Australia – Covid: Umujyi wa Brisbane wagiye muri guma mu rugo kubera kwiyongera kw'ubwandu butewe na Delta

Abanya-Australia bandi babarirwa muri za miliyoni ubu bari muri gahunda ya guma mu rugo kubera ubwoko bwa Covid bwa Delta bwandura byihuse cyane bukomeje gukwirakwira.

Abategetsi bashyizeho guma mu rugo y'iminsi itatu mu bice by'amajyepfo ashyira uburasirazuba byo muri leta ya Queensland, birimo n'umujyi wa gatatu mu bunini muri Australia wa Brisbane.

Yatangiye saa kumi z'umugoroba (16h) ku isaha yaho kuri uyu wa gatandatu, ni ukuvuga saa mbili za mu gitondo (8h) ku isaha yo mu Rwanda no mu Burundi.

Iki ni cyo gice cya vuba aha cya Australia gisubijeho ingamba zo gutuma hagabanywa ubwandu bwa Covid.

Abanya-Australia batageze kuri 15% ni bo bamaze gukingirwa Covid byuzuye.

Abategetsi bo muri Queensland batangaje abantu batandatu bashya banduye Covid muri iyo leta, bose bafite aho bahuriye n'umunyeshuri wo mu ishuri ryisumbuye basanzemo Covid ku wa kane.

Dr Jeannette Young, muganga mukuru wa leta ya Queensland, yabwiye abanyamakuru ko barimo gushakisha abagize aho bahurira n'abo basanzemo Covid, avuga ko atekereza ko hari "umubare munini w'ahagize ahahurira na bo" muri Brisbane.

Madamu Jeannette yagize ati: "Niba hari umuntu uwo ari we wese ugaragaza ibimenyetso na bicye, iki ni cyo gihe - ugomba kwigaragaza ugapimwa aka kanya".

Ingamba zafashwe muri Queensland ni zo za mbere zikakaye zibayeho muri iyi leta kugeza ubu.

Abantu bemerewe gusa kuva mu ngo bagiye kugura ibicuruzwa bya ngombwa cyangwa gukora akazi k'ingenzi cyane, gukora siporo cyangwa bagiye kwivuza.

Ibi bibaye hashize umunsi abategetsi bohereje abasirikare babarirwa mu magana mu mujyi munini w'iki gihugu wa Sydney ngo bagenzure ishyirwa mu bikorwa rya gahunda ya guma mu rugo muri uwo mujyi.

Ingamba z'i Sydney zizagumaho kugeza nibura ku itariki ya 28 y'ukwezi kwa munani.

Kuri uyu wa gatandatu, leta ya New South Wales - irimo umujyi wa Sydney - yapfushije undi muntu ndetse igira abantu 210 bashya banduye Covid, nyuma y'ibyumweru bitanu bya guma mu rugo. Ku wa gatandatu ushize, polisi yafunze abigaragambyaga babarirwa muri za mirongo bamaganaga izo ngamba.

Amakuru avuga ko abategetsi ba New South Wales batangaje ko bagiye kohereza i Sydney doze z'inkingo za Covid iyo leta yari isanzwe yaragenewe, ikohereza inkingo zibarirwa mu bihumbi za mirongo ku banyeshuri bo mu mashuri yisumbuye yo muri uwo mujyi kugira ngo kwigisha imbonankubone bishobore gusubukurwa.

Minisitiri w'intebe wa Australia Scott Morrison akomeje kunengwa kubera ibikorwa by'ikingira bigenda buhoro muri iki gihugu.

Ku wa gatanu, Bwana Morrison yatangaje ko igihe 70% by'abaturage ba Australia bazaba bamaze gukingirwa, guma mu rugo zizarushaho kujya zishyirwaho gusa mu turere tumwe na tumwe bibayemo ngombwa.

Yavuze ko yemera ko iki gihugu gishobora kuba cyageze kuri iyo ntego bitarenze mu mpera y'uyu mwaka wa 2021.