ထောင်တွင်းကိုဗစ်ကူးစက်ခံထားရတဲ့ ဒေါက်တာအောင်မိုးညိုအခြေအနေမိသားစု မသိရ

တိုက်ရိုက် ထုတ်လွှင့်ချက်

1. ၆ သြဂုတ် ၂၀၂၁ရွှေတြိဂံနယ်မှာ ကွာရန်တင်း ရက်ရှည်ဝင်နေရတဲ့မြန်မာရွှေ့ပြောင်းလုပ်သားတွေ ဆန္ဒပြနေ

   မြန်မာ၊ ထိုင်း၊ လာအို ၃ နိုင်ငံနယ်စပ် လာအိုအပိုင်ထဲက ရွှေတြိဂံနယ်မြေထဲက ကွာရန်တင်းစင်တာတွေမှာ လနဲ့ချီနေထိုင်နေရတဲ့မြန်မာအလုပ်သမားရာချီ ဒီနေ့ သြဂုတ်လ ၆ ရက်နေ့လည်မှာ ဆန္ဒပြနေကြပါတယ်။

   ကွာရန်တင်းစင်တာတွေထဲက တစ်ခုဖြစ်တဲ့ စျေးသစ်က ၆ ထပ်အဆောက်အအုံတွေမှာ နေထိုင်တဲ့ မြန်မာရာချီဆန္ဒပြနေတာဖြစ်တယ်လို့ အဲဒီက ရွှေ့ပြောင်းလုပ်သားတစ်ဦးကပြောပါတယ်။

   ''ထမင်းလာပို့တာ နောက်ကျရာကနေ စတယ်လို့ ကျတော် ထင်တယ်။ ထမင်းက လာအို စံတော်ချိန် နေ့လည် ၁ နာရီခွဲမှာမှရောက်လာတယ်။ အခုတော့ မြန်မာဘက်က ကိုယ်စားလှယ်အုပ်ချုပ်ရေးမှူးသဘောမျိုးပုဂ္ဂိုလ်က ကြားဝင် ဖြေရှင်းပေးနေတယ်။'' လို့ အဲဒီလုပ်သားက ပြောပါတယ်။

   လက်ရှိမှာ လူစုလူဝေးနဲ့ဖြစ်နေလို့ လူစုခွဲဖို့ သက်ဆိုင်ရာလာအိုရဲတပ်ဖွဲ့ဝင်တချို့နဲ့ ရဲကားတွေအပြင် မီးသတ်ကား ၃ စင်းထက်မနည်းလည်း အခင်းဖြစ်တဲ့နေရာကို ရောက်နေပါတယ်။

   ရွှေတြိဂံရောက်မြန်မာလုပ်သားရာတွေဟာ ကိုဗစ်ပိုးတွေ့တယ်ဆိုပြီး အဲဒီက ကွာရန်တင်းစင်တာတွေမှာ လနဲ့ချီနေနေရတာ၊ အစားအသောက်ချို့တဲ့တာတွေအပြင် နေထိုင်ရတာ တင်းကျပ်တဲ့အခြေအနေရှိတယ်ဆိုပြီး အဲဒီက ရွှေ့ပြောင်းလုပ်သားတွေက ဘီဘီစီကို အစောပိုင်းမှာ ပြောထားဖူးပါတယ်။

2. ၆ သြဂုတ် ၂၀၂၁အစ္စလာမ်ပရဟိတအသင်းတွေက ကိုဗစ်ဆက်စပ်ပစ္စည်းတွေကို ဘာ့ကြောင့်ဈေးလျှော့ရောင်းနေလဲ

   ပြည်တွင်းဈေးကွက်ထဲ ကိုဗစ်နဲ့ဆက်စပ်ပစ္စည်းတွေ ဈေးနှုန်းအဆမတန်မြင့်တက်နေတာရှိတာကြောင့် အများပြည်သူအဆင်ပြေစေဖို့ ပြင်ပဈေးထက်၊ ထက်ဝက်ခန့်လျော့ကျတဲ့ဈေးနှုန်းတွေနဲ့ ရောင်းချပေးနေတာလို့ ရန်ကုန်၊ ဒေါပုံမြို့နယ်က နွယ်အေးစွန္နီဂျာမေဗလီလူမှုကူညီရေးအသင်း တာဝန်ရှိသူကပြောပါတယ်။

   လက်ရှိပြည်တွင်းဈေးကွက်မှာ ဈေးနှုန်းမြင့်တက်နေတဲ့ အောက်ဆီဂျင်တိုင်းကိရိယာတစ်ခုဖြစ်တဲ့ Oximeter နဲ့အောက်ဆီဂျင်အိုးနဲ့တွဲဖက်သုံးရတဲ့ Flow Meter ပစ္စည်းတွေကို ရန်ကုန်မြိုမှာရှိတဲ့ ဒေါပုံမြို့နယ် နွယ်အေးစွန္နီဂျာမေဗလီလူမှုကူညီရေးအသင်းကဦးဆောင်ပြီး တစ်နိုင်ငံလုံးကဗလီတွေမှာ ရောင်းချပေးနေတယ်လို့သိရပါတယ်။

