Olivier Giroud: Rutahizamu wa Chelsea yamaze kwerekeza muri AC Milan

Rutahizamu wa Chelsea Olivier Giroud yamaze gusoza ibijyanye n'amasezerano yo kwerekeza muri AC Milan ku giciro kitatangajwe, nyuma y'imyaka itatu akinira i Stamford Bridge.

Uyu rutahizamu w'Umufaransa yageze muri Chelsea mu kwezi kwa mbere mu 2018 avuye muri Arsenal, aguzwe miliyoni 18 z'amapawundi.

Uyu mukinnyi w'imyaka 34, kuri Twitter yashimiye Chelsea kubera "inzibutso zihariye" yamuhaye, avuga ko atangiye "urugendo rushya n'umutima wishimye [unezerewe]".

Yanditse ati: "Intsinzi zacu muri FA Cup, Europa League na Champions League zabaye nziza cyane".

Giroud yongeyeho ati: "Ku ba Blues [abafana ba Chelsea] bose, ku bakinnyi twakinanye mu ikipe, ku batoza banjye bose, ku ikipe yose, ndabashimiye cyane kuri ibi bihe byihariye".

Mu mwaka ushize w'imikino, yatsinze ibitego 11 mu mikino 31 yakiniye Chelsea yegukanye igikombe cya Champions League muri uwo mwaka, ariko yabanje mu kibuga mu mikino umunani gusa yo muri shampiyona ya Premier League.

Ku mpeshyi ishize, Chelsea yaguze ba rutahizamu b'Abadage Kai Havertz na Timo Werner, bituma igihe cyo gukina cya Giroud kigabanuka mu mwaka w'imikino 2020-2021.

Byose hamwe, uyu rutahizamu yatsindiye Chelsea ibitego 39 mu mikino 119, ari hamwe na yo begukana Champions League, Europa League na FA Cup.

Uyu wanegukanye igikombe cy'isi hamwe n'ikipe y'igihugu y'Ubufaransa, yegukanye kandi FA Cup eshatu ari kumwe na Arsenal, ndetse yinjiye mu kibuga asimbura mu mukino wa kimwe cy'umunani cya Euro 2020 Ubufaransa bwasezerewemo n'Ubusuwisi.

Mu mwaka ushize w'imikino, AC Milan yasoje ku mwanya wa kabiri irushwa amanota 12 na mucyeba Inter Milan, iyi ikaba ari yo yegukanye igikombe cya shampiyona ya Serie A.