Qatar 2022: Cristiano Ronaldo yaciye umuhigo wo gutsinda igitego mu gikombe cy'isi cya gatanu

Shamoon Hafez

BBC Sport kuri Stadium 974, Doha

Cristiano Ronaldo yabaye umugabo wa mbere utsinze igitego mu bikombe by'isi bitanu ubwo Portugal yatangiraga imikino yayo muri iri rushanwa itsinda Ghana.

Ronaldo yari arimo gukina ku nshuro ya mbere nyuma y'ikiganiro cyateje impaka yagiranye na televiziyo cyo mu cyumweru gishize ndetse cyakurikiwe n'uko Manchester United yamwemereye kuyivamo, nyuma y'amagambo yavuze.

Uyu mukinnyi w'imyaka 37 yatsinze igitego cya mbere muri uwo mukino, yatsinze kuri penaliti ku munota wa 65, nyuma yo kugushwa mu rubuga rw'amahina na Mohammed Salisu, myugariro wa Ghana unakinira ikipe ya Southampton yo mu Bwongereza.

Ronaldo, kapiteni wa Portugal, mbere yari yagize amahirwe yo gutsinda, ariko ishoti ryo hasi rikurwamo n'umunyezamu wa Ghana Lawrence Ati-Zigi, ndetse hari n'umupira Ronaldo yateye n'umutwe awurenza izamu.

Uyu rutahizamu wa Portugal yanangiwe igitego kubera gusunika myugariro wa Ghana Alexander Djiku, mu gihe Ghana nta shoti yateye mu izamu mu gice cya mbere.

Ghana yisubiyeho mu gice cya kabiri ubwo André Ayew yinjizaga igitego cyo kwishyura ku munota wa 73.

Ariko Portugal yahise itsinda ibitego bibiri mu minota ibiri – ku wa 78 n'uwa 80 – bya João Félix, na Rafael Leão, wari umaze amasegonda yinjiye mu kibuga nk'umusimbura.

Osman Bukari yaje kwinjiza n'umutwe igitego cya kabiri cya Ghana cy'impozamarira, ku munota wa 89, ariko ibintu byashoboraga guhinduka ku munota wa cyenda w'inyongera – wari na wo wa nyuma – Ghana ikaba yanganya.

Umunyezamu wa Portugal Diogo Costa yashyize umupira hasi, asa nk'uwutabonye ko Inaki Williams ari inyuma ye, ariko nyuma yuko uyu rutahizamu wa Ghana yirutse ngo afate uwo mupira, yanyereye muri icyo gihe cyajyaga guhindura ibintu, ishoti atahamije neza rikurwamo ku murongo w'izamu.

Intsinzi ivuze ko Portugal ubu iyoboye itsinda H, nyuma yuko Uruguay na Koreya y'Epfo binganyije ubusa ku busa mu mukino wari wabaye mbere yaho kuri uwo munsi wo ku wa kane.