   "အဓိက လျော့ဈေးနဲ့ရောင်းတာကတော့ ပြည်သူတွေမရှိမဖြစ်လိုအပ်တဲ့ ပစ္စည်းတွေကို မတန်တဆဈေးတင်ရောင်းနေတာကိုတိုက်ဖျက်ဖို့ဖြစ်ပါတယ်။ ကုန်သည်စီးပွားရေးလုပ်ငန်းရှင်ဆိုတာ အမြတ်လိုချင်တာကိုသိပါတယ်။ဒါပေမဲ့ ထိုက်သင့်တာထက်အမြတ်ယူရင်တော့ ကျွန်တော်တို့အတူတူတိုက်ဖျက်ရမှာဖြစ်ပါတယ်"လို့ ဒေါပုံမြို့နယ် နွယ်အေးစွန္နီဂျာမေဗလီလူမှုကူညီရေးအသင်းက ကိုဇော်မင်းလတ်ကပြောပါတယ်။

   ကိုဗစ်တတိယလှိုင်း ကာလမှာငွေကျပ် သုံးသောင်းကျော်ဝန်းကျင်ထိဈေးမြင့်တက်ခဲ့တဲ့ အောက်ဆီဂျင်တိုင်းကိရိယာဖြစ်တဲ့ Oximeter ကို ငွေကျပ်ခြောက်ထောင်နဲ့ရောင်းချပေးနေတာပါ။

   နောက် ငွေကျပ်တစ်သိန်းဝန်းကျင်ထိ ဈေးမြင့်ခဲ့တဲ့ အောက်ဆီဂျီအိုးနဲ့တွဲဖက်သုံးတဲ့ Flow Meter ကိုတော့ ကျပ်သုံးသောင်းနဲ့ရောင်းချပေးနေတယ်လို့သိရပါတယ်။

   တခါ အောက်ဆီဂျင်အိုးတွေကို အစ္စလာမ်သာသနာရေးအသင်းကဦးဆောင်ပြီး ပြည်ပကနေ တင်သွင်းနေလို့ ပြင်ပပေါက်ဈေးထက် ထက်ဝက်ခန့်လျော့ကျတဲ့ဈေးနှုန်းနဲ့ရောင်းချပေးမယ်လို့လည်းပြောဆိုထားပါတယ်။

3. ၆ သြဂုတ် ၂၀၂၁ရန်ကုန်မှာ မီးသတ်တပ်ဖွဲ့က ပိုးသတ်ဆေးဖြန်း

4. ၆ သြဂုတ် ၂၀၂၁မန္တလေးက အာဏာရှင်ဆန့်ကျင်ရေးလူထုလှုပ်ရှားမှုကို စစ်ကောင်စီက ဘယ်လိုဖြိုခွဲထိန်းချုပ်ဖို့ လုပ်နေလဲ။

   စစ်တပ်က အာဏာသိမ်းပြီးကတည်းက လူထုလှုပ်ရှားမှုနဲ့ဆန္ဒပြမှုတွေ အစောဆုံးစတဲ့ မန္တလေးမြို့မှာ ကျောင်းသားလူငယ်အများစုပါတဲ့ အာဏာရှင်ဆန့်ကျင်ရေးဆန္ဒပြပွဲတွေ နေ့စဉ်နီးပါး ထွက်ပေါ်နေဆဲဖြစ်ပါတယ်။

   အခုတာ့ စစ်ကောင်စီဘက်က လူထုလှုပ်ရှားမှုတွေကို အင်အားလျော့အောင် ပုံစံပြောင်း ဖြိုခွင်းဖို့ ပြင်ဆင်နေတယ်လို့ ကျောင်းသားတစ်ဦးက ပြောပါတယ်။

   ''အရင်ကလုံခြုံရေးကို သူတို့က ဘယ်လိုချလဲဆိုတော့ လမ်းမကြီးတွေမှာ ချရင်ချတယ်။ နောက် ရပ်ကွက်ရုံးတွေမှာ ချတယ်ပေါ့နော်။ စစ်ကားတွေနဲ့ပတ်တယ်။ ဒါပေမဲ့ ခုနောက်ပိုင်းကျတော့ သူတို့က အရပ်ဝတ်တွေနဲ့။ ကားတွေနဲ့။ တွေ့ရင်ဆိုင်ကယ်တွေ၊ ကားတွေကို ကမူးရှူးထိုးမောင်းတယ်။ အရမ်းသိသာတယ်။ စစ်ဝတ်စုံနဲ့ ပတ်တာမျိုးက ရှိကို မရှိတော့ဘူး။ ကျတော်တို့ ပြနေတဲ့ပတ်ဝန်းကျင်မှာကို ရှိနေတာ။ လမ်းမကြီးတွေဘက်ဆီတက်လို့ မရအောင် လမ်းကြိုလမ်းကြားတွေကို ပိတ်ထားတာရှိတယ်။ ကြိုးတွေနဲ့ တားထားတာရှိတယ်'' ရတနာပုံတက္ကသိုလ်ကျောင်းသားသမဂ္ဂသပိတ်စစ်ကြောင်းက ကျောင်းသားတစ်ဦးက ပြောပါတယ်။

