Canada: Mitingi ya Justin Trudeau yaburijwemo kubera imyigaragambyo y'abarakaye

Justin Trudeau byabaye ngombwa ko aburizamo mitingi ijyanye no kwiyamamaza mu matora nyuma yuko abigaragambya barakaye batambamiye icyo gikorwa.

Minisitiri w'intebe wa Canada yari yitezweho kugeza ijambo ku bamushyigikiye mu mujyi wa Bolton mu ntara ya Ontario, ariko icyo gikorwa kiburizwamo kubera impungenge ku mutekano.

Abigaragambya babarirwa muri za mirongo bateraniye ahari kubera iyo mitingi batera hejuru bavuga amagambo arimo imvugo nyandagazi, mbere yuko Bwana Trudeau atangira kuvuga.

Uyu Minisitiri w'intebe wo mu ishyaka ry'aba Liberal, yizeye kubona ubwiganze mu matora yahamagaje mbere y'igihe muri uku kwezi.

Ariko mu minsi micye ishize ibikorwa bye byo gushakisha amajwi byakomwe mu nkokora n'imyigaragambyo yamagana inkingo za Covid-19 n'ingamba zashyizweho na leta.

Muri mitingi yo ku wa gatanu, imodoka ya bisi y'ibikorwa bye byo kwiyamamaza byabaye ngombwa ko iherekezwa na polisi, nyuma yuko icyo gikorwa kiburijwemo kimaze gucyerererwaho amasaha abiri.

Bwana Trudeau, w'imyaka 49, yavuze ko iyo myigaragambyo igaragaza ukuntu iki cyorezo cya Covid-19 cyakomereye buri muntu wese.

Yagize ati: "Twese twagize umwaka ugoye. Bariya bantu bari mu myigaragambyo, na bo bagize umwaka ugoranye, ndetse nzi kandi ndumva uburakari bwabo, kubihirwa, wenda n'ubwoba".

Yavuze ko mitingi ye yaburijwemo kuko abayiteguye batashoboraga kwizeza ko umutekano w'abayitabira ubungwabungwa.

Ku itariki ya 15 y'uku kwezi kwa munani ni bwo Bwana Trudeau yahamagaje amatora, mu gihe amakusanyabitekerezo yagaragazaga ko ishyaka rye ridafite ubwiganze muri guverinoma ryari riri hafi kubugeraho.

Abanya-Canada bazatora ku itariki ya 20 y'ukwezi kwa cyenda, imyaka ibiri mbere y'igihe amatora yari asanzwe ateganyijwe kuberaho.

Mu kwezi kwa cumi mu 2019, abatora bamutoye atari ku bwiganze bw'amajwi, bivuze ko iki gihe cyose gishize yacyeneye kwisunga amashyaka atavuga rumwe n'ubutegetsi ngo amufashe gutambutsa gahunda ze.

Amashyaka atavuga rumwe n'ubutegetsi yanenze abo mu ishyaka rye rya Liberal kubera guhamagaza ibikorwa byo kwiyamamaza by'ibyumweru bitanu muri iki gihe cy'inkubiri nshya y'icyorezo cya Covid-19, bavuga ko ari ku "nyungu ya politiki" gusa.