Israel: Minisitiri w'ingabo yasabye Netanyahu guhagarika amavugurura mu butabera

Minisitiri w'ingabo wa Israel Yoav Gallant yasabye Minisitiri w'intebe Benjamin Netanyahu guhagarika gahunda itavugwaho rumwe yo kuvugurura urwego rw'ubutabera rw'iki gihugu.

Yabivuze mu gihe ku wa gatandatu Abanya-Israel badashaka izo mpinduka bakoze imyigaragambyo yitabiriwe n'imbaga mu bice bitandukanye by'igihugu, mu cyumweru cyayo cya 12 cyikurikiranya.

Gallant yaburiye ko aya makuba arimo guteza imvururu zo mu rwego rw'imibereho kandi ko ashobora kwangiza umutekano wa Israel.

Ariko kugeza ubu Netanyahu yanze kumvira abamusaba gukuraho ayo mavugurura.

Mu itangazo rigufi ryanyuze kuri televiziyo, Gallant yavuze ko iyo gahunda y'amavugurura ari "ibyago bigaragara by'aka kanya kandi bifatika ku mutekano wa Leta [ya Israel]".

Yavuze ko abasirikare ba Israel barakaye kandi bumva baratengushywe, kandi ko ibyo biri ku kigero cyo hejuru atari yarigeze abona.

Iryo tegeko rijyanye na gahunda yateje amakimbirane ya leta ya Israel yo kugabanya ububasha bw'urwego rw'ubutabera, yatumye ubu hashize amezi haba imyigaragambyo.

Ririmo nko gutuma inteko ishingamategeko yasesa ibyemezo by'urukiko rw'ikirenga - ibi abanenga leta bakaba bavuga ko bizabangamira ubwigenge bw'urwego rw'ubutabera kandi ko bishobora gukoreshwa ku nyungu za politiki.

Ariko Netanyahu avuga ko aya mavugurura agamije kubuza inkiko kurengera mu bubasha bwazo kandi ko aya mavugurura yatowe n'abaturage mu matora aherutse.

Amagambo ya Gallant yakiriwe neza n'umukuru w'abatavuga rumwe n'ubutegetsi Yair Lapid, washimye "intambwe y'ubutwari" y'uyu Minisitiri.

Ariko Minisitiri wa polisi Itamar Ben-Gvir, wo mu murongo wa politiki w'ibitekerezo by'ubuhezanguni, yashishikarije Netanyahu kwirukana uwo Minisitiri w'ingabo, avuga ko yagamburujwe n'igitutu cy'abatavuga rumwe n'ubutegetsi.

Mu yandi makuru, itegeko rishya, ryatowe ku wa kane ku majwi 61 kuri 47 y'abataritoye mu nteko ishingamategeko ya Israel (izwi nka Knesset) igizwe n'abadepite 120, nyuma y'impaka zamaze ijoro ryose, ribuza ko minisitiri w'intebe yatangazwa n'umushinjacyaha mukuru ko atagishoboye imirimo ye.

Rivuga ko minisitiri w'intebe wenyine cyangwa bitatu bya kane (3/4) by'abagize guverinoma ye ari bo bashobora gutangaza ko minisitiri w'intebe adashoboye imirimo ye ku mpamvu z'ubuzima bwo ku mubiri cyangwa mu bitekerezo.

Netanyahu arimo kuburana mu manza eshatu ku birego bya ruswa, uburiganya no kurenga ku cyizere. Ahakana ibyo aregwa akavuga ko nta kibi yakoze, ndetse ko arimo "kwibasirwa".