Uriko ubona ku rubuga aherekana amakuru mu nyandiko gusa, hakoresha uburyo buke. Ja ku rubuga nyamukuru ubone amakuru mu nyandiko iherekejwe n'amasanamu.
Njana ku rubuga nyamukuru canke aho gusoma gusa
Ibindi vyerekeye ingene urwo rubuga rugutwara uburyo (ama mega) buke
'Nta muntu n'umwe uzigera aduhitiramo uko tubaho' – Kagame
- Umwanditsi, Didier Bikorimana
- Igikorwa, BBC Gahuzamiryango
- Yatangajwe
Perezida w'u Rwanda Paul Kagame yavuze ko Abanyarwanda bahisemo gukomeza kubaho kandi ko nta muntu n'umwe uzigera ubahitiramo uko babaho.
Mu ijambo yavuze mu Cyongereza kuri uyu munsi u Rwanda rwibuka jenoside yahabaye mu 1994, yavuze ko nta ho wahungira amateka y'ibyabaye.
Avuga ku bacyekwaho ibyaha bya jenoside, Kagame yagize ati: "Ushobora kwiruka ariko ntushobora kwihisha" ukuri kw'ibyabaye.
Ari ku rwibutso rya jenoside rwa Kigali ruri ku Gisozi, Kagame yongeyeho ati: "Abantu bafashe icyemezo cyo gukomeza kubaho".
Ni umuhango wanitabiriwe na bamwe mu bahagarariye ibihugu byabo mu Rwanda.
Uyu munsi imyaka 29 irashize jenoside yabaye mu Rwanda itangiye. Mu gihugu hose, abantu bagera ku 800,000 bishwe mu gihe cy'iminsi 100.
Benshi mu bishwe bari abo muri ba nyamucye b'Abatutsi – na benshi mu babishe bari Abahutu.
Imbarutso yabaye urupfu rw'uwari Perezida w'u Rwanda, Juvénal Habyarimana, wari Umuhutu, ubwo indege ye yahanurwaga yitegura kugwa ku kibuga cy'indege i Kigali, ku itariki ya 6 Mata (4) mu 1994.
Kuri uyu munsi ONU yahariye kurizikana kuri jenoside yabaye mu Rwanda, umunyamabanga mukuru wa ONU António Guterres yasabye abatuye isi guhagurukira ukutihanganirana kurimo kwiyongera no guhora bari maso, biteguye kugira icyo bakora.
Guterres yagize ati: "Mureke duhe icyubahiro gikwiye Abanyarwanda bose bapfuye twubaka ejo hazaza hari ubwubahane, umutekano, ubutabera n'uburenganzira bwa muntu kuri bose".
Perezida Kagame yavuze ko Abanyarwanda bahisemo no "gukora ikintu cya mbere kigoye cyane... kubabarira… ariko ntidushobora kwibagirwa".
Ati: "Nta muntu n'umwe uzigera aduhitiramo uko tubaho ubuzima bwacu.
"Dufite imbaraga zitangaje twakuye muri aya mateka".
Mu cyumvikanye nko kuvuga kuri Repubulika ya Demokarasi ya Congo ariko atayivuze mu izina, Kagame yavuze ko "urugomo n'imvugo y'urwango" bikomeje kubaho "ahatari kure cyane ya hano" kandi ko amahanga arimo kwigira ntibindeba nkuko byari bimeze mu Rwanda mu 1994.
Leta ya DR Congo yagiye yamagana imvugo y'urwango hamwe n'ibikorwa byibasira bamwe mu baturage bayo kubera ubwoko bwabo, inavuga ko ababikora batabitumwe na leta.
DR Congo ishinja u Rwanda gufasha umutwe w'inyeshyamba wa M23 urwana na yo mu burasirazuba bw'icyo gihugu, ikirego u Rwanda na M23 bahakana.
Kagame yavuze ko "tugomba kurwanya ihakana rya jenoside kuko ari muri ubwo buryo amateka yisubiramo".
Yavuze ko Abanyarwanda batazigera bemera igerageza iryo ari ryo ryose ryo kubacamo ibice. Yanashimiye abafashije u Rwanda mu nzira y'ubutabera n'iterambere.