Abategetsi ba Kenya barakorwako amatohoza ku giturira co muri olempike

Umushikirizamanza mukuru wa republika avuga ko abategetsi indwi bo mu rwego rwo hejuru muri Kenya bagiye gushikanwa imbere y'ubutungane bagirizwa igiturire bariye mu nkino za olempike zo mu 2016.

Muri abo bagirizwa harimwo uwahoze ari umushikiranganji w'inkino hamwe n'uwahoze arongoye akanama ka olempike Kipchoge Keimo, yatwaye incuro zibiri zose umudari w'inzahabu mu nkino za Olympike.

Umushikirizamanza mukuru Noordin Haji yavuze ko bategerewa kwishikana bonyene ku musi wa mbere.

Imiliyoni zirenga 55 z'amashilingi ($545.542) yari agenewe abanonotsi vyavuzwe ko yaburiwe irengero.

Mw'itangazo ryiwe, Haji avuga ati:"Igiturire no kunyuruza amahera agenewe abanonotsi bacu vyagize ingaruka mbi ku gushobora kwitwara neza muri izo nkino."

Keino yatwaye umudari wa mbere w'inzahabu mu nkino za olempike mu kwiruka imetero 1.500 mu 1968 mu gisagara ca Mexco City, uwa kabiri na wo awutwara mu 1972 mu kwiruka imetero 3.000.

Mu nkino za olempike zo mu 2016 i Rio de Janeiro, Kenya yaronse imidari itandatu y'inzahabu n'ibiri y'ifeza co kimwe n'umujumpu- Imidari ya mbere myinshi yari ibonetse kuri ico gihugu.

Ariko ivyavugwa ko abarongoye umugwi hamwe n'abategetsi ba reta bariye igiturire vyatumye hibagirwa ivyashitsweko.

Ivyo biturire ni bimwe mu bimaze imisi bigirwako amatohoza muri Kenya.

Mu kwezi kwa gatanu, igipolisi ca Kenya carahagaritse uwari arongoye igisata c'urwaruka muri reta yagiriza ubusuma bw'imiriyaridi umunani z'amashilingi ya Kenya (imiliyoni 78 z'amadolari).

Prezida Uhuru Kenyatta yiyemeje kurwanya igiturire igihe yashika ku butegetsi mu 2013.