Ayavugwa mw’igura n’igurishwa ry’abakinyi: Felix, Fernandez, Bellingham, Tielemans, Moukoko

Arsenal yahawe amahirwe menshi yo gutahukana umusatirizi wa Portugal, Joao Felix w’imyaka 23, akina muri Atletico Madrid mu kwa mbere, ikaba icye imbere Paris St-Germain, Manchester United na Aston Villa. (Marca - in Spanish)

Hari “amahirwe menshi” ko Arsenal izoshobora kugura umukinyi wa Ukraine akina ku ruhande Mykhaylo Mudryk mu kwa mbere ku giciro kiri musi y’imiriyoni 86 z’amapawundi yasabwa na Shakhtar Donetsk kuri uno mukinyi w’imyaka 21. (Athletic)

Liverpool yashitse ku masezerano yo ku munwa na Benfica yo kugura umukinyi wo hagati wa Argentina Enzo Fernandez w’imyaka 21. (La Capital - in Spanish)

Fernandez ashobora kuronderwa na Real Madrid mu gihe vyokwanka ko igura umwongereza isanzwe irondera cane, Jude Bellingham w’imyaka 19, asanzwe akina muri Borussia Dortmund mu ci riza. (Sport)

Ishirahamwe ry’umupira w’amaguru ry’Ubwongereza, Football Association (FA), rishaka ko Gareth Southgate yobandanya amenyereza umurwi nserukiragihugu wabwo, n’aho imbere y’ihiganwa ry’igikombe c’isi yose bwerekanye ko bwashaka uwahoze amenyereza Chelsea Thomas Tuchel. (Bild)

FA izokwumviriza abanyamahanga bazoshaka kumenyereza umurwi nserukiragihugu w’Ubwongereza mu gihe Southgate yoramuka atanze imihoho muri ico kibanza. (Telegraph)

FA ibona ko umumenyereza wa Leicester City, umunya-Irlande du Nord Brendan Rodgers ari we ari imbere mu bashobora gusubirira Southgate –si Frank Lampard canke Steven Gerrard. (Star)

Brazil irashaka ko Carlo Ancelotti asubirira Tite nk’umumenyereza w’umurwi nserukiragihugu wayo inyuma y’aho uviriye mw’ihiganwa ry’igikombe c’isi, mu kw’icumi ikaba yaravuganye mu mpisho n’uyu mumenyereza wa Real Madrid. (UOL Esporte)

Leicester City iriteguye ko Arsenal isubira ikagerageza kurondera Youri Tielemans mu kwezi kuza imbere y’uko uyu Mubirigi w’imyaka 25 akina hagati yirebanga mu gihe amasezerano afitaniye n’uyo murwi arangira mu ci riza. (Mirror)

Chelsea yatanguye ibiganiro vyo kurondera umusatirizi w’Umudagi Youssoufa Moukoko w’imyaka 18, kugira yimukire muri uyo murwi ataco urinze gutanga avuye muri Borussia Dortmund mu kw’indwi. (Nicolo Schira)

Paris St-Germain iripfuza kugura Umufaransa akina ku ruhande Ousmane Dembele w’imyaka 25 akinira Barcelona. (El Nacional)

AC Milan iri mu biganiro vyo kwongereza amasezerano  n’umukinyi Rafael Leao asanzwe aronderwa na Chelsea hamwe na Manchester United, kandi “iratuje” mu cizere ko uyu musatirizi wa Portugal w’imyaka  23 azoshobora gutera igikumu ku masezerano mashasha. (Gazzetta dello Sport, iciye kuri Goal)

Manchester United igiye kunagura amasezerano y’uwahoze ari umunyegori wa Espagne David de Gea w’imyaka 32, umwongereza akina inyuma ku ruhande rw’ibubamfu Luke Shaw w’imyaka 27, hamwe n’umunya-Brezili akina hagati Fred w’imyaka 29, be kandi n’umusatirizi w’umwongereza Marcus Rashford w’imyaka 25, n’umunya-Portugal akina inyuma ku ruhande rw’I buryo Diogo Dalot w’imyaka 23. (Manchester Evening News)

Leeds United iriko iraraba ingene mu kwa mbere yoronka umudagi akina inyuma ku ruhande rw’ibubamfu  muri PSV Eindhoven , Philipp Max w’imyaka 29. (Football Insider)

Wilfried Zaha w’imyaka 30 aboneka ko ashobora kuva muri Crystal Palace atakirinze gusabwa mu gihe uyu munya- Côte d'Ivoire azoba arangije amasezerano yiwe mu ci riza. (Fabrizio Romano iciye kuri CaughtOffside)

Sevilla irashaka ko Isco w’imyaka 30 mu kwa mbere agenda,  inyuma y’amezi atanu gusa yinjiye muri uyu murwi avuye muri Real Madrid. (Marca)

Bayern Munich iri hafi yo kuronka umukinyi wo hagati wa Autriche Konrad Laimer w’imyaka 25 asanzwe akina muri RB Leipzig, ataco irinze gutanga kuko azoba yirebanga mu ci riza. (Fabrizio Romano)

Tottenham Hotspur iriteguye kugiriranira ibiganiro n’umumenyereza Antonio Conte muri ino ndwi mu ntumbero yo guha uno mutaliyano amasezerano mashasha y’igihe kirekire. (Athletic)

Uwahoze ari umumenyereza wa Barcelona na Roma Luis Enrique aripfuza gusubira mu kazi ko mu mirwi (clubs) inyuma y’aho atakarije akazi kiwe ko kumenyereza umurwi nserukiragihugu wa Espagne. (Sport)

Mauricio Pochettino yahoze amenyereza Tottenham na Paris St-Germain yabwiye abagenzi ko yipfuza ko igihe kimwe yoja kumenyereza Chelsea, mu gihe ikibanza coboneka. (Football Insider)

Amazon ni yo kompanyi yindi ivugwa ko yipfuza kugura Manchester United – ariko abahinga babona ko igiciro gisabwa n’aba Glazers c’imiriyaridi indwi z’amapawundi, ni ukuvuga imiriyaridi 9.8 z’amadorari y’abanyamerika, kireneye urugero. (Mail)

Aston Villa umumenyereza wa Unai Emery aripfuza kuzana muri Villa Park  umukinyi w’Ubuholande akina ku ruhande Arnaut Danjuma w’imyaka 25, hamwe n’umunya-Senegal akina hagati Nicolas Jackson w’imyaka  21, basanzwe bakina mu murwi wa Villarreal yahoze amenyereza. (Mirror)