ગુજરાતમાં નવરાત્રી દરમિયાન શું વરસાદ પડશે, આ તારીખોમાં ફરીથી હવામાન પલટાશે?
ઇમેજ સ્રોત, Getty Images
ગુજરાતમાં હવે ચોમાસાએ વિદાય લઈ લીધી છે અને હવે સમગ્ર રાજ્યમાં વરસાદ બંધ થઈ ગયો છે. મોટા ભાગના વિસ્તારોમાં સવારે થોડી ઠંડી અને બપોરની આસપાસ ગરમીનો અનુભવ થઈ રહ્યો છે.
હાલની સ્થિતિ પ્રમાણે ગુજરાતમાં ફરી હવામાન પલટાય તેવી શક્યતા દેખાઈ રહી છે અને નવરાત્રીમાં કદાચ કેટલાક દિવસોમાં હવામાનમાં ફેરફાર થાય તેવી શક્યતા છે.
ગુજરાતમાં આ વર્ષે ચોમાસામાં શરૂઆતના બે મહિના સારો વરસાદ પડ્યો, ઑગસ્ટ મહિનો સાવ વરસાદ વિના ગયો અને સપ્ટેમ્બર મહિનામાં કેટલાક વિસ્તારોમાં સારો વરસાદ પડ્યો તો કેટલાક વિસ્તારોમાં વરસાદ ઓછો પડ્યો.
હવે રાજ્યમાં ચોમાસાએ વિદાય લીધા બાદ ચોમાસુ પાકોની લણણીની શરૂઆત થઈ છે અને આવનારા દિવસોમાં રવિ પાકના વાવેતરની શરૂઆત થશે.
નવરાત્રીમાં ગુજરાતમાં વરસાદ પડશે?
ઇમેજ સ્રોત, Getty Images
ગુજરાતમાં હવે નવરાત્રીની શરૂઆત થશે અને એ સમયે જ કેટલાક વિસ્તારોમાં હવામાનમાં ફેરફાર આવે તેવી શક્યતા દેખાઈ રહી છે.
ગુજરાતના અનેક વિસ્તારોમાં અત્યારે સવારમાં ઝાંકળ અને થોડી ઠંડી સાથે બપોરે ગરમીની સ્થિતિ છે. હાલનો સમય ચોમાસું પૂરું થવાનો અને શિયાળો શરૂ થાય તે વચ્ચેનો ગાળો છે.
હવામાન વિભાગના આંકડાકીય મૉડલ પ્રમાણે રાજ્યમાં 16 કે 17 ઑક્ટોબરની આસપાસ હવામાનમાં ફેરફાર આવી શકે છે અને કેટલાક વિસ્તારોમાં વાદળછાયું વાતાવરણ થાય તેવી શક્યતા છે.
17 ઑક્ટોબરની આસપાસ એક મજબૂત વેસ્ટર્ન ડિસ્ટર્બન્સ ભારત તરફ આવે તેવી શક્યતા છે અને તેની અસર ઉત્તર ભારત સહિત રાજસ્થાન અને ગુજરાતના કેટલાક વિસ્તારોમાં પણ થાય તેવી શક્યતા છે. જે બાદ ત્રણ કે ચાર દિવસ સુધી ગુજરાતના કેટલાક વિસ્તારોમાં ફરીથી વાદળો દેખાય અને કેટલાક વિસ્તારોમાં ક્યાંક હળવો વરસાદ પડે તેવી શક્યતા હાલ દેખાઈ રહી છે.
End of સૌથી વધારે વંચાયેલા સમાચાર
ભારતની ખાનગી હવામાન એજન્સી 'સ્કાયમેટ'ના મહેશ પલાવતના જણાવ્યા અનુસાર હવે દેશ પર એક બાદ એક વેસ્ટર્ન ડિસ્ટર્બન્સ આવશે. 17 ઑક્ટોબરની આસપાસ આવનારી આ સિસ્ટમની અસર હાલની સ્થિતિ પ્રમાણે ગુજરાત સુધી થાય તેવી શક્યતા દેખાઈ રહી છે.
ઉત્તર ગુજરાત, મધ્ય ગુજરાત અને કચ્છના કેટલાક વિસ્તારોમાં આની અસર જોવા મળે તેવી સંભાવના હાલ દેખાઈ રહી છે.
બરફ પડશે અને કેટલાક વિસ્તારોમાં ભારે વરસાદ થશે?
ઇમેજ સ્રોત, Getty Images
હાલ દેશમાં ત્રણ પ્રકારની પરિસ્થિતિ છે, ઉત્તર ભારતમાં બરફ વર્ષા શરૂ થઈ ગઈ છે, પૂર્વોત્તરનાં રાજ્યો તથા દક્ષિણ ભારતના વિસ્તારોમાં વરસાદ પડી રહ્યો છે અને રાજસ્થાન તથા ગુજરાત સહિત મધ્ય ભારતના વિસ્તારોમાં ગરમી પડી રહી છે.
