Ayavugwa mw’igura n’igurishwa ry’abakinyi: Messi, Cancelo, Vlahovic, Trossard, Sarabia, Danjuma

Umurwi wo muri Arabia Saudite Al Hilal, umukeba w’umurwi mushasha wa Cristiano Ronaldo Al Nassr, na wo uriko uriko urarondera umusatirizi wa Paris St-Germain umunya-Argentina Lionel Messi w’imyaka 35, ukaba wemera ko ushobora kumuhemba imiriyoni 300 z’amadorari y’abanyamerika ku mwaka. (Mundo Deportivo – mu ki espagnol)

Arsenal yasubiye mu rugamba rwo kurondera umusatirizi wa Juventus umunyaSerbia Dusan Vlahovic w’imyaka  22 akaba ari ku gaciro k’imiriyoni 110 z’ama-euro. (La Repubblica – mu gitaliyano)

Aba ba Gunners bemeye kwongereza amafaranga ku mukinyi wo ku ruhande wa Shakhtar Donetsk umunya-Ukraine Mykhaylo Mudryk w’imyaka 22, bakaba bariko baregereza ku masezerano. (Fabrizio Romano)

Tottenham iripfuza kugura Umubirigi akina ku ruhande Leandro Trossard w’imyaka 28 asanzwe akinira Brighton. (Evening Standard)

Imirwi yo muri Espagne, mu Bufaransa, mu Budagi no mu Butaliyano iriko irakurikiranira hagufi ingene ibintu bigenda ku mukinyi w’inyuma wa Portugal Joao Cancelo w’imyaka 28, inyuma y’aho atakarije umwanya wo gukina mu murwi wiwe wa Manchester City. (Telegraph)

Paris St-Germain yemeye igiciro gitangwa na  Wolves ku mukinyi wo hagati wa Espagne Pablo Sarabia w’imyaka 30. (AS – mu ki espagnol)

Amasezerano ya Leeds na Hoffenheim ku musatirizi w’umufaransa Georginio Rutter w’imyaka 20, azoba yababa imiriyoni 35 z’amapawundi – igiciro coba giciye umuhigo muri uyo murwi. (Sky Sports)

Everton iriko iraraba ko yogura abasatirizi babiri muri kuno kwezi. (Football Insider)

Besiktas iripfuza umusatirizi wa Wolves umunya-Mexique Raul Jimenez w’imyaka 31 kugira ngo ashobore gusubirira umusatirizi w’Ubuholande Wout Weghorst, w’imyaka 30 yiteguye kwimukira muri Manchester United. (Fotospor, iciye kuri  Metro)

Umusatirizi  w’Ubudagi Youssoufa Moukoko w’imyaka 18 aravugwa ko aronderwa na Newcastle United ariko yoba yiteguye gutera igikumu ku masezerano mashasha na Borussia Dortmund inyuma y’aho impande zompi zumvikaniye mu biganiro zarimwo. (Sky Germany)

Wolves iriko irakorera ku ngingo y’imiriyoni 44.4 z’amapawundi mu masezerano n’umusatirizi wa Brezili Matheus Cunha  w’imyaka 23 yatijijwe muri uno murwi avuye muri Atletico Madrid kugira ngo yimukire burundu muri uyo murwi. (Fabrizio Romano)

Brentford yashikirije icipfuzo umurwi Antalyaspor wo muri Turukiya ko yipfuza umusatirizi wayo, umunyamerika Haji Wright w’imyaka 24. (Tom Bogert)

Bournemouth irizeye ko izosubirana umukinyi wo hagati w’Ubuholande  Arnaut Danjuma w’imyaka 25 ubu asanzwe akinira Villarreal, ni mu gihe hari amakuru avuga ko Everton nayo nyene imwipfuza. (The Athletic)