Mu Bufaransa habaye ijoro 'rituje kurushaho' nubwo ubushyamirane bukomeje

Minisitiri w'ubutegetsi bw'igihugu yavuze ko Ubufaransa bwabayemo ijoro rituje kurushaho ry'imyigaragambyo, yatewe n'urupfu rw'umuhungu wishwe na polisi arashwe yegerewe.

Ijoro ryo ku wa gatandatu ryabayemo guta muri yombi abantu bacyeya – 719 – ugereranyije no mu majoro yabanje, ubushyamirane bukaze bwabereye i Marseille, mu majyepfo y'Ubufaransa.

Amashusho yagaragaje polisi ikoresha imyuka iryana mu maso muri uwo mujyi.

Ariko kuba rwagati mu murwa mukuru Paris hoherejwe abapolisi benshi, bigaragara ko byaciye intege imyigaragambyo yaho.

Mu butumwa bwo kuri Twitter, Minisitiri w'ubutegetsi bw'igihugu w'Ubufaransa Gérald Darmanin yashimye abashinzwe umutekano ku "gikorwa gihamye" cyabo cyatumye habaho "ijoro rituje kurushaho".

Mbere yaho ku wa gatandatu, imbaga y'abantu yitabiriye gusezera kuri Nahel M, Umufaransa ufite inkomoko muri Algeria wari ufite imyaka 17, wishwe ubwo yari atwaye imodoka ava aho yari yahagaritswe.

Uwo muhango wo kumusezeraho wabereye mu musigiti w'i Nanterre mu nkengero ya Paris.

Imijyi myinshi yo mu Bufaransa yabayemo akavuyo kuva ku wa kabiri, nyuma yuko ubwo bwicanyi bubaye i Nanterre.

Abategetsi bizeye ko ubu izi mvururu zishobora kuba zageze ahantu hagiye kuba impinduka – ko abigaragambya barimo gucika intege kubera ukuntu abashinzwe umutekano barimo kubahashya no kuba hatishimiwe ibikorwa byabo byo mu gihe bigaragambya.

Ariko kugeza ubwo andi majoro y'ituze azaba yemeje iyo mpinduka, nta muntu ukwiye kugira ibyo yibwira.

Abapolisi bagera ku 45,000 boherejwe mu bice bitandukanye by'igihugu ku wa gatandatu, mu ijoro rya kabiri hagabwe nk'abo.

Abantu barenga 1,300 batawe muri yombi mu ijoro ryo ku wa gatanu, naho abarenga 900 batawe muri yombi ku wa kane.

Nahel yarashwe nyuma yo kwanga guhagarara aho ibinyabiziga bihagarikirwa, apfa nyuma yuko serivisi z'ubutabazi bwihuse zari zimaze kuhagera.

Videwo, yahererekanyijwe ku mbuga za internet mu masaha yakurikiye urupfu rwe, yerekana abapolisi babiri bagerageza guhagarika imodoka ndetse umwe muri bo atunga intwaro ye ku mushoferi uyitwaye.

Umupolisi warashe isasu ryishe Nahel yamaze kuregwa kwica umuntu ku bushake ndetse yasabye imbabazi umuryango wa Nahel. Umwunganizi we mu mategeko yavuze ko umukiliya we byamubabaje cyane.

Urupfu rwa Nahel rwongeye kubyutsa impaka ku myitwarire ya polisi mu Bufaransa, harimo no ku itegeko ritavugwaho rumwe ryo mu 2017 ryemerera abapolisi kurasa igihe umushoferi arenze ku itegeko ryo guhagarara.

Muri rusange, urupfu rwe rwateje kwibaza ku ivanguramoko muri polisi y'Ubufaransa. Ibiro by'ishami ry'umuryango w'abibumbye ryita ku burenganzira bwa muntu byavuze ko izi mvururu ari amahirwe Ubufaransa bubonye yo "gukemura ibibazo byimbitse [bishinze imizi] by'ivanguramoko mu bashinzwe umutekano".

Perezida w'Ubufaransa Emmanuel Macron ku wa gatanu yamaganye urugomo "mu buryo bukomeye bushoboka", avuga ko urupfu rwa Nahel rwakoreshejwe nk'urwitwazo rwo gukora urugomo – avuga ko ari "ugukoresha kutakwihanganirwa kw'urupfu" rwa Nahel.