Coronavirus: Mu Rwanda habonetse abrwayi bashya 10, bose bageze kuri 70
Ahavuye isanamu, Getty Images
Minisiteri y'ubuzima mu Rwanda yatangaje ko umubare w'abanduye icyorezo cya coronavirus wiyongereyeho abarwayi 10 kuri iki cyumweru, bose hamwe babaye 70.
Iyi minisiteri ivuga ko abo barimo batandatu bahageze baturutse i Dubai, babiri bahageze baturutse muri Afurika y'epfo, umwe wahageze aturutse muri Nigeria - abo bose bakaba barahise bashyirwa mu kato.
Hakiyongeraho n'undi murwayi umwe wakoreye ingendo zitandukanye mu bihugu by'Afurika y'iburasirazuba, na we wahise ushyirwa mu kato.
- CORONAVIRUS: Yavuye he, ifata ite, yakwirindwa gute?
- IBINDI BIBAZO WIBAZA KURI IKI CYOREZO: Ibi ni bimwe mu bisubizo
- UMUBIRI UYIRWANYA GUTE: Abahanga bamenye uko bigenda
- DUSABWA KWIRINDA KWIKORA MU MASO: Twabigenza dute?
- WABA URI MU RUBYIRUKO? OMS ivuga ko utakwirara
- KWISHYIRA MU KATO: Ni ryari? Bikorwa gute? Bitanga iki?
Muri aka karere u Rwanda nirwo rufite umubare munini w'abanduye iki cyorezo, imbere ya Kenya(42), Uganda(33), Tanzania(14), mu Burundi na Sudani y'Epfo nta murwayi barahabona.
Minisiteri y'ubuzima yongeraho ko bose bari kuvurirwa ahantu habugenewe kandi bari koroherwa, ndetse benshi ubu ngo nta bimenyetso bya coronavirus bakigaragaza.
Mu cyumweru gishize, minisitiri w'ubuzima mu Rwanda Dr Daniel Ngamije yatangaje ko muri iki cyumweru hari abarwayi bashobora gusezererwa ibipimo nibigaragaza ko nta virus bagifite.
Mu Rwanda batangiye icyumweru cya kabiri cy'ibihe bidasanzwe aho abantu baguma mu ngo zabo kereka mu gihe cya ngombwa cyane gusa.
Leta y'u Rwanda, kuva kuwa gatandatu yatangiye guha ibiribwa imiryango ikennye cyane yagizweho ingaruka n'izi ngamba zo kwirinda coronavirus.
