Avugwa mu mupira w'amaguru i Burayi ku 3/9/2019: Neymar, Neville, Sancho, Salah, Kalinic

Umutoza w'ikipe y'igihugu y'abagore y'Ubwongereza Phil Neville ni we uri guhabwa amahirwe menshi cyane yo gusimbura umutoza Jill Ellis w'ikipe y'igihugu y'abagore y'Amerika uherutse kuyihesha igikombe cy'isi. (Mail)

Ubutumwa bwo kuri telefone igendanwa bwa Lionel Messi bushobora kuba bwarateje akavuyo mu igura n'igurishwa ry'abakinnyi kuri iyi mpeshyi, ubwo Barcelone yageragezaga kongera kugarura rutahizamu Neymar w'imyaka 27 ukomoka muri Brazil, avuye muri Paris Saint-Germain (PSG), ariko ntibikunde.

Bivugwa ko Messi yabwiye Neymar ko Barcelone imukeneye ngo yongere kwisubiza igikombe cya Champions League. (L'Équipe)

Nasser Al-Khelaifi, Perezida w'ikipe ya PSG, yari kwemerera Neymar kuyivamo kuri iyi mpeshyi iyo haza kuboneka ikipe yatanga miliyoni 272 z'amapawundi, amafaranga yari kuba aciye umuhigo ku isi. (Le Parisien, via Sport)

Umwongereza Jadon Sancho w'imyaka 19 ukina nka rutahizamu mu ikipe ya Borussia Dortmund yavuze ko bishoboka ko yakwerekeza muri Manchester United, avuga ko "ntacyo byamutwara" asubiye iwabo ku ivuko. (Mirror)

Ku cyumweru gishize, Manchester United yohereje abakozi bayo bo kurambagiza abakinnyi bo kugura ku mukino wahuje Benfica na Braga, bagiye kureba uko abakinnyi babiri bakomoka muri Portugali bakina. Abo bakinnyi ni myugariro Ruben Dias w'imyaka 22 n'umukinnyi wo hagati Florentino Luis w'imyaka 20. (Mirror)

Nikola Kalinic, rutahizamu wa Atletico Madrid ukomoka muri Croatia w'imyaka 31, yageze mu ikipe ya Roma nk'inguzanyo mu gihe cy'umwaka, mu gihe iyi kipe yo muri shampiyona ya Serie A mu Butaliyani yohereje rutahizamu ukomoka muri République tchèque, Patrik Schick w'imyaka 23, mu ikipe ya RB Leipzig. (Gazzetta dello Sport)

Rutahizamu Ante Rebic w'imyaka 25 ukomoka muri Croatia, yamaze kuva mu ikipe ya Eintracht Frankfurt ajya muri AC Milan ku nguzanyo y'imyaka ibiri, mu gihe rutahizamu Andre Silva w'imyaka 23 ukomoka muri Portugali we yerekeje muri Eintracht Frankfurt. (Gazzetta dello Sport)

Amakipe akina muri shampiyona ya Premier League mu Bwongereza ni nkaho hafi ya yose azatora asaba ko igihe cy'igura n'igurishwa ry'abakinnyi mu mwaka utaha w'imikino cyongera guhuzwa n'igihe nk'icyo cyo ku mugabane w'i Burayi. (Telegraph)

Urubuga rwo kuri interneti rw'abafana ba Liverpool rwasabye ko iyi kipe igurisha rutahizamu Mohamed Salah w'imyaka 27 ukomoka mu Misiri, mu rwego rwo gushakisha amafaranga yo kugura rutahizamu w'Umufaransa Kylian Mbappe w'imyaka 20 ukinira PSG, Sancho ukina muri Borussia Dortmund cyangwa umukinnyi wo hagati w'Umudage Kai Havertz w'imyaka 20, ukina muri Bayer Leverkusen. (Mirror)

Umukinnyi wo hagati Rafinha Alcantara w'imyaka 26 ukomoka muri Brezili, yongereye amasezerano yo gukinira Barcelone, mbere yuko yerekeza mu ikipe ya Celta Vigo nayo yo muri shampiyona ya La Liga yo muri Espanye mu gihe cy'umwaka umwe nk'inguzanyo. (Marca)

Ikipe ya Royal Antwerp yaguze umukinnyi ukina hagati w'Umubiligi Steven Defour w'imyaka 31, hashize iminsi ibiri kontaro ye mu ikipe ya Burnley ihagaritswe bivuye ku bwumvikane bw'impande zombi. (Het Laatste Nieuws)

Ikipe ya Atalanta yasimbuje umukinnyi Martin Skrtel w'imyaka 34 wahoze ari myugariro wa Liverpool - kontaro ye yasojwe amaranye iminsi 24 gusa n'iyi kipe yo muri shampiyona ya Serie A - imusimbuza umukinnyi myugariro Simon Kjaer w'imyaka 30 ukomoka muri Denmark, imukuye muri Sevilla. (Goal)

Umukinnyi Marcus Edwards w'imyaka 20 ukomoka mu Bwongereza ukina ku ruhande mu ikipe ya Tottenham - bamwe bahimba "Messi muto" - yavuye muri iyi ikipe yo mu majyaruguru y'umujyi wa London yerekeza mu ikipe ya Vitoria yo mu cyiciro cya mbere muri Portugali mu masezerano y'igihe kirekire. (Sun)

Ikipe ya Almeria yo mu cyiciro cya kabiri muri Espanye yashwaje Manchester United ku mbuga nkoranyambaga nyuma yo kuyihigika mu kugura kuri miliyoni 8 z'amapawundi umukinnyi Arvin Appiah w'imyaka 18 ukina ku ruhande, imukuye muri Nottingham Forest, akaba kandi asanzwe anakina mu kipe y'Ubwongereza y'abari munsi y'imyaka 19. (Sun)