Rwanda – Rusesabagina: Ku basaba Kagame kumufungura, ati 'Nkeka ko batazi ibyabaye cyangwa babyirengagiza'

Mu cyumvikanye nk'igisubizo kigenewe umwe mu bagize inteko ishingamategeko y'Amerika uherutse kumusaba gufungura Paul Rusesabagina "aka kanya", Perezida w'u Rwanda Paul Kagame yavuze ko "abo bantu bandika amabaruwa batazi ibyabaye cyangwa babyirengagiza".

Bwana Kagame yabivuze mu kiganiro n'abanyamakuru kuri uyu wa mbere cyabaye mu buryo bw'iyakure mu kwirinda Covid-19, nyuma yo kugeza ku Banyarwanda ishusho yuko igihugu gisoje uyu mwaka gihagaze, avuga ko ari "neza" bijyanye n'iki cyorezo cyibasiye isi.

Mu cyumweru gishize, Depite Carolyn Maloney wo mu ishyaka ry'abademokarate, yatangaje kuri Twitter ibaruwa avuga ko yandikiye Perezida Kagame amusaba kurekura Rusesabagina kandi akamusubiza muri Amerika.

Minisitiri w'ubutabera Johnson Busingye yari yamusubije ko "ubucamanza bw'u Rwanda bwigenga".

Rusesabagina n'umuryango we bavuga ko yashimuswe - ibyo u Rwanda ruhakana, ndetse umuryango we ukavuga ko nta butabera wizeye ko azahabwa.

Mu kiganiro cya none, Bwana Kagame yavuze ko ibya Rusesabagina "rwose bitari bikwiye kuba ikibazo gikomeye... ikibazo cyari gikwiye kumvikana neza" kuko "ibijyanye n'iki kibazo birasobanutse".

Ariko, yavuze ko atatunguwe no kwandikirwa iyo baruwa, abisanisha na bamwe barezwe kugira uruhare muri jenoside aho abo mu miryango yabo batemeraga ko benewabo baba baragize urwo ruhare.

Ati: "Ndabizi neza ko hari abantu baganiriye n'uyu mugabo [Rusesabagina]... Siniteze ko bazamenya uruhande rubi ry'uyu mugabo".

Bwana Rusesabagina yamenyekanye cyane nyuma yo gushingirwaho filime 'Hotel Rwanda' y'abemeje ko yabarokoye muri jenoside. Ashinjwa ibyaha by'iterabwoba bishingiye ku bitero by'umutwe FLN w'impuzamashyaka MRCD yari akuriye.

Yemereye urukiko ko ari mu bashinze uwo mutwe ariko ngo utagamije iterabwoba.

Bwana Kagame yavuze ko ari akazi ka za leta, amategeko n'abategetsi gukemura ibibazo, batuma "ubutabera bugerwaho...atari gusa kureba ku ruhande rwa Rusesabagina, ariko no ku ruhande rw'ababuze ababo..."

Ati: "Dufite umuhate ukomeye wo kugera ku butabera, aho [uruhande] ubutabera bwatuganisha aho ari ho hose".

Urubanza rwa Rusesabagina rwahujwe n'imanza z'abandi bo muri MRCD. Biteganyijwe ko rutangira kuburanishirizwa hamwe ku itariki ya 26 y'ukwezi kwa mbere.

Umuryango we na wo watanze ikirego mu rukiko rwo muri Amerika ushinja kompanyi y'indege GainJet gukorana n'u Rwanda mu kumushimuta.