Umupira w'Igikomangomakazi Diana waguzwe arenga miliyoni $1 muri cyamunara

Umupira wo kwambara w'Igikomangomakazi Diana uriho ishusho y'intama y'umukara iri hagati y'amashusho yandi y'intama z'ibara ry'umweru, wagurishijwe miliyoni 1.14 y'amadolari y'Amerika (miliyari 1,3Frw) muri cyamunara yakoreshejwe na kompanyi Sotheby's i New York.

Gupiganirwa uwo mupira muri cyamunara byari byatangiye ku itariki ya 31 Kanama (8) uyu mwaka, ndetse igiciro cyo hejuru cyari cyakomeje kuba munsi y'amadolari y'Amerika 200,000, kugeza gihindutse mu minota ya nyuma ya cyamunara.

Kompanyi Sotheby's yagereranyaga ko agaciro k'uwo wiswe "umupira w'intama" kari kuba hagati y'amadolari y'Amerika 50,000 na 80,000.

Iyo kompanyi ntiyahishuye umwirondoro w'uwegukanye uwo mupira.

Uwo mupira usanzwe, uboshye mu budodo, watahuwe mu gice cy'inzu cyo munsi y'igisenge mu kwezi kwa Werurwe (3) uyu mwaka, waguzwe ku giciro cyo hejuru kurusha ibindi bikoresho byinshi bifite aho bihuriye n'uyu wari uzwi nk'"Igikomangomakazi cya Rubanda" (cyangwa "People's Princess"), byagurishijwe muri za cyamunara mu myaka ya vuba aha ishize.

Imodoka ya Diana, yo mu bwoko bwa Ford Escort, ishobora kuba ari yo yayingayinze uwo mupira ku giciro, mu mwaka wa 2022 yaguzwe amadolari y'Amerika 806,000 (miliyoni 974Frw).

Umusaraba wo mu ijosi Diana yakundaga kwambara wa Attallah uriho umutako wo mu ibuye ry'agaciro rya amethyst, mu kwezi kwa Mutarama (1) uyu mwaka waguzwe muri cyamunara n'Umunyamerika w'icyamamare ku mbuga nkoranyambaga akaba n'umukinnyi wa filime, Kim Kardashian, ku giciro kingana hafi na kimwe cya gatanu (1/5) cy'igiciro cy'uwo mupira wo kwambara.

Kardashian yaguze uwo musaraba ku madolari y'Amerika 203,000 (miliyoni 245Frw).

Imiterere y'uwo mupira akenshi ivugwa ko ari ikimenyetso cy'umwanya Diana afite mu muryango w'Ubwami bw'Ubwongereza.

Ariko abanyamateka mu bijyanye n'imyambarire bemeza ko Diana nta butumwa yari arimo gutanga mu kwambara uwo mupira, nkuko bishoboka ko yatangaga ubutumwa mu myaka ya nyuma y'ubuzima bwe ubwo yambaraga ikanzu yamenyekanye cyane, izwi nk'"ikanzu yo kwihimura" (cyangwa "revenge dress").

Abo banyamateka bavuga ko nta butumwa Diana yatangaga ubwo yambaraga uwo mupira mu mwaka wa 1981, habura ukwezi ngo ashakane n'uwari icyo gihe Igikomangoma Charles.

Ahubwo benshi bavuga ko Diana yambaye uwo mupira bijyanye n'imyambarire (style) izwi nka "Sloane Ranger" yafashije mu kumenyekanisha.

Kompanyi Sotheby's ivuga ko mu gihe cya mbere y'umwaduko w'abavuga rikumvwa bo ku mbuga nkoranyambaga (social media influencers), amafoto yo mu binyamakuru ya Diana yambaye uwo mupira, yatumye uruganda rwawukoze, Warm and Wonderful, rutangirana "imbaraga nyinshi cyane" ndetse biba intandaro y'indi mipira ikoze mu buryo bwo kuwigana.

Nyuma gato y'ubukwe bwe, ingoro y'Ubwami bw'Ubwongereza, Buckingham Palace, yandikiye uruganda Warm and Wonderful irumenyesha ko uwo mupira wangiritse kandi ko ishaka ko usanwa cyangwa igahabwa uwo kuwusimbura. Nuko mu 1983 Igikomangomakazi Diana yambara umupira wo gusimbura uwo wundi.

Muri iyo cyamunara, kompanyi Sotheby's yashyize hamwe n'uwo mupira iyo baruwa yandikiwe uruganda Warm and Wonderful, n'ubutumwa bw'icyo gihe bwo kurushimira ku mupira wo gusimbura uwangiritse.

Kompanyi Sotheby's yanakoresheje intoboro nto yo kuri uwo mupira nk'icyemezo cyo kwerekana ko ari uw'umwimerere.