હિમાલયના વિસ્તારોમાં હવે બરફ વર્ષાની શરૂઆત થશે અને આવનારા દિવસોમાં વધારે વિસ્તારોમાં બરફ પડ્યા બાદ પવનોની દિશામાં પરિવર્તન આવતા દેશના મોટા ભાગના વિસ્તારોમાં ઠંડીની શરૂઆત થશે.
ભૂમધ્ય સાગરમાં જે સિસ્ટમો સર્જાઈને આગળ વધે છે તે હવે ભારત પર આવશે, એટલે કે હવે વેસ્ટર્ન ડિસ્ટર્બન્સ ઉત્તર ભારત પર આવશે અને એની અસર દેશના અનેક વિસ્તારમાં થશે.
ખાસ કરીને આ સિસ્ટમોની અસર ઉત્તર ભારતમાં જોવા મળે છે પરંતુ જ્યારે આ સિસ્ટમ વધારે મજબૂત હોય ત્યારે તેની અસર ગુજરાત અને મહરાષ્ટ્ર સુધી થતી હોય છે.
આવનારા દિવસોમાં એક મજબૂત સિસ્ટમ ભારત તરફ આવે તેવી શક્યતા છે અને તેના કારણે જમ્મુ-કાશ્મીરથી લઈને ઉત્તરાખંડ સુધીના વિસ્તારોમાં બરફ તથા ઉત્તર ભારતના કેટલાક વિસ્તારોમાં ભારે વરસાદ થાય તેવી શક્યતા છે.
વેસ્ટર્ન ડિસ્ટર્બન્સ એટલે શું અને તે ગુજરાતને શું અસર કરે છે?
ઇમેજ સ્રોત, BBC Sport
તમારા કામની સ્ટોરીઓ અને મહત્ત્વના સમાચારો હવે સીધા જ તમારા મોબાઇલમાં વૉટ્સઍપમાંથી વાંચો
વૉટ્સઍપ ચેનલ સાથે જોડાવ
Whatsapp કન્ટેન્ટ પૂર્ણ
ભૂમધ્ય સમુદ્ર કે કાસ્પિયન સમુદ્રમાંથી ઊઠતાં તોફાનોને વેસ્ટર્ન ડિસ્ટર્બન્સ કહેવામાં આવે છે અને ત્યાંથી તે ભારત સુધી આવે છે. ભારતના હવામાન વિભાગના જણાવ્યા પ્રમાણે વેસ્ટર્ન ડિસ્ટર્બન્સ (પશ્ચિમી વિક્ષોભ) ઉત્તર અને પશ્ચિમ ભારતમાં શિયાળામાં વરસાદ લાવે છે.
આ એક પ્રકારના લૉ પ્રેશર છે અને તે પશ્ચિમ તરફથી પૂર્વ તરફ આવતા હોવાને કારણે તેને વેસ્ટર્ન ડિસ્ટર્બન્સ કે પશ્ચિમ વિક્ષોભ કહેવામાં આવે છે. ભૂમધ્ય સાગર ભારતની પશ્ચિમમાં આવેલો છે અને તે તરફથી આ સિસ્ટમો ભારત પર આવે છે.
જ્યારે આ સિસ્ટમ ભારત પર પહોંચે છે ત્યારે તેની સાથે તે ભેજ લાવે છે અને તેના કારણે અફઘાનિસ્તાન, પાકિસ્તાન અને ભારતમાં બરફવર્ષા અને વરસાદ પડે છે. જ્યારે આ સિસ્ટમ મજબૂત હોય ત્યારે તેની અસર ગુજરાત સુધી થાય છે અને ઉત્તર ભારતના ઘણા વિસ્તારોમાં તેના કારણે ભારે વરસાદ પણ થઈ શકે છે.
વેસ્ટર્ન ડિસ્ટર્બન્સની ખાસ અસર ઉત્તર ભારતમાં થતી હોવાને કારણે તે રવી પાક માટે ખૂબ મહત્ત્વના બની રહે છે. તેના કારણે શિયાળામાં અને ચોમાસા પહેલાં વરસાદ પડે છે.
ઉપરાંત અફઘાનિસ્તાન, પાકિસ્તાન તથા ઉત્તર ભારતના વિસ્તારોમાં વેસ્ટર્ન ડિસ્ટર્બન્સને કારણે બરફ પડે છે, જેને કારણે ઠંડા થતા પવનો ગુજરાત તરફ આવે છે અને તે ગુજરાતમાં ઠંડી લાવે છે.
