Inzego z'umutekano muri Irani ziheruka kwibasira abanyeshuri kuri kaminuza
Ahavuye isanamu, Reuters
Muri Irani haraye habaye imyigaragambyo y'urugomo kuri kaminuza ikomeye i Tehrani, mu gihe abamagana guverinoma bakomeza gukwira mu gihugu.
Amakuru aravuga ko umubare munini w'abanyeshuri benshi kuri kaminuza yigisha iby'ikoranabuhanga [Sharif University of Technology] bari bagotewe ahaparikwa imodoka hari hazengurutswe n'inzego z'umutekano.
Videwo imwe yerekanye abanyeshuri basa n'abiruka bahunga mu gihe amasasu yavuzaga ubuhuha.
Imyigaragambyo yamagana guverinoma yadutse ku itariki ya 17 z'ukwa Cyenda, nyuma y'urupfu rw'umukobwa wari watawe muri yombi na polisi ishinzwe imyitwarire.
Avuga bwa mbere kuri ibi bintu, umutegetsi w'ikirenga Ayatollah Ali Khamenei yasobonuye urupfu rwa Mahsa Amini nk''ikintu gisharira' "cyababaje umutima wanjye bikomeye".
Ariko yamaganye imyigaragambyo yakwiriye igihugu avuga ko yateguwe na Leta Zunze Ubumwe za Amerika na Isiraheli, "kimwe n'abandi bakozi babo bishyurwa, ndetse n'ubufasha bw'abagambanyi b'abanya Irani baba mu mahanga".
Amini w'imyaka 22 wo mu bwoko bw'aba Kurde, yataye ubwenge [kugwa muri koma] amasaha macye nyuma y'uko abapolisi mu murwa mukuru bamushinje kurenga ku mabwiriza ategeka abagore gupfuka imisatsi n'igitambaro cyitwa hijab cyangwa furari yo mu mutwe. Yapfiriye mu bitaro nyuma y'iminsi itatu.
Umuryango we uvuga ko abapolisi bamukubise indembo mu mutwe kandi bagahonda umutwe we ku modoka zabo. Polisi yavuze ko nta kimenyetso cyerekana ko yafashwe nabi kandi ko yagize ihagarara ritunguranye ry'umutima.
Imyigaragambyo yatangiriye mu muhango wo kumushyingura inakwira mu gihugu hose ihinduka imyigaragambyo minini ikomeye ibaye mu gihugu mu myaka myinshi ishize.
Ku Cyumweru wari umunsi wa mbere w'igihembwe ku banyeshuri bo mu mwaka wa mbere kuri Sharif University of Technology.
Ikinyamakuru Mehr kiri ku murongo w'ubutegetsi by'igice cyavuze ko abanyeshuri bagera kuri 200 bahuriye kuri kaminuza ku Cyumweru nyuma ya saa sita batangira kuririmba indirimbo zirimo izivuga ngo "umugore, ubuzima, ubwisanzure" n'"abanyeshuri bahitamo urupfu aho kuba agasuzuguro".
Ikinyamakuru cyavuze ko mu gihe imyigaragambyo yakomezaga, indirimbo zahindutse izikarishye zinibasira ubutegetsi bw'idini.
Urugomo rwadutse nyuma ya saa sita, igihe inzego z'umutekano zageraga kuri kaminuza.
Mehr cyavuze ko abagize urwego rw'umutekano barashe ibyuka biryana mu maso batera bamwe mu banyeshuri guhungira muri imwe muri parking ya kaminuza.
Iyi nkuru irimwo ivyatanzwe na X. Dukeneye uruhusha rwawe imbere yuko bigushikira, kuko birashobora kuba bikoresha cookies hamwe n'ubundi buhinga. Wobanza ugasoma aha X amategeko agenga cookie n'ayagenga ubuzima bwite imbere yuko wemera. Kugira ubibone hitamwo 'emera hanyuma ubandanye'.
Impera ya X ubutumwa, 1
Iyi nkuru irimwo ivyatanzwe na X. Dukeneye uruhusha rwawe imbere yuko bigushikira, kuko birashobora kuba bikoresha cookies hamwe n'ubundi buhinga. Wobanza ugasoma aha X amategeko agenga cookie n'ayagenga ubuzima bwite imbere yuko wemera. Kugira ubibone hitamwo 'emera hanyuma ubandanye'.
Impera ya X ubutumwa, 2
BBC ntibazwa ibivuye ku zindi mbuga
Muri videwo imwe yashyizwe ku rubuga nkoranyambaga, itsinda ry'abantu baboneka bagerageza guhunga banyuze muri parking ariko bakurikiranwa n'inzego z'umutekano ku mapikipiki.
Indi yerekana abantu biruka ari nako abari kuri moto babasingira mu muhanda. Amasasu arumvikana, ndetse n'indirimbo zivuga ngo "urupfu kuri Khamenei".
Umuryango w'uburenganzira bwa kiremwamuntu muri Irani ukorera muri Leta Zunze Ubumwe za Amerika wavuze ko videwo ya gatatu yerekana "uwigaragambya yatawe muri yombi ari gukururwa umutwe we wose upfutswe n'imyenda" n'abagize inzego z'umutekano babiri bari kuri moto, umwe muri bo arekura urusoro ku mugore wari uri gufata amashusho.
Amakuru yavuze ko abanyeshuri benshi bakubiswe cyangwa bakaraswa amasasu atica, abandi nka 30 cyangwa 40 bagatabwa muri yombi.
Ikinyamakuru cya leta Irna, cyavuze ko ituze ryagarutse nyuma y'uko minisitiri wa siyansi Mohammad Ali Zulfigol yagiriye kuri kaminuza kuvugana n'abanyeshuri ndetse n'inzego z'umutekano.
Mehr cyavuze ko amasomo kuri kaminuza yahagaritswe ku wa Mbere agashyirwa ku buryo bw'iyakure [online] "kubera ibintu bimaze iminsi no kurinda abanyeshuri".
Amajoro abiri ashize yaranzwe n'ikara ry'imyigaragambyo i Tehrani ndetse no mu yindi mijyi myinshi n'ubwo hari izamuka ry'impfu.
Ku Cyumweru, Iran Human Rights, umuryango uharanira uburenganzira bwa kiremwamuntu ukorera muri Norvege, wavuze ko abantu 133 bamaze kwicwa n'inzego z'umutekano kugeza ubu.
Barimo abigaragambyaga 41 b'impirimbanyi zo mu bwoko bw'aba Baluch , uwo muryango wavuze ko bapfiriye mu gukozanyaho mu majyepfo y'uburasirazuba bw'umujyi wa Zahedan ku wa gatanu.
Abategetsi basezeranyije gukarira abatera "akajagari", bavuga ko babishishikarizwa n'abanzi ba Irani bo mu mahanga.
