Izindi nkweto za Michael Jordan zaguzwe ku muhigo wa miliyoni $2.2

Inkweto za siporo zigeze kwambarwa n’icyamamare muri Basketball Michael Jordan zaguzwe $2.2m (2,215,000,000 Frw) muri cyamunara, bizigira inkweto zihenze cyane zigeze zigurishwa.

Izi nkweto zisinyeho – inzu y’ubucuruzi Sotheby's yari yateganyije ko zizagurwa hagati ya miliyoni $2 na $4 – ni zimwe mu bintu Jordan yatunze bihenze cyane byagurishijwe.

Mu 2022 isengeri (jersey) yambaye ku mikino ya 1998 NBA Finals yaguzwe muri cyamunara kuri miliyoni $10.

Uku kugurisha kwabaye kuwa kabiri gushimangira umwanya wa Jordan nk’umukinnyi w’agaciro ko hejuru cyane mu myambaro ya siporo yo hambere.

Brahm Wachter umwe mu bakozi bakuru ba Sotheby's ati: “Umuhigo w’uyu munsi wongeye gushimangira ko isoko ry’ibyakoreshejwe na Michael Jordan rikomeje kurenga ibiba byitezwe byose.”

Umuhigo waherukaga w’inkweto zahenze za Jordan ni iza Nike Air Ships zaguzwe miliyoni $1.47 mu 2021.

Air Jordan XIIIs zaguzwe kuwa kabiri Jordan yazambaye ku mukino wa nyuma wa shampiyona ya NBA ya 1997-98 ari kumwe na Chicago Bulls.

Jordan yari yambaye izo inkweto za nimero 13 (US) ubwo yatsindaga amanota 37 mu mukino wa kabiri wa 1998 NBA Finals, wagejeje Bulls ku ntsinzi y’amanota 93 kuri 88 ya Utah Jazz.

Bulls yarakomeje itwara igikombe cy’uwo mwaka, inkuru ivugwa muri ‘documentary’ y’uruhererekane yo mu 2020 "Last Dance" ku mwaka wa nyuma w’imikino Jordan ari kumwe na Bulls.

Cyari igikombe cya gatandatu cya NBA kuri Jordan n’inshuro ya gatanu yari atowe nk’umukinnyi wa NBA warushije abandi (Most Valuable Player)

Akimara gutsinda uwo mukino, izi nkweto Jordan yazihaye umwana w’umuhungu wari mu rwambariro nko kumushimira ko yabonye ijaketi bari barabuze, nk’uko Sotheby's ibivuga.

Izi nkweto z’umutuku n’umukara nizo nkweto zonyine zambawe na Jordan ku mikino ya nyuma ya NBA zagenzuwe zikemezwa ko ari umwimerere, nk’uko Sotheby's.

Jordan yambaye bwa mbere inkweto za Air Jordan mu 1984 mu mwaka we wa mbere ari muri Chicago Bulls

Izi nkweto zatangiye kugurishwa rubanda mu mwaka wakurikiyeho. Uyu munsi, inkweto z’amoko arenga 30 za Air Jordan zarakozwe kandi ziri mu zigurishwa cyane ku isi.

Jordan yatwaye ibikombe bitandatu bya NBA, imidari ibiri olempike ya zahabu n’ibindi bihembo byinshi.

Yemerwa cyane nk’umwe mu bakinnyi bakomeye b’ibihe byose babayeho ku isi.