Christiane Amanpour: Umunyamakuru wa CNN avuga ko arwaye 'cancer' y'agasabo k'intanga-ngore
Ahavuye isanamu, Getty Images
Umunyamakuru wa CNN utangaza ibiganiro Christiane Amanpour yatangaje ko kwa muganga bamusanzemo kanseri y'agasabo k'intanga-ngore (ovarian cancer).
Amanpour, w'imyaka 63, yabwiye abakurikira CNN ko "yakorewe igikorwa gikomeye cyagenze neza cyo kugakuramo [ako gasabo]", ubu akaba agiye kumara amezi menshi ari ku buvuzi bw'icyuma cya 'chemotherapy'.
Uyu munyamakuru umaze igihe muri uyu mwuga, yabitangarije muri 'studio' iri mu rugo iwe i London, nyuma y'ibyumweru bine byari bishize atagaragara kuri televiziyo.
Amanpour yamaze imyaka ibarirwa muri za mirongo atara amakuru mu bice bitandukanye ku isi, ku bibazo bitandukanye birimo nk'intambara n'andi makuba.
Mu byo yatangaje ku wa mbere, yavuze ko yabivuze nk'uburyo bwo "gukomeza [abandi] baherutse kuyisangamo [iyo kanseri]".
Amanpour yakomoje ku kuba abantu babarirwa muri "za miliyoni" ku isi barwaye iyo kanseri y'agasabo k'intanga-ngore.
Ashishikariza abagore kwihugura kuri iyo ndwara, kwipimisha mu buryo buhoraho no "gutuma impungenge zawe ku buzima zifite ishingiro zitirengagizwa cyangwa ngo zigabanywe".
Kanseri y'agasabo k'intanga-ngore iragoye kuyitahura kubera ko ibimenyetso byayo - nko kugira inda ibyimbye cyangwa kubabara mu nda - biba byoroshye kubyitiranya n'ibindi bibazo byoroheje by'ubuzima.
Ni yo kanseri ya karindwi abagore benshi barwara ku isi, nkuko bivugwa n'ikigo cy'isi cy'ubushakashatsi kuri kanseri. Akenshi iyi kanseri yica uyirwaye, kandi ni yo ya munani ku isi mu guteza impfu mu bagore.
Amanpour yavuze ko afite icyizere ku ho uburwayi bwe burimo kwerekeza, avuga ko ari umunyamahirwe kuba afite ubwishingizi mu buvuzi (mutuelle), "bufashijwe n'abahanga bo muri NHS [urwego rw'ubuvuzi rw'Ubwongereza]".
Uyu munyamakuru wegukanye ibihembo mu mwuga we, arateganya kujya atangaza ikiganiro cye kuva ku wa mbere kugeza ku wa gatatu buri cyumweru, mu gihe agiye kumara amezi avurirwa kuri 'chemotherapy', nkuko CNN yabitangaje.
Anafite ibindi byumweru bitatu by'ikindi gihe cyari gisanzwe giteganyijwe ko azaba atari ku kazi, nkuko CNN yakomeje ibitangaza.
Uyu munyamakuru ufite ubwenegihugu bw'Ubwongereza n'ubwa Iran, atangaza ikiganiro gikurikirwa cyane cyo kuri CNN kivuga ku ngingo zitandukanye ku isi, akanatangaza ikindi kiganiro nijoro mu minsi y'imibyizi kuri televiziyo PBS na yo yo muri Amerika.
