Kevin Durant 'yagiye' muri Brooklyn Nets

Inyandiko gusa
Kevin Durant yameje ko azava mu ikipe ya Warriors akajya muri Nets

Ahavuye isanamu, Getty Images

Insiguro y'isanamu, Kevin Durant yameje ko azava mu ikipe ya Warriors akajya muri Nets
Yatangajwe

Icyamamare mu mukino wa Basketball muri Amerika Kevin Durant yatangaje kuri Instagram ko agiye gukinira ikipe ya Brooklyn Nets.

Umunyamakuru w'imikino Adrian Wojnarowski wa ESPN yari yatangaje mbere ko uyu mukinnyi agiye kujya muri iyi kipe ku masezerano y'imyaka ine ya miliyoni $164.

Kuri Instagram ye, handitseho ko azajya mu ikipe ya Brooklyn Nets ubwo igihe cye nk'umukinnyi udafite amasezerano kizaba kigeze tariki 06 z'uku kwezi kwa karindwi.

Durant yari amaze imyaka itatu muri Golden State Warriors, akaba ari umukinnyi umaze kuba uwarushije abandi (MVP) muri NBA inshuro ebyiri.

Ageze muri Warriors, iyi kipe yatwaye ibikombe bibiri yikurikiranya bya NBA. Icya gatatu bari kwegukana batsinzwe na Toronto Raptors mu kwezi gushize.

Mu mikino ya nyuma iheruka (Play-offs), Durant yavunitse umutsi w'agatsitsino, ibi bikaba bizatuma adakina umwaka utaha wose wa 2019 - 2020.

ESPN ivuga ko Brooklyn Nets biteganyijwe kandi ko igura abandi bakinnyi barimo Kyrie Irving wa Boston Celtics na DeAndre Jordan wa New York Knicks.

Hari abatangiye kugaragaza ko ikipe ya Nets izaba ikomeye

Ahavuye isanamu, Instagram/nbaontnt

Insiguro y'isanamu, Hari abatangiye kugaragaza ko ikipe ya Nets izaba ikomeye