Cleo Smith: Agakobwa k'imyaka 4 kamaze ibyumweru karabuze kabonetse muri Australia

Umukobwa w'imyaka ine umaze iminsi 18 abuze mu cyaro mu burengerezuba bwa Australia yabonetse ari muzima kandi ameze neza mu nzu ikinze, nk'uko polisi ibivuga.

Cleo Smith yavuye mu ihema ry'umuryango we ahantu abakerarugendo baca ingando hafi y'umujyi wa Carnarvon tariki 16 z'ukwezi kwa 10, hahise hatangira ibikorwa bikomeye byo kumushakisha.

Umugabo w'imyaka 36 yafashwe arafungwa kandi ari kubazwa ibibazo.

Polisi yinjiye ku ngufu mu nzu iri mu mujyi wa Carnarvon mu masaha ya kare cyane kuwa gatatu, nyuma y'uko ibonye amakuru.

Mu itangazo, Col Blanch komiseri wungirije wa Western Australia Police yagize ati: "Basanze ka Cloe muri kimwe mu byumba.

"Umwe mu bapolisi yaramuteruye aramubaza ati 'witwa nde?' Aramusubiza ati 'Nitwa Cleo'."

Aka gakobwa kongeye guhuzwa n'ababyeyi bako, bari barakomeje gusaba binginga ko Cleo yagarurwa.

Ku rubuga rwa Instagram, nyina, Ellie Smith, yanditse ati: "Umuryango wacu uruzuye nanone."

Mu gihe bamukuraga aho yari ari, amashusho atarerekanwa y'igipolisi, yerekana Cleo "aseka, nk'uko twari tubyiteze mu bintu nk'ibi", nk'uko bivugwa na komiseri wa polisi Chris Dawson, wongeyeho ko yahise abanza kwitabwaho n'abaganga.

Abategetsi bavuze ko umugabo ufunze ubusanzwe nta huriro afitanye n'umuryango wa Smith. Nta kintu araregwa.

Inzu Cleo bamusanzemo iherereye mu rugendo rw'iminota itandatu n'imodoka uvuye iwabo i Carnarvon, umujyi muto utuwe n'abantu bagera ku 5,000.

Minisitiri w'Intebe wa Australia Scott Morrison yavuze ko ari "amakuru meza cyane, aruhura."

Komiseri Dawson ati: "Ndatekereza ko Australia iri mu byishimo. Kubona uyu mwana w'umukobwa, nyuma y'iminsi 18, birumvikana ko abantu batekerezaga ibibi cyane. Ariko banizeye ko atabuze burundu."

Ni iki kizwi kugeza ubu?

Umuryango wa Cleo wari mu ijoro rya mbere ryo guca ingando mu kiruhuko ahitwa Quobba Blowholes ubwo bamuburaga hagati ya 01:30 na 06:00 z'igitondo tariki 16 z'ukwezi gushize kwa 10.

Aha hantu h'icyaro muri Macleod ni muri 900Km mu majyaruguru y'umujyi munini wa Perth, ni ahantu h'ubukerarugendo kandi ku nyanja.

Cleo yari aryamye mu ihema ku mufariso iruhande rwa mushiki we mutoya. Mu gihe nyina, wari uryamye mu kindi cyumba cy'ihema, yabyukaga mu gitondo yasanze Cleo yagiye n'umuryango w'ihema ufunguye.

Polisi yavuze ko ikeka ko yashimuswe, kandi na nyina ntiyashidikanyaga ko Cleo atakwivana mu ihema wenyine ngo agende.

Itsinda ry'abapolisi 100 ryoherejwe rivuye i Perth gufasha ibikorwa byo gushaka byifashishije indege zabugenewe, imodoka n'amato.

Abategetsi bashyizeho igihembo cya miliyoni imwe y'Amadorari ya Australia (750,000,000Frw) ku muntu watanga amakuru y'aho Cleo ari.

Kubura kwe kwaravuzwe cyane, ndetse bivugwa ko iki gihembo kimaze gutangazwa hari abantu ku giti cyabo bazi gushakisha abantu bagiyeyo kuyakorera.

Polisi ivuga ko yashakishije buri kantu kose gato cyane k'amakuru yabageza ku hantu Cleo ari.

Komiseri Blanch yabwiye Network Seven ati: "Bitinze cyane mu ijoro ryacyeye nibwo abapolisi babonye akantu gato kabagejeje aho hantu bavanayo Cleo".

ABC News ivuga ko umugabo uba muri iyo nzu mu minsi ishize hari umuturanyi wamubonye agura udukoresho two kubinda abana.

Uwo muturanyi ati: "Ntabwo twacyetse uwo yariho abigurira."

Nta muntu uzwi watanze amakuru afatika yagejeje kuri Cleo. Polisi ivuga ko ibona ko nta muntu uzaza gusaba kiriya gihembo.