Trump arashinja ishyaka Labour riri ku butegetsi mu Bwongereza 'kwivanga' mu matora y'Amerika

Itsinda rishinzwe kwamamaza Donald Trump ryatanze ikirego mu kanama k'amatora rishinja ishyaka rya Labour riri ku butegetsi mu Bwongereza "ukwivanga kw'amahanga ku mugaragaro" mu matora yo muri Amerika, ribinyujije mu guha imfashanyo abashinzwe kwamamaza Kamala Harris na Tim Walz wamubera visi perezida.

Icyo kirego gisubiramo inkuru zo mu bitangazamakuru zivuga ku kuvugana hagati y'ishyaka rya Labour n'abashinzwe kwamamaza Harris, hamwe n'ibigaragara ko ari ibikorwa by'ubukorerabushake. Icyo kirego kivuga ko ibyo ari "imisanzu" inyuranyije n'amategeko.

BBC yumva ko impirimbanyi zo muri Labour zirimo kwamamaza mu matora ya perezida muri Amerika zirimo kubikora ku giti cyazo.

Ishyaka rya Labour nta gisubizo ryari ryatangaza ku mugaragaro.

By'umwihariko, icyo kirego gisubiramo amakuru yo mu kinyamakuru avuga ko abantu bafite aho bahuriye na Labour bagiye muri Amerika kwamamaza Harris.

Ayo makuru, ni ko icyo kirego kivuga, atuma habaho kugera ku "mwanzuro ushyize mu gaciro ko ishyaka rya Labour ryatanze, ndetse abamamaza Harris barayemera, imisanzu y'igihugu inyuranyije n'amategeko ivuye mu mahanga".

Iyo baruwa ikubiyemo ikirego ikomoza ku nkuru y'ikinyamakuru the Washington Post ivuga ko habayeho guhanahana amakuru hagati y'impande zombi ndetse ko abategetsi bo ku rwego rwo hejuru bahuye mu ibanga.

Ikindi, icyo kirego gisubiramo ubutumwa bwo ku rubuga nkoranyambaga rwa LinkedIn aho umukozi wa Labour yavuze ko abarwanashyaka n'abahoze ari abarwanashyaka ba Labour "hafi 100" bazerekeza muri leta z'urugamba (z'isibaniro mu matora) muri Amerika.

Ubwo butumwa, bwatangajwe na Sofia Patel, umuyobozi ushinzwe ibikorwa bya Labour, bwongeyeho ko "imyanya" 10 ihari ndetse "tuzakumenyera aho kuba".

Bigaragara ko ubwo butumwa bwamaze gusibwa.

Icyo kirego kigereranya gahunda mpuzamahanga yo mu mwaka wa 2016 ubwo ishyaka rya Labour ryo muri Australia, cyangwa ALP mu mpine y'Icyongereza, ryoherezaga intumwa gufasha mu bikorwa byo kwamamaza Bernie Sanders.

Ariko icyo gihe, ishyaka ALP ryarishye ingendo z'indege n'amafaranga y'imibereho ya buri munsi. Iryo shyaka n'itsinda ryari rishinzwe kumwamamaza, buri ruhande rwahawe igihano cyo mu rwego mbonezamubano cyo kuriha amadolari y'Amerika 14,500.

Ingendo z'impirimbanyi zo muri Labour ntizateguwe cyangwa ngo ziterwe inkunga n'iryo shyaka, nkuko byumvikana mu bategetsi bo muri iryo shyaka.

Amategeko y'akanama k'amatora k'Amerika (FEC) avuga ko abanyamahanga bemerewe kuba abakorerabushake mu bikorwa byo kwamamaza igihe cyose batabihemberwa.

Bifatwa ko ari ibintu bisanzwe ku bategetsi bo mu mashyaka bo mu Bwongereza kugirana ibiganiro na bagenzi babo bo muri Amerika.

Na mbere byabayeho hagati y'ishyaka rya Conservative ryo mu Bwongereza n'abo mu ishyaka ry'abarepubulikani ryo muri Amerika.

BBC yasabye itsinda rishizwe kwamamaza Harris na Walz kugira icyo ribivugaho, kugeza ubu ntirirasubiza.