Umuryango w'umuherwe Mohammed Dewji washimuswe muri Tanzaniya washyizeho igihembo

Umuryango w'umuherwe Mohammed Dewji wo muri Tanzaniya washimuswe, uvuga ko uzaha igihembo cya miliyari y'amashilingi ya Tanzaniya - ni ukuvuga amadolari y'Amerika agera ku bihumbi 440 - umuntu uzatanga amakuru yatuma aboneka.

Azim Dewji, se wabo wa Bwana Dewji, yabitangarije mu kiganiro n'abanyamakuru cyabereye mu mujyi wa Dar es Salaam kuri uyu wa mbere.

Ni bwo bwa mbere abo mu muryango w'uyu muherwe bari bagize icyo batangaje ku mugaragaro nyuma y'iminsi ine Bwana Dewji ashimuswe n'abitwaje imbunda.

Se wabo yavuze ko yizeye ko icyo gihembo kizafasha mu iperereza rya polisi.

Yagize ati:

"Twebwe [umuryango wa Dewji] turashaka kwizeza buri wese waba ufite amakuru y'aho umuhungu wacu yaba ari ko yaza akayatumenyesha kandi tuzayagira ibanga."

Bwana Dewji w'imyaka 43 y'amavuko, yatangajwe n'ikinyamakuru Forbes ko ari we Munyafurika ukiri muto cyane mu myaka utunze miliyari kandi ko ari we Munyatanzaniya wenyine utunze amafaranga abarirwa muri miliyari.

Yashimuswe ku wa kane w'icyumweru gishize n'abagabo bane bipfutse mu maso, imbere y'inzu ikorerwamo imyitozo ngororangingo yo kuri hoteli iri mu gice gituwe n'abifite cya Oysterbay, ubwo yari agiye mu myitozo ngororangingo ya mugitondo nk'uko bisanzwe.

Polisi ya Tanzaniya yataye muri yombi abantu 30 icyeka kugira uruhare muri icyo gikorwa, ikaba yemeza ko iryo shimuta ryari riyobowe n'abazungu babiri.

Ikinyamakuru Forbes cyatangaje ko Bwana Dewji, uzwi muri Tanzaniya nka Mo, afite umutungo ubarirwa muri miliyari imwe na miliyoni 500 z'amadolari y'Amerika

Ni we muyobozi mukuru wa kompanyi MeTL - kompanyi y'umuryango we yatangijwe na se mu myaka ya 1970.

Bwana Dewji washimuswe, ashimirwa kuba ari we wayigejeje ku rwego iriho rwa kompanyi yo ku rwego rw'Afurika ifite agaciro kabarirwa muri za miliyari.

Abategetsi ntibaratangaza icyateye ishimutwa rye.