'Drone' y'ingabo z'u Rwanda yakoze impanuka ikomeretsa abanyeshuri

Ingabo z'u Rwanda (RDF) zivuga ko indege nto yazo y'intambara itajyamo umupilote (drone) yakoze impanuka ku wa kabiri ikomeretsa abantu batatu mu burengerazuba bw'igihugu.

Itangazo rya RDF rivuga ko "ikirere kitari kimeze neza" cyatumye iyo 'drone' yari irimo ikoreshwa mu myitozo ita inzira, ikorera impanuka mu karere ka Rutsiro.

RDF ivuga ko abakomeretse ari abanyeshuri batatu "bari bavuye ku ishuri bataha mu rugo". Yavuze ko babiri bajyanwe kuvurirwa ku kigo nderabuzima cya Kivumu, naho uwa gatatu ajyanwa kuvurirwa ku bitaro bya Murunda – hombi ho muri ako karere.

RDF ntiyatangaje ubwoko bw'iyo 'drone' yakoze impanuka saa saba n'iminota mirongo ine (13:40) z'amanywa.

Ni bwo bwa mbere igisirikare cy'u Rwanda gitangaje ko 'drone' yacyo yakoze impanuka ku butaka bw'u Rwanda.

Urubuga rw'amafoto rw'ingabo z'u Rwanda rutangaza ko muri Nyakanga (7) mu mwaka wa 2016 ari bwo abategetsi bo mu nzego z'umutekano batangiye gukora amahugurwa ku izanwa rya 'drone' mu kirere cy'u Rwanda.

RDF ivuga ko yihanganishije imiryango y'abo bana bakomeretse kandi ko ibabajwe n'"ibibazo batewe n'iyi mpanuka".

Ingabo z'u Rwanda zongeyeho ko zirimo gufatanya n'inzego z'ubuyobozi bw'ibanze hamwe n'abaganga kugira ngo abo bana bari kwa muganga "bahabwe ubuvuzi bukwiye".

RDF yanavuze ko itanga "ubufasha bukenewe haba ku bana no ku miryango yabo".