ગુજરાતમાં ચોમાસું સક્રિય, ક્યાં પડશે ધોધમાર વરસાદ અને કયા જિલ્લાઓમાં ભારે વરસાદની આગાહી?
ઇમેજ સ્રોત, Getty Images
ગુજરાતમાં ખેડૂતો ચોમાસાના વરસાદની રાહ જોઈને બેઠા છે એવામાં અનેક વિસ્તારોમાં હવામાન પલટાયું છે અને રાજ્યના ઘણા વિસ્તારોમાં વરસાદની શરૂઆત થઈ છે.
છેલ્લા ઘણા દિવસોથી નબળું પડી ગયેલું ચોમાસું હવે ફરી મજબૂત બન્યું છે અને હવે આ ચોમાસું સક્રિય બનીને આગળ વધી રહ્યું છે.
હવામાન વિભાગે આગાહી કરી છે કે આગામી ત્રણ કે ચાર દિવસમાં ચોમાસું ગુજરાતના વધારે વિસ્તારોને આવરી લે તેવી અનુકૂળ પરિસ્થિતિઓ સર્જાઈ છે.
ગુજરાતમાં આગામી સાત દિવસ માટે હવામાન વિભાગે વિવિધ વિસ્તારોમાં વરસાદની આાગહી કરી છે અને કેટલાક વિસ્તારોમાં ભારે વરસાદની પણ આગાહી કરી છે.
ગુજરાતમાં 10 જૂનના રોજ એન્ટ્રી બાદ ચોમાસું આગળ વધતું અટકી ગયું હતું અને માત્ર કેટલાક વિસ્તારોમાં છૂટોછવાયો વરસાદ થયો હતો. રાજ્યના મોટા ભાગના વિસ્તારોમાં માત્ર પવન ફૂંકાઈ રહ્યો હતો અને ઉનાળા જેવી ગરમી પડી રહી હતી.
ગુજરાતના કયા જિલ્લાઓમાં ભારે વરસાદની આગાહી?
ઇમેજ સ્રોત, IMD
ચોમાસું સક્રિય બનતાં જ રાજ્યમાં ફરી વરસાદી માહોલ જોવા મળી રહ્યો છે અને આગામી દિવસોમાં રાજ્યમાં સારા વરસાદની સંભાવના દેખાઈ રહી છે.
હવામાન વિભાગે આગાહી કરી છે કે આગામી સાત દિવસ સુધી રાજ્યના વિવિધ વિસ્તારોમાં હળવાથી ભારે વરસાદની શક્યતા દેખાઈ રહી છે.
End of સૌથી વધારે વંચાયેલા સમાચાર
તમારા કામની સ્ટોરીઓ અને મહત્ત્વના સમાચારો હવે સીધા જ તમારા મોબાઇલમાં વૉટ્સઍપમાંથી વાંચો
વૉટ્સઍપ ચેનલ સાથે જોડાવ
Whatsapp કન્ટેન્ટ પૂર્ણ
હવામાન વિભાગના અમદાવાદ કેન્દ્ર દ્વારા કરવામાં આવેલી આગાહી પ્રમાણે દક્ષિણ ગુજરાત અને સૌરાષ્ટ્રના કેટલાક વિસ્તારોમાં ભારે વરસાદ પડવાની શક્યતા દેખાઈ રહી છે.
23 જૂનના રોજ નવસારી, વલસાડ, ડાંગ અને ગીર-સોમનાથ જિલ્લાના કેટલાક વિસ્તારોમાં ભારેથી ખૂબ ભારે વરસાદ પડવાની આગાહી કરવામાં આવી છે. જ્યારે જૂનાગઢ, અમરેલી, ભાવનગર, ભરૂચ, સુરત, ડાંગ, નર્મદા જિલ્લાના કેટલાક વિસ્તારોમાં ભારે વરસાદની આગાહી કરવામાં આવી છે.
