Israel – Gaza: Umutegetsi wo muri Hamas yiteze agahenge 'mu munsi umwe cyangwa ibiri'

Umutegetsi wo hejuru wo mu mutwe wa Hamas yavuze ko yiteze ko Israel n'intagondwa zo muri Gaza bagera ku masezerano y'agahenge "mu munsi umwe cyangwa ibiri" iri imbere, mu gihe ibitero byambukiranya umupaka bikomeje.

Ariko ku wa gatatu Minisitiri w'intebe wa Israel Benjamin Netanyahu yavuze ko "ashishikariye gukomeza" kugeza "ituze n'umutekano bigarutse ku baturage bose ba Israel".

Kugeza mu gitondo cyo kuri uyu wa kane, habayeho ibitero birenga 100 by'indege za Israel ku bikorwa-remezo bya Hamas mu majyaruguru ya Gaza.

Intagondwa z'Abanye-Palestine zihimuye zirasa ibisasu bya rokete muri Israel.

Imirwano muri Gaza yatangiye hashize ibyumweru hiyongera ubushyamirane hagati ya Israel na Palestine mu gace kigaruriwe na Israel k'uburasirazuba bwa Yeruzalemu.

Ubwo bushyamirane bwagejeje ku gukozanyaho kwabereye ahantu hafatwa nk'ahatagatifu ku bayisilamu n'abayahudi.

Hamas, igenzura Gaza, yatangiye kurasa za rokete nyuma yo kuburira Israel ngo ive aho hantu, bituma Israel yihimura ikoresheje ibitero by'indege.

Abantu batari munsi ya 227, barimo abagore barenga 100 n'abana, bamaze kwicirwa muri Gaza kugeza ubu, nkuko minisiteri y'ubuzima yaho ibivuga.

Israel yavuze ko intagondwa zitari munsi ya 150 ziri muri abo biciwe muri Gaza. Hamas ntabwo itanga umubare w'abarwanyi bayo bapfuye.

Muri Israel, abantu 12, barimo abana babiri, bamaze kwicwa kugeza ubu, nkuko urwego rw'ubuvuzi rubivuga. Israel ivuga ko rokete zigera ku 4.000 zarashwe n'intagondwa zo muri Gaza zerekezwa ku butaka bwayo.

Umutegetsi wo muri Hamas yavuze iki nyirizina?

Moussa Abu Marzouk, umutegetsi wo mu rwego rwa politiki wa Hamas, yabwiye televiziyo Al Mayadeen yo muri Liban (Lebanon) ati: "Ntekereza ko ibikorwa bikomeje bijyanye n'agahenge bizagera ku musaruro.

"Niteze ko agahenge kagerwaho mu munsi umwe cyangwa ibiri iri imbere, kandi agahenge kazaba gashingiye ku bwumvikane ku mpande zombi".

Avuze ayo magambo mu gihe igitutu cy'amahanga gikomeje kwiyongera kuri Israel n'intagondwa z'Abanye-Palestine ngo basoze imirwano.

Umutegetsi wo mu rwego rw'umutekano mu Misiri yabwiye ibiro ntaramakuru Reuters ko impande zombi urebye zemeranyijwe ku gahenge nyuma y'ubufasha bw'abahuza, ariko ko ibiganiro bigikomeje.

Ku wa gatatu, Perezida w'Amerika Joe Biden yaganiriye kuri telefone na Bwana Netanyahu, ku nshuro ya kane kuva iyi mirwano yatangira.

Itangazo ryasohowe n'ibiro bye bya White House rigira riti: "Perezida yagejeje kuri minisitiri w'intebe ko yiteze uguhosha gukomeye uyu munsi kwerekeza ku gahenge".

Ukugerageza kwa vuba aha guheruka kw'akanama k'umutekano k'umuryango w'abibumbye ko kugera ku mwanzuro usaba agahenge, kwatangijwe n'Ubufaransa, kwarananiwe ku wa gatatu, ubwo Amerika yavugaga ko gushobora "kubangamira ibikorwa byo guhosha [imirwano]".