Umugore wanduye Ebola muri Nigeria yemejwe ko ari umugore w'umudipolomate w'Ubusuwisi
Ahavuye isanamu, AFP via Getty Images
- Umwanditsi, Simi Jolaoso
- Igikorwa, Umunyamakuru kuri Afurika
- Umwanditsi, Makuochi Okafor
- Igikorwa, BBC Afurika
- Yakoze inkuru ari, Lagos
- Umwanditsi, Wycliffe Muia
- Yatangajwe
- Igihe co gusoma: iminota 3
Minisiteri y'ububanyi n'amahanga y'Ubusuwisi yemeje ko umugore wanduye Ebola muri Nigeria ari umugore w'umudipolomate w'Ubusuwisi.
Uwo mugore, w'imyaka 42 ukomoka muri Uganda uba mu murwa mukuru Abuja wa Nigeria, bamusanzemo iyo virusi ku itariki ya 20 Ukwakira (10) uyu mwaka, aba umurwayi wa mbere wa Ebola wemejwe muri icyo gihugu mu myaka irenga 10 ishize.
Bombi bari bagiye muri Uganda mu ntangiriro y'uku kwezi. Umugabo we ubu yashyizwe mu kato ariko nta bimenyetso bya Ebola afite, nkuko minisiteri y'ububanyi n'amahanga y'Ubusuwisi ibivuga.
Iyo minisiteri yabwiye BBC ko abakozi bose 25 b'ambasade yayo muri Nigeria bafite ubuzima bwiza kandi ko badacyeneye kujya mu kato.
Iyo minisiteri yavuze ko uwo mugore yamaze hafi icyumweru kimwe ari mu ivuriro ryigenga ry'i Abuja afite ibimenyetso mbere yuko bamusangamo Ebola.
Minisiteri y'ububanyi n'amahanga y'Ubusuwisi yemera ko yanduye iyo virusi ubwo yari yagiye muri Uganda, nubwo abategetsi bo mu rwego rw'ubuvuzi bataramenya inkomoko y'ubwo bwandu bwe.
Uganda ihana umupaka na Repubulika ya Demokarasi ya Congo (DRC), aho abantu bagera ku 4,600 bamaze kwicwa na Ebola ya mbere yishe abantu benshi mu mateka y'icyo gihugu. Abantu babiri barapfuye muri Uganda nyuma gato yuko iki kiza gitangajwe bwa mbere muri Gicurasi (5) uyu mwaka ariko kuva muri Kanama (8) uyu mwaka Uganda yatangajwe ko nta Ebola iyirangwamo.
Minisiteri y'ububanyi n'amahanga y'Ubusuwisi yavuze ko icyemezo cyo kudashyira mu kato abakozi b'ambasade yayo, bagizwe n'Abasuwisi umunani hamwe n'abakozi 17 bo muri Nigeria, yagifashe imaze kubiganiraho na minisiteri y'ubuzima ya Nigeria hamwe n'ishamir ry'Umuryango w'Abibumbye ryita ku buzima (OMS/WHO).
Yongeyeho ko iyo ambasade igifunguye kandi ko igikora, hakaba harimo gukurikizwa ingamba z'ubuzima zo kwirinda n'iz'umutekano.
OMS ivuga ko uwo mugore arimo kuvurirwa mu kato kandi ko arimo kugaragaza ibimenyetso byo koroherwa.
Yasubiye muri Nigeria ku itariki ya 3 Ukwakira nyuma yo kumara ibyumweru hafi bibiri n'igice muri Uganda.
Kuri uyu wa gatanu, leta y'Ubusuwisi yabwiye ibiro ntaramakuru Reuters ko uwo murwayi atigeze ajya muri DRC, ibyo bikaba bivuguruza ibivugwa biva muri Uganda.
Yagaragaje ibimenyetso iminsi ine nyuma yo kugera i Abuja ndetse ajya kwivuriza mu mavuriro abiri yigenga, nuko baza kumusangamo Ebola ku itariki ya 20 Ukwakira.
Abategetsi bo mu rwego rw'ubuvuzi ubu barimo gukora iperereza ku kumenya niba ashobora kuba yarahuye n'umugabo w'Umunya-Kenya wishwe na Ebola kandi wari waranyuze ku kibuga cy'indege gikuru cya Uganda ku munsi umwe na we.
Abakora iperereza barimo gusuzuma niba abo bombi bashobora kuba baranduriye ku gukoresha ibikoresho bimwe cyangwa binyuze ku guhura n'undi muntu, nkuko byatangajwe ku wa kane n'ikigo cy'Afurika cyo kurwanya no gukumira indwara (Africa CDC).
Dr Wessam Mankoula, umukuru wo kwitegura no guhangana n'ibiza mu kigo Africa CDC, yavuze ko ibyo ari "kimwe mu bishobora kuba byarabayeho" ariko ashimangira ko nta sano (ihuriro) yari yagaragazwa.
Yabwiye abanyamakuru ati: "Kimwe mu bibazo turimo gukoraho iperereza ni uko hari ukuntu habayeho kuganira hagati y'abo bantu babiri kuri icyo kibuga cy'indege."
Uwo mugabo w'Umunya-Kenya yari yavuye muri DRC anyura muri Uganda, nyuma aza kugera i Nairobi ku itariki ya 3 Ukwakira. Yapfuye nyuma yaho gato, urupfu rwe ruba urwa mbere rubayeho muri Kenya rutewe na Ebola.