આ સાથે જ દક્ષિણ ગુજરાત, મધ્ય ગુજરાત, પૂર્વ ગુજરાત તથા સૌરાષ્ટ્રના વિસ્તારોમાં આજથી વરસાદનું જોર વધશે અને વધારે વિસ્તારોમાં વરસાદ પડે તેવી સંભાવના છે.
24 જૂનના રોજ અમરેલી, ભાવનગર, ભરૂચ, સુરત, વલસાડ, નવસારી, નર્મદા અને છોટા ઉદેપુર જિલ્લાના કેટલાક વિસ્તારોમાં ભારે વરસાદ પડવાની આગાહી કરવામાં આવી છે.
ઉત્તર ગુજરાતના વિસ્તારોમાં પણ વરસાદની શરૂઆત થઈ જશે અને કેટલાક વિસ્તારોમાં હળવાથી મધ્યમ વરસાદની શક્યતા દેખાઈ રહી છે. કચ્છ જિલ્લાના કેટલાક વિસ્તારોમાં પણ છૂટોછવાયો વરસાદ થવાની સંભાવના છે.
અઢીથી ચાર ઇંચ જેટલો વરસાદ થાય તો તેને ભારે વરસાદ કહેવામાં આવે છે, જ્યારે ચાર ઇંચથી આઠ ઇંચ જેટલા વરસાદને ખૂબ ભારે વરસાદ ગણવામાં આવે છે.
ચોમાસું ગુજરાતમાં ક્યારે આગળ વધશે, વાવણીલાયક વરસાદ ક્યારે થશે?
ઇમેજ સ્રોત, IMD
ગુજરાતમાં 10 જૂનના રોજ ચોમાસાની એન્ટ્રી થઈ ગઈ હતી, જે ચોમાસાની અધિકારીક તારીખ 15 જૂન કરતાં 5 દિવસ વહેલી હતી. પરંતુ શરૂઆત બાદ ચોમાસું નબળું પડી ગયું અને તેની પ્રગતિ અટકી ગઈ હતી.
હવે ચોમાસું ફરીથી આગળ વધે તેવી સંભાવના દેખાઈ રહી છે, આગામી 3 કે 4 દિવસમાં ચોમાસું રાજ્યના વધારે વિસ્તારોને આવરી લે તેવી સંભાવના છે.
ગુજરાતમાં આજથી જૂન મહિનાના અંત સુધીમાં સારો વરસાદ થવાની શક્યતા છે, જેમાં રાજ્યના મોટા ભાગના વિસ્તારોમાં વાવણીલાયક વરસાદ થાય તેવી સંભાવના છે.
ગુજરાતમાં આગામી પાંચ દિવસો સુધી દક્ષિણ ગુજરાત, મધ્ય ગુજરાત, પૂર્વ ગુજરાત તથા સૌરાષ્ટ્રના અનેક વિસ્તારોમાં ધોધમાર વરસાદની શક્યતા છે. વરસાદનું પ્રમાણ વધતાં ચોમાસું પણ આગળ વધશે.
હાલની સ્થિતિ પ્રમાણે ભારત પર હવામાનની વિવિધ સિસ્ટમો સર્જાતાં ચોમાસું ફરી મજબૂત બન્યું છે અને ફરી આગળ વધવાનું શરૂ થયું છે.
ચોમાસાની અરબી સમુદ્ર તરફની શાખા અને બંગાળની ખાડી તરફની શાખા બંને સક્રિય થઈ છે અને તેના કારણે ગુજરાતમાં હવે વરસાદનું પ્રમાણ વધશે અને આગામી સાત દિવસોમાં ઘણા વિસ્તારોમાં વાવણીલાયક વરસાદ થશે.
હાલની સ્થિતિ પ્રમાણે આ મહિનાના અંત સુધીમાં અને આગામી મહિનાની શરૂઆતમાં ચોમાસું રાજ્યના તમામ વિસ્તારોમાં પહોંચી જાય તેવી શક્યતા છે. આ સાથે જ રાજ્યના ઘણા વિસ્તારોમાં ભારે વરસાદ પણ પડવાની શક્યતા છે.
