West Ham 1 - 0 Man U: David de Gea arabaye uruvugo inyuma y’ikosa ryaraye rihumiye umurwi wiwe

David de Gea aramaze gutabara Manchester United ku ncuro nyinshi cane mu myaka yose amaze i Old Trafford, ariko ikosa yaraye akoreye mu kibuga London Stadium c’umurwi wa West Ham ryaraye ryugururiye imiryango imirwi y’abakeba barondera kuyikura mu kibanza ca zine za mbere coyiha itike yo kuzoja mw’ihiganwa rihuza imirwi yabaye iya mbere iwabo (Ligue des Champions/Champions League), nk’uko vyandikwa na Tom Mallows w’igisata ca BBC kijejwe inkino, BBC Sport.

Iri kosa ryakozwe n’umunyegori David de Gea ryatumye Saïd Benrahma yinjiza igitsindo kimwe rudende c’urwo rukino ku munota wa 27.

Hari vyinshi bivugwa kuri kazoza k’uno munyegori wa Espagne amaze imyaka 12 i Old Trafford, inyuma y’iri kosa yakoze rigatuma Man U itsindwa mu rukino yari yizeye gutsinda.

Football ni umukino w’amakosa - Ten Hag

Umumenyereza wa Manchester United Erik ten Hag aravugira umunyegori wiwe David de Gea ku vyaraye bibaye mu gutsindwa na West Ham, urukino rwari rukurikiye urundi yaheruka gutsindwamwo na Brighton.

Ati: "Football ni umukino w’amakosa. Rimwe na rimwe amakosa y’umuntu aratuma mutsindwa, ariko nk’umurwi, ni ngombwa ko mwivyukiranya.

"Nk’umurwi ni ngombwa ko muhangana n’amakosa y’umuntu ku giti ciwe , aha rero dutegerezwa kwemera ko tutagiye tuvyifatamwo neza iyo dushitse imbere y’igori. Twakubise ku mwamba incuro zibiri, kandi twararonse n’ayandi mahirwe menshi meza. Vyaranse ko twinjiza, ibintu bica birangira uko”.

Man U ikeneye uwundi munyegori – Murphy

Jermain Defoe, avugira mu kiganiro ca BBC, Match of the Day 2, ntatahura ingene umunyegori wa Manchester United David de Gea yinjijwe igitsindo ku mupira wa Said Benrahma wari woroshe.

Defoe ati: "Ku muntu amaze gukina inkino 540, biroroshe kwibaza ko ashobora gukora amakosa make. Ni umwe mu bakinyi bawe bakuru bakuru”.

Uyu yahoze ari umusatirizi wa West Ham na Tottenham yongerako ati: "Ndabiravye neza, ni ukuri bigenda biba nabi…none novuga iki? Erega si n’umupira watewe n’inguvu, umengo ni umupira yari ahereje. Sintahura igituma yakubise umwararo kurya. Ndanka kuvuga ibintu nk’ibi, ariko ndibaza neza ko urya wari umupira yari gushobora gukurayo”.

Mugenziwe Danny Murphy yemeza ko ikosa yakoze kwabaye uguta umutwe akavuga ko “hageze ko” Manchester United ihindura amasezerano ifitaniye na De Gea yiteze kurangira mu ci riza.

Ati: "Nta vyiza bitagira iherezo. Yarabaye rurangiranwa muri Manchester United ariko harageze ko ibintu bihinduka. Erik ten Hag arashaka gukina ukuntu. Hariho kandi n’ikibazo c’amafaranga. None woshima gukoresha amafaranga nk’ayo nyene mu gihe ushobora kuronka uwundi angana nawe wohemba igice c’umushahara? Oya reka tuvugishe uukri.

"Ndibaza ko, nimba United ishaka guhiganwa koko igasubiza ukuguru mw’ihiganwa…ikeneye uwundi munyegori”.

Ikosa rya De Gea 'ryavuye ku kudatekana mu mutwe' - Matt Jarvis

Matt Jarvis yahoze akinira West Ham na Norwich ati: “Si nibaza ko hari umuntu n’umwe yatahuye ikosa [rya David de Gea] mu kibuga. Si nzi ko yanyereye canke ivyatsi bikamufata mu kirenge, ariko ni ikosa rikomeye. Aha nta kwiyemera kurimwo. Arakora ibintu nk’ibi incuro nyinshi mu myimenyerezo.

“Urya ni umupira wari woroshe gukurayo. Ntiwari ukomeye, ni nk’umupira yari ahereje umuntu akawumuha nabi. Mu bintu bimuranga, arakunze gukurayo imipira ikomeye mu nkino ziwe, rero vyatumwe no kuba adatekanye mu mutwe”.

Ntitwota impfane kuri De Gea - Reo-Coker

Nigel Reo-Coker yahoze akina hagati mw’ihiganwa rya Premier League yemeza ko David de Gea adakwiye gutabwako impfane kw’ikosa yakoze mu rukino rwa nijoro na West Ham afatiye ku bintu bikomeye yakoze mu myaka iheze.

Yabwiye Radio 5 Live ya BBC ati: "Ryari ikosa. Ibi ni ibintu bishika.

"David de Gea yarabaye umwe mu bantu babaye urutare rw’intamenwa ba Manchester United igihe kitari gito.

"Ibihe nk’ibi ni ibintu utipfuza kubona, ariko ntukwiye kumwiyamiriza kubera aramaze kubatabara incuro zitari nke”.

Ledley King yahoze akina inyuma muri Tottenham na we nyene aravyemera, aho avuga ati: "Iki gitsindo cari coroshe cane. Ndibaza ko De Gea yanyereye gatoya. Vyabaye ibintu bibabaje, ariko iyo unyereye na gatoya, simbona ico wohava ukora, ni vyo vyamushikiye.

"Sinigeze mbona ko Manchester United yari ifise ishaka rihagije muri urwo rukino ryo guhindura ibintu”.

Adam Crafton yandika mu kinyamakuru gikorera ku rubuga ngurukanabumenyi The Athletic na we yongerako ati: "Amaze igihe kirekire, barakeneye amaraso mashasha.

"De Gea arakunze gukurayo imipira, ariko uravye ivyo Ten Hag ashaka, barakeneye uwundi munyegori mwiza gusumba”.