાં.
આ સંબંધમાં પાકિસ્તાન સરકાર અને સેના તરફથી કોઈ ટિપ્પણી કરવામાં નથી આવી.
કુનાર પ્રાંતમાં સ્થાનિક અફઘાન તાલિબાન અધિકારીઓએ ડ્રોન હુમલાની વાત કરી છે.
પાકિસ્તાન અને અફઘાનિસ્તાનના કેટલાક સમાચાર પત્રો અને મીડિયા ચૅનલોમાં દાવો કરવામાં આવ્યો કે આ હુમલામાં પાકિસ્તાન તાલિબાનના મૌલવી ફકીર મોહમ્મદને નિશાન બનાવવાનો પ્રયત્ન કરવામાં આવ્યો.
પરંતુ હજી સુધી આની કોઈ આધિકારિક પુષ્ટિ નથી થઈ. આ વિસ્તારમાં આ રૉકેટ હુમલો પહેલી વખત થયો નથી.