Imvo n'imvano ku Barundi n'Abanyarwanda boherejwe kwiga i Burayi bagahitamo kwigumirayo

Mwaramukanye amahoro mwese muteze amatwi Imvo n'Imvano yo kuri uyu wa gatandatu tariki 10 z'ukwa 9 mu 2022. Kubera urupfu rw'Umwamikazi w'Ubwongereza Elizabeth wa Kabiri, watanze ejo bundi ku wa kane, byabaye ngombwa ko duhindura ikiganiro twari twabateguriye. Uyu munsi Imvo n'Imvano irabasubiriramo ikiganiro twabagejejeho kw'itariki ya 19 z'ukwezi kwa 5 mu 2018, ikiganiro twakoreye i Paris mu Bufaransa; aho twagiye kuvugana n'intiti z'abarundi n'abanyarwanda ku mpamvu zituma intiti zoherejwe kwiga i Burayi zihitamo kugumayo aho gutahuka. N'ubwo ibyo bihugu bikennye; kenshi birikokora bigatanga amafaranga menshi ku mashuri makuru ahenda y'i Burayi kugira abanegehugu babyo babone ubumenyi bwo hejuru bukenewe muri ibyo bihugu. Ariko aho gutahuka; zimwe muri izo ntiti zihitamo kuguma i Burayi iyo zirangije amashuri. 

Icyegeranyo cyasohowe n'umuryango mpuzamahanga urengera abimukira IOM ( International Organisation for Migrants ); cyavugaga ko Abanyafurika barenga ibihumbi 300 baminuje mu mashuri baheze hanze y'ibihugu byabo; muribo abagera ku bihumbi 30 bafite impamyabushobozi bya PHD. Icyo cyegeranyo kikavuga ko hari abadogiteri bagera ku bihumbi 20 baheze hanze y'ibihugu byabo muri Afrika kuva mu mwaka w'i 1990. Igihugu kiza kw'isonga mu bihugu by'Afrika ni Ethiopia; kigakurikirwa na Nigeria; icya gatatu kikaba Ghana. Icyo cyegeranyo kivuga ko buri mwaka Afrika itanga amadolari y'Amerika agera kuri miliyaridi 4 yo kwishyura impuguke zikabakaba ibihumbi 100 zivuye mu bihugu by'uburayi n'Amerika kuza kubafasha mu buhinga runaka. 

Leta y'u Burundi imaze kubona ko icyo kibazo kimaze kukibera ingorabahizi; mu mwaka w'i 2017 yafashe icyemezo gihagarika kwohereza abanyeshuri mu bihugu bimwe by'uburayi kubera igihombo cyabonaga buri mwaka. Urugero rufatika rutangwa na leta y'u Burundi n'igihugu cy'Ubufaransa aho u Burundi buvuga ko buhafite Abarundi bagera kuri 400 baje kwiga ariko barangije bigumira ino. Turavuga u Burundi; ariko icyo kibazo kiri no mu bindi bihugu bikennye birimo ndetse n'u Rwanda. 

Hari ubwo ndetse usanga bimwe muri ibyo bihugu byiyambaza abanyamahanga kandi bifite intiti zabyo zanangiye mu mahanga. Hari ababona ko izo ntiti zihitamo kuguma i Burayi ziba zaratatiye igihango ku bihugu byikokoye bikazitangaho akayabo k'amafaranga. Ariko se intiti ubwazo niko zibibona?

 Hari ababona ko izo ntiti ziri mu kuri kuko zidashobora kwikura amata mu kanywa kubera ko zihembwa neza; zigafatwa neza mu bihugu byazakiriye. Ese ibyo birimo ukuri? Niba ari ukuri hakorwa iki kugira ngo zitahuke? 

Ukuri kuri ibyo bibazo murakumva muri iki kiganiro natumiyemo zimwe muri izo ntiti.  

Iki cyari igice cya mbere cy'ikiganiro mwateguriwe kandi mwagejejweho na Felin Gakwaya