Coronavirus: Mu Bufaransa habonetse 'umurwayi wa mbere wari warayanduye mu kwezi kwa 12'
Ahavuye isanamu, AFP
Umurwayi basanzemo indwara y'ibihaha hafi y'umurwa mukuru Paris tariki 27/12/2020 umuganga wamuvuye yatangaje ko ubu basanze ahubwo yari afite coronavirus.
Dr Yves Cohen yavuze ko igipimo bamufashe icyo gihe cyasuzumwe muri iyi minsi kikagaragaza ko uyu murwayi yari afite Covid-19.
Uwo ni umugabo w'ikigero cy'imyaka 50, akaba yarakize, we yavuze ko atazi uburyo yaba yaranduye iyo ndwara kuko icyo gihe atari yarigeze agera mu gace ivugwamo.
Aya makuru asobanura ko bishoboka ko iyi virus yaba yarageze mu Bufaransa ukwezi kumwe mbere y'igihe bizwi ko yahagereye.
Kugeza ubu, abantu batatu ba mbere bemejwe ko banduye coronavirus babonetse mu Bufaransa tariki 24 z'ukwezi kwa mbere.
Muri abo, babiri muri bo bari baherutse i Wuhan mu Bushinwa aho iki cyorezo cyabonetse bwa mbere, uwa gatatu yari uwa hafi wo mu muryango wabo.
Dr Cohen umuyobozi w'ishami ryo kuvura indembe mu bitaro bya Avicenne and Jean-Verdier hafi ya Paris yabwiye televiziyo BFMTV ko aherutse gusubira mu bipimo byafashwe abantu baje barwaye ibicurane mu kwezi kwa 12 n'ukwa mbere.
Avuga ko icyo gihe yasuzumye amatembabuzi yo mu mazuru y'abarwayi 14.
Ati: "Duherutse kongera gusuzuma ibyo bipimo tugerageza gukurikirana coronavirus. Ku bipimo by'abarwayi 14, igipimo kimwe nicyo twayisanzemo.
"Twagipimye izindi nshuro ebyiri ngo twizere neza ko nta kwibeshya. N'izo nshuro cyaje kibyemeza".
Dr Cohen avuga ko yahise abimenyesha urwego rwa leta rushinzwe iby'ubuzima, ndetse asaba abandi bahanga mu bya virus gusubiramo ibipimo biri mu bitaro byabo bashakisha Covid-19.
Uyu muganga avuga ko raporo irambuye kubyo yabonye izatangazwa muri International Journal of Antimicrobial Agents mu mpera z'iki cyumweru.
