Covid-19: Andi makuru; B.Johnson yayikize, Nicaragua, Ububiligi, Burundi, kwambara ‘mask’...

Minisitiri w'intebe w'Ubwongereza bamupimye basanga nta Covid-19 ikiri mu mubiri we, ejo yahise avanwa mu bitaro nk'uko umuvugizi wa guverinoma abivuga.

Uyu mugabo ubu yagiye 'gutora mitende' ari iwe mu rugo, akaba atarasubira mu mirimo ye y'ubutegetsi.

Uburayi buracyazahaye ariko imibare isa n'itanga ikizere

Hashize iminsi imibare y'abandura n'impfu izamuka cyane, ariko ubu iyo mibare iri kumanuka bigatanga ikizere ko ingamba zo kubuza abantu kuva mu ngo zabo ziri gutanga umusaruro.

Uretse Amerika, Ubutaliyani nibwo bufite imibare minini, hafi 20,000 barapfuye gusa imibare iheruka yerekana ko ubwandu buri kugabanuka.

Muri Espagne abo yishe ubu bagera ku 17,500 - ni iya gatatu mu bihugu. Abamaze kwandura barasatira 170,000 ariko naho imibare y'abandura iri kugabanuka.

Mu Bubiligi abapfa bari kwiyongera

Uyu munsi kuwa mbere, imibare y'abashinzwe ubuzima ivuga ko hamaze gupfa abantu 303, bose hamwe ubu bamaze kugera ku 3,903, mu gihe umuntu wa mbere yishwe n'iyi virus tariki 11 z'ukwezi gushize.

Iyo mibare irimo n'abaguye mu nzu zifasha abageze muzabukuru bikekwa ko bafite coronavirus, ariko bitabaye ngombwa ko bapimwa.

Nubwo imibare ya hano iboneka nkaho ari micye ugereranyije n'ibindi bihugu mu Burayi, Ububiligi bufite abaturage miliyoni 11,5 mu gihe Ubudage bufite abaturage miliyoni 83 ariko hamaze gupfa abantu bagera ku 3,000.

Bivuze ko ugereranyije n'umubare w'abatuye ibihugu, Ububiligi buri hafi y'Ubutaliyani na Espagne mu kwibasirwa n'iki cyorezo. Abantu 30,000 bamaze kubonwaho iyi virus mu Bubiligi.

Nicaragua baraburirwa mu gihe ubuzima bukomeje

Ejo ku cyumweru habonetse amafoto y'abantu benshi bari muri 'festival', ndetse n'abari kuri stade kureba imikino ya shampiyona.

Muri iki gihugu hamaze kuboneka abantu icyenda(9) banduye Covid-19 ndetse umwe yaramuhitanye.

Igitandukanyije iki gihugu n'ibindi mu karere kirimo ni uburyo ubutegetsi buri gufata iki cyorezo.

Mu gihe mu bihugu bituranye hafashwe ingamba zo kubuza abantu guhura no gufunga imipaka, visi perezida w'iki gihugu Rosario Murillo yabwiye abaturage "gutuza bagakomeza ibyabo uko bisanzwe".

Rosario Murillo niwe uyoboye ishyaka riri ku butegetsi akaba na visi perezida.

Yungirije umugabo we Daniel Ortega w'imyaka 74, uheruka kuboneka tariki 12 z'ukwezi gushize, ntabwo bizwi neza niba ubuzima bwe bumeze neza.

Ikigo Pan-American Health Organization cyatangaje ko gitewe impungenge n'uburyo Nicaragua yifashe imbere y'iki cyorezo.

Impungenge nk'izi kandi zatanzwe n'imiryango itandukanye ku Burundi aho imbere mu gihugu naho ubuzima busanzwe bukomeje.

Ejo ku cyumweru habonetse amafoto y'abantu bakoraniye mu nsengero ari benshi bizihiza umunsi wa Pasika, muri iki gihugu hamaze kuboneka abantu batanu banduye iki cyorezo.

Kwambara 'mask' bishobora kuba ibihoraho

David Nabarro umuvugizi w'itsinda rya OMS/WHO ryashinzwe kurwanya Covid-19 avuga ko kwambara udukoresho turinda amazuru n'umunwa bishobora kuzaba ibya buri gihe.

Yabwiye BBC ko abantu bagomba gutangira kumenyera ubuzima bushya bwo kubana n'iyi virus bayirinda.

Ati: "Iyi virus ntaho izajya. Ntabwo tuzi niba abanduye iyi virus umubiri wabo utongera kuyandura, kandi ntituzi igihe urukingo rwayo ruzabonekera.

"Uburyo bwose bwo kurinda mu maso nzi neza ko bugiye kuba ihame. Ntekereza ko bizaba kubera ibyo nita guhora twiteguye Covid-19."