ગુજરાત વિધાનસભા ચૂંટણી : ભાજપે કરી ઉમેદવારોની જાહેરાત, આ મંત્રીઓનાં પત્તાં કપાયાં

ગુજરાત વિધાનસભાની આગામી ચૂંટણીને હવે આંગળીના વેઢે ગણી શકાય એટલા જ દિવસો બાકી છે ત્યારે ભારતીય જનતા પાર્ટીએ વિધાનસભાની 160 બેઠક માટેના ઉમેદવારો ગુરુવારે જાહેર કર્યા છે.

ગુજરાત વિધાનસભા ચૂંટણી માટે ભારતીય જનતા પક્ષે વિધાનસભાની 182માંથી 160 બેઠકો માટે ઉમેદવારો જાહેર કર્યા છે. ભાજપે 2017ની સરખામણીમાં 38 બેઠકો પર નવા ઉમેદવારો ઉતાર્યા છે.

જેમાં કૉંગ્રેસમાંથી હાર્દિક પટેલને વીરમગામ વિધાનસભા બેઠક પરથી ટિકિટ આપવામાં આવી છે. આ ઉપરાંત કૉંગ્રસના હર્ષદ રિબડિયા જે 15 દિવસ અગાઉ જ ભાજપમાં જોડાયા હતા તેમને વિસાવદર બેઠક પરથી ભાજપે ટિકિટ આપી છે.

મોરબી પુલ દુર્ઘટના દરમિયાન પીડિતોને બચાવવાની જેમની કામગીરીના વીડિયો વાઇરલ થયા હતા, તે ભાજપના ભૂતપૂર્વ ધારાસભ્ય કાંતિ અમૃતિયાને ભાજપે મોરબીથી તેમના વર્તમાન ધારાસભ્ય અને રાજ્ય સરકારમાં મંત્રી બ્રિજેશ મેરજાના સ્થાને ફરી એકવાર ટિકિટ આપી છે.

પ્રથમ યાદીમાં જાહેર કરાયેલા ઉમેદવારો

પૂર્વ મહેસૂલમંત્રી રાજેન્દ્ર ત્રિવેદીનું પત્તું કપાયું

ભાજપે 160 બેઠક માટે જે ઉમેદવારોની યાદી જાહેર કરી છે, એ યાદીમાં ભૂપેન્દ્ર પટેલના નેતૃત્વની રાજ્ય સરકારમાં મંત્રીપદે રહી ચૂકેલા રાજેન્દ્ર ત્રિવેદી, પરમાર પ્રદીપભાઈ, ચૌહાણ અર્જુનસિંહ અને રૈયાણી અરવિંદભાઈ, આર. સી. મકવાણાને ટિકિટ આપવામાં આવી નથી.

નોંધપાત્ર છે કે, પૂર્વ મુખ્ય મંત્રી વિજય રૂપાણી, પૂર્વ નાયબ મુખ્ય મંત્રી નીતિન પટેલ, પૂર્વ શિક્ષણમંત્રી ભૂપેન્દ્રસિંહ ચુડાસમા, પૂર્વ કૃષિમંત્રી આર.સી. ફળદુ, વિધાનસભાનાં અધ્યક્ષ ડૉ. નિમાબહેન આચાર્ય સહિતના ભાજપના વરિષ્ઠ નેતાઓએ બુધવારે સાંજે એકસાથે ચૂંટણી નહીં લડવાનો નિર્ણય જાહેર કર્યો હતો.

ભારતીય જનતા પક્ષે આગામી વિધાનસભાની ચૂંટણી માટે જાહેર કરેલી 160 ઉમેદવારોની પ્રથમ યાદીમાં 14 મહિલાઓને ટિકિટ આપી છે.

નોંધપાત્ર બાબત એ છે કે, વર્ષ 2017ની વિધાનસભા ચૂંટણીમાં ભાજપે 12 મહિલા ઉમેદવારોને જ ટિકિટ આપી હતી. આ યાદીમાં ભૂપેન્દ્ર પટેલના નેતૃત્વની રાજ્ય સરકારમાં મંત્રી રહી ચૂકેલાં બે મહિલા નેતા મનીષાબહેન વકીલ અને નિમિષાબહેન સુથારને ફરી ટિકિટ આપવામાં આવી છે.

જાહેર કરાયેલાં મહિલા 14 ઉમેદવારો પૈકી ત્રણ અનુસૂચિત જાતિનાં છે અને એક ઉમેદવાર અનુસૂચિત જનજાતિનાં છે.

2017ની ચૂંટણીમાં ભાજપને 99 બેઠક મળી હતી, પણ અત્યારે તેના 111 ધારાસભ્યો છે

ગુજરાતની ચૂંટણીમાં અત્યાર સુધી 25 વર્ષથી વધારે સમય સુધી સત્તામાં રહેનારા ભાજપ અને સત્તાથી દૂર રહેનારી કૉંગ્રેસ વચ્ચે જંગ જામતી હતી. જોકે, આ વખતે આમ આદમી પાર્ટી પણ છે.

ગુજરાતમાં વર્ષ 2017ની વિધાનસભાની ચૂંટણીમાં ભાજપ 100ના આંકડા સુધી પણ પહોંચી શક્યો ન હતો. પક્ષને 99 બેઠકો મળી હતી. તેમજ ભારતીય રાષ્ટ્રીય કૉંગ્રેસ એ સમયની ચૂંટણીઓમાં સારું પ્રદર્શન કરવાની સાથે 77 બેઠકો મેળવી હતી. પરંતુ કૉંગ્રેસ સત્તાથી દૂર જ રહી જવા પામી હતી.

વિધાનસભાની ચૂંટણી સંદર્ભે આ વખતે મોંઘવારી, શિક્ષણ, બેરોજગારી અને વ્યાપક વિકાસના મુદ્દા પર ચર્ચા થઈ રહી છે. એક તરફ ગુજરાતમાં સત્તા પક્ષ ભાજપ ‘વિકાસના મુદ્દે’ જીતનો આત્મવિશ્વાસ વ્યક્ત કરી રહ્યો છે, તો કૉંગ્રેસ અને આપ ‘મોંઘવારી, ભ્રષ્ટાચાર અને શાસનમાં જડતા’થી ‘જનતામાં રોષ’ હોવાની વાત કરી રહ્યા છે.

જોકે, 2017માં માત્ર 99 બેઠકો પર વિજય મેળવ્યા બાદ ભાજપે કૉંગ્રેસના ધારાસભ્યોને પોતાની સાથે જોડવાનું શરૂ કર્યું. વર્ષ 2022 સુધીમાં કૉંગ્રેસમાંથી રાજીનામું આપીને પેટાચૂંટણી લડીને ભાજપ માટે વિજેતા બનેલા ધારાસભ્યોને ધ્યાનમાં લઈએ તો હાલ વિધાનસભામાં ભાજપના કુલ ધારાસભ્યોની સંખ્યા 111 છે.

તમે બીબીસી ગુજરાતીને સોશિયલ મીડિયા પર અહીં ફૉલો કરી શકો છો

Facebook પર સમાચાર વાંચવા અહીં ક્લિક કરો.

Instagram પર બીબીસી ગુજરાતીને અહીં ફૉલો કરો.

YouTube પર બીબીસી ગુજરાતીના વીડિયો જોવા માટે અહીં ક્લિક કરો.

Twitter પર બીબીસી ગુજરાતીની ફૉલો કરવા અહીં ક્લિક કરો.