Li Qiang: Ubushinwa bwatoye inshuti ya Xi Jinping nka Minisitiri w'intebe
Ahavuye isanamu, AFP via Getty Images
- Umwanditsi, George Wright
- Igikorwa, BBC News
- Yatangajwe
Umugabo watanzwe nk'umukandida na Perezida w'Ubushinwa Xi Jinping ku mwanya wa Minisitiri w'intebe yatowe ku mugaragaro n'inteko ishingamategeko.
Li Qiang, wahoze ari umukuru w'ishyaka rya gikomunisiti mu mujyi munini w'Ubushinwa wa Shanghai, ubu agiye kuyobora guverinoma, akaba asimbuye Li Keqiang ugiye mu kiruhuko cy'izabukuru.
Uyu mugabo w'imyaka 63, yabonye hafi buri jwi ry'intumwa zirenga 2,900 zitabiriye inama nkuru y'inteko ishingamategeko.
Iyi nshuti ikomeye ya Perezida Xi ibonwa nk'umuntu w'ibitekerezo byo kureba igishoboka mu ngiro ndetse azahabwa inshingano yo kuzahura ubukungu bw'iki gihugu burimo guhura n'ibibazo.
Indi myanya y'abagize guverinoma yitezwe gutangazwa kuri iki cyumweru.
Nta banyamakuru bari bemerewe kugera muri icyo cyumba ubwo ayo matora yabaga mu nama y'inteko ishingamategeko y'Ubushinwa, yemeza gusa ibyemezo byamaze gufatwa nta cyo ihinduyeho. Habayeho gukomera amashyi Xi ubwo yatoraga.
Li - ubu wabaye umutegetsi wa kabiri ukomeye muri politiki y'Ubushinwa - yabonye amajwi 2,936 yose hamwe, intumwa eshatu gusa zikaba ari zo zitamutoye naho izindi ntumwa umunani zirifata.
Nuko ararahira, arahirira kuzubahiriza itegekonshinga ry'Ubushinwa no "gukorana umurava mu kwubaka igihugu cya gisosiyalisiti gikomeye kijyanye n'igihe, kirimo uburumbuke..., kirimo demokarasi, gifite umuco, gishyize hamwe ".
Li yari umukuru w'ibiro bya Xi mu myaka ibanza yo mu 2000, ubwo Xi yari umukuru w'ishyaka riri ku butegetsi mu ntara ya Zhejiang.
Mu mwaka wa 2017 ni bwo Li yagizwe umunyamabanga w'ishyaka riri ku butegetsi mu mujyi wa Shanghai.
Mu gihe cy'icyorezo cya coronavirus, yayoboye igikorwa kitajenjetse cya guma mu rugo cy'i Shanghai, iyo guma mu rugo ikaba yaratumye bamwe mu bahatuye bagorwa no kubona ibiribwa n'ubuvuzi.
Abaye Minisitiri w'intebe mu gihe ku wa gatanu Xi yabonye manda ya gatatu, yanditse amateka, nka Perezida w'Ubushinwa.
Perezida Xi yashimangiye ubutegetsi bwe, mu gihe Ubushinwa burimo kongera gufungura imiryango buva muri gahunda ikaze ye yo kutagira umuntu n'umwe urwaye Covid. Iyo gahunda yateje imyigaragambyo yo kwamagana leta.
Ubushinwa kandi bwugarijwe n'ikibazo cy'igabanuka ry'ikigero cy'imbyaro, riteje inkeke kuri moteri yabwo y'ubukungu.
Iyi nama nkuru y'inteko ishingamategeko na nyunguranabitekerezo y'ishyaka riri ku butegetsi yo muri iki cyumweru, irimo gukurikiranirwa hafi kuko itanga ishusho ku cyerekezo cy'Ubushinwa cyo mu myaka iri imbere
Kuva ku gihe cy'ubutegetsi bwa Mao Zedong, abategetsi bo mu Bushinwa bagiye batarenza manda ebyiri ku butegetsi.
Ubwo izo manda ntarengwa zahindurwaga kuri Xi mu mwaka wa 2018, byamuhinduye umutegetsi ukomeye ku kigero kitari cyarigeze kibaho mu Bushinwa kuva kuri Mao.
