Rwanda – Volleyball: FRVB yaciwe amande ya miliyoni zirenga 120 kubera gukinisha abatabyemerewe

Ishyirahamwe ry'umukino w'intoki wa volleyball mu Rwanda (FRVB) ryaciwe amande y'amafaranga 120,000 y'Ubusuwisi (agera kuri miliyoni 129 mu mafaranga y'u Rwanda) kubera gukinisha abakinnyi batabyemerewe, nkuko bikubiye mu mwanzuro w'akanama k'imyitwarire k'ishyirahamwe ry'uyu mukino ku rwego rw'isi (FIVB).

Mu itangazo, FIVB ivuga ko Abanya-Brazil Aline Aparecida Siqueira, Tainá Caroline Apolinario, Mariana Ferreira da Silva Barreto na Moreira Gomes Bianca "barenze ku mategeko y'imyitwarire" ubwo bakiniraga ikipe y'igihugu y'u Rwanda y'abagore mu irushanwa rya shampiyona nyafurika y'uyu mukino ryabereye i Kigali mu kwezi kwa cyenda mu 2021 kandi "amategeko atabibemerera".

Kuva ku itariki ya 16 y'ukwezi kwa cyenda 2021, FRVB yanahagaritswe mu bikorwa byose by'umukino wa volleyball mu gihe cy'amezi atandatu kubera "kurenga ku mategeko y'imyitwarire" - igihano kirangirana n'uku kwezi kwa gatatu.

Ishobora kujuririra iki cyemezo mu kanama k'ubujurire ka FIVB.

Ikinishwa ry'abo bakinnyi ryavuyemo gufungwa kwa Visi Perezida wa FRVB Bagirishya Jean de Dieu, umenyerewe ku izina rya 'Jado Castar'.

Mu kwezi kwa cumi urukiko rwa Gasabo mu mujyi wa Kigali rwamukatiye gufungwa imyaka ibiri, nyuma yo guhamwa n'icyaha cyo gukoresha inyandiko mpimbano mu kuzana abo bakinnyi mu ikipe y'igihugu, ariko muri uku kwezi kwa gatatu, urukiko rukuru rwamugabanyirije icyo gifungo kigera ku mezi umunani.

Kuva ku itariki ya 16 y'ukwezi kwa cyenda mu 2021, ubwo bahagarikwaga by'agateganyo, abo bakinnyi bafatiwe icyemezo cyo guhagarikwa gukina mu gihe cy'amezi 10.

Akanama k'imyitwarire ka FIVB kavuga ko gashobora kongera gufungura iyi dosiye mu gihe abo bakinnyi cyangwa ishyirahamwe ry'u Rwanda rya volleyball baba badakurikije ibiteganywa n'ibyo bihano.

Iryo rushanwa ryo mu kwezi kwa cyenda mu 2021 ryegukanwe na Tunisia itsinze Cameroun ku mukino wa nyuma.