Kenya: Abantu 250,000 bapfuye basanzwe ku rutonde rw’abazatora

Komisiyo y’amatora muri Kenya yatangaje ko igenzura rikomeje rimaze kubona amazina y’abantu hafi 250,000 bapfuye ku rutonde rw’abazatora. 

Abandi bantu hafi 500,000 basanze banditsweho amakarita abiri y’itora mu gihe abarenga 226,000 bo biyandikishije bakoresheje ibyangombwa bibaranga bitari ibyabo. 

Komisiyo y’amatora muri Kenya yatangaje ko muri rusange ibibazo mu rutonde rw’abaturage batora biri ku bantu barenga miliyoni imwe. 

Umukuru w’iyi komisiyo, Wafula Chebukati, yavuze ko ibimaze kuboneka muri iri genzura bizacyerereza gutangaza urutonde rwa nyuma rw’abantu bazatora. 

Mbere, iyi komisiyo yari yavuze ko urutonde rw’abazatora ruzatangazwa tariki 9 Kamena(6) ariko ubu byashyizwe tariki 20 Kamena kugira ngo bakemure ibi bibazo bimaze kuboneka. 

Ibibazo mu matora ya Kenya mbere byatumye haba imidugararo ikomeye yiciwemo abantu. 

Amatora y’uyu mwaka ateganyijwe tariki 9 Kanama(8) uyu mwaka. 

Abakandida bane, bose b’abagabo, nibo bamaze kwemererwa guhatana. 

Abo ni; David Mwaure, George Wajackoyah, Raila Odinga na William Ruto.