Amerika n’Ubwongereza vyakoze ibitero bishasha ku ba Houthi muri Yemen

Ubushikiranganji bwo kwivuna abansi bwa Reta Zunze Ubumwe za Amerika, Pentagon, buvuga ko indege z’intambara za Amerika n’iz’Ubwongereza zakubise ibibanza 18 vy’aba-Houthi muri Yemen - igitero rusangi kigize kane.

Amerika ivuga ko ibi bitero vyaraye bikozwe nijoro ku wa gatandatu vyakozwe ku bigo vy’ububiko, vy’indege zitagira abadereva (drone), vy’ubuhinga bwo kwivuna ibitero vyo mu kirere, vy’amaradari (radar) hamwe no kuri kajugujugu y’uno muhari.

Ubwongereza buvuga ko ibi bihugu vyakoze ibi bitero mu ntumbero yo “kuzimanganya” aba-Houthi.

Uno muhari w’aba-Houthi ufashwe mu mugongo na Irani urabandanya ibitero vyawo ku mato y’ubucuruzi akoresha umuhora wo mu Kiyaga Gitukura.

Aha-Houthi – basanzwe bagenzura uturere tutari duto twa Yemen harimwo umugwa mukuru Sanaa – bamaze imisi batera amato bavuga ko afitaniye isano na Israel be n’Uburengero mu kwihora ku ntambara ibandanya hagati ya Israel na Hamas muri Gaza.

Ubucuruzi mpuzamakungu burageramiwe bikomeye ibiciro navyo bikaduga kubera amato yunguruza ibidandazwa biba ngombwa ko afata ingendo ndende mu gukwepa Ikiyaga Gitukura – kamwe mu turere dukomeye cane ducishwamwo ibidandazwa kw’isi.

Mw’itangazo rusangi, Pentagon ivuga ko ibi bitero vy’ejo ku wa gatandatu vyakozwe ku bibanza 18 vy’aba-Houthi mu turere umunani two muri Yemen tuzwi ko dufise ububiko bwo mu kuzimu bw’ibirwanisho, ibisasu vya misire, bw’amadrone, bw’ubuhinga bwo kwivuna ibitero vyo mu kirere, bw’amadarari hamwe no kuri kajugujugu.

Iti: "Ibi bitero ntahusha bifise intumbero yo guhungabanya no kugabanya ubushobozi bw’aba-Houthi bwo guhungabanya ubucuruzi mpuzamakungu, amato hamwe n’ubuzima bw’inzirakarengane zikoresha ano mato muri umwe mu mihora ngirakamaro yo mu mazi”.

Iri tangazo rivuga ko ibitero birenga 45 vy’aba-Houthi ubu ku mato y’ibicuruzwa n’ay’igisirikare kuva hagati muri Munyonyo [11] ari akaga ku butunzi mpuzamakungu, co kimwe n’umutekano w’akarere, kandi bisaba ko amakungu ahaguruka.

Iri tangazo rivuga ko ibi bitero vyakozwe "ku bufasha bwa Australia, Bahrain, Canada, Danemark, Ubuholande na Nouvelle-Zélande”.

Inyuma y’aho gato, umushikiranganji wo kwivuna abansi wa Amerika Lloyd Austin yashimangiye ko Amerika "itazohigitanya gufata ingingo, mu ntumbero yo gukingira ubuzima n’ubucuruzi muri umwe mu mihora nyamukuru yo mu mazi kw’isi”.

Ku ruhande rwiwe, umushikiranganji w’Ubwongereza ajejwe kwivuna abansi Grant Shapps avuga ko ari "igikorwa cacu co gukingira ubuzima bw’abanyagihugu mu nyanja hamwe n’uburenganzira bwo gukoresha amayira yo mu mazi ".

"Nico gituma Royal Air Force [igisirikare c’Ubwongereza kirwanira mu mazi] yagize uruhara ku ncuro ya kane muri ibi bitero ntahusha ku bibanza vya gisirikare vy’aba-Houthi muri Yemen".

Imbere y’aha ejo nyene, igisirikare ca Amerika cavuze ko cari casambuye ibisasu indwi vya misire vy’aba-Houthi birasa amato vyariko birategurwa kugira biraswe.

Mu ntango z’ino ndwi, abadereva b’ubwato bwo muri Belize bwanditswe ku Bwongereza barabutaye hanze ya Yemen inyuma y’aho burasiwe ibisasu vya misire vyarashwe n’aba-Houthi.