   တကသသပိတ်စစ်ကြောင်းဟာ သပိတ်ကို ဝန်းရံသူတွေရဲ့ ကျန်းမာရေးကြောင့် ၁၀ ရက်နီးပါးကြာ သပိတ်ထွက်ခဲ့အပြီးမှာ မနေ့ သြဂုတ်လ ၅ ရက်မှာ သပိတ်ပြန်ထွက်ချိန် မြင်ရတဲ့ စစ်ကောင်စီဘက်က လုံခြုံရေး တင်းကျပ်ထားမှုကို သူက ပြောပြသွားတာပါ။

   ''(သပိတ်တွေကို)ဖြိုတာကတော့ ဖြိုနေတာပဲ။ အရင်ကဆို အေးအေးဆေးဆေး ပြလို့ရတယ်။ အခုကတော့ သပိတ်လိုက်ဖြိုတာများတယ်။ ပည်သူ့ကာကွယ်ရေးတပ်ဖွဲ့ (PDF) လိုက်ဖြိုတာများတယ်။ ဒါပေမဲ့လည်း ရောမရောက်ရင် ရောမလိုကျင့်ဆိုတဲ့အတိုင်း အခြေအနေ အချိန်အခါကြည့်ပြီး သပိတ်ထွက်ရတာပေါ့။ ခုက ကီးပတ်(ခလုတ်ဖုန်း)ကိုင်ရင်တောင် PDF ကလို့ ယူဆခံနေရတဲ့ခေတ်ကိုး။''လို့လည်း သူက ပြောပါတယ်။

   • မြန်မာနိုင်ငံ စစ်အာဏာသိမ်းမှု နေ့စွဲမှတ်တမ်း
   • တိမ်းရှောင်နေသူတွေပြန်လာရင် အမှုပိတ်ပေးမယ်လို့ စစ်ကောင်စီပြော

   ပြီးခဲ့တဲ့ရက်ပိုင်းက မြတောင်သပိတ်စစ်ကြောင်းဟာ ဘုရားကြီးနားမှာ ပစ်ခတ်ဖြိုခွင်းတာခံခဲ့ရပြီး အဲဒီမှာ ဖြိုခွင်းသူတွေက အရပ်ဝတ်တွေနဲ့ ဖြစ်တယ်လို့လည်း သပိတ်မှာပါဝင်သူတွေက ပြောထားပါတယ်။

   အဲဒီနောက် စစ်ကောင်စီတပ်တွေက မြတောင်သပိတ်မှာ ပါဝင်တဲ့သူတွေကို နေအိမ်တွေအထိ လိုက်လံဖမ်းဆီးချိန် လူသေဆုံးတဲ့အထိဖြစ်ခဲ့တယ်လို့လည်း သက်ဆိုင်ရာမိသားစုဝင်တွေက ဘီဘီစီကို ပြောပြထားပါတယ်။

   နည်းလမ်းပေါင်းစုံနဲ့ ဆန္ဒပြနေဦးမှာဖြစ်သလို မန္တလေးက ကျောင်းသားသပိတ်၊ ရဟန်းရှင်သပိတ်တွေဟာ သက်ဆိုင်ရာသပိတ်တွေ မထွက်နိုင်တဲ့အခါ တခြားသပိတ်တွေမှာ ပူးပေါင်းပြီး ဆက်ဆန္ဒပြဖို့ ရှိတယ်လို့လည်း ရတနာပုံတကသသပိတ်စစ်ကြောင်းက ဆိုပါတယ်။

5. ၆ သြဂုတ် ၂၀၂၁ကနီနယ်ထဲ အာဏာသိမ်း စစ်တပ်က လူတွေ အစုလိုက်အပြုံလိုက် သတ်ထားကြောင်း ဦးကျော်မိုးထွန်း ကုလအတွင်းရေးမှူးချုပ်ထံ တိုင်ကြား

   ကနီနယ်ထဲ အာဏာသိမ်း စစ်တပ်က လူတွေ အစုလိုက်အပြုံလိုက် သတ်ထားကြောင်း ဦးကျော်မိုးထွန်း ကုလအတွင်းရေးမှူးချုပ်ထံ တိုင်ကြား

   စစ်ကိုင်းတိုင်း၊ ကနီဒေသတဝိုက် နယ်မြေတွေမှာ အာဏာသိမ်း စစ်တပ်ရဲ့ တပ်ဖွဲ့ဝင်တွေ လက်ချက်နဲ့ သေဆုံးခဲ့ရသူတွေရဲ့ ရုပ်အလောင်းပေါင်း ၄၀ ကို ပြီးခဲ့တဲ့ ဇူလိုင်လ အတွင်း နေရာ ၃ နေရာကနေ တွေ့ရှိထားရတယ် ဆိုပြီး ကုလသမဂ္ဂဆိုင်ရာ မြန်မာအမြဲတမ်း ကိုယ်စားလှယ် ဦးကျော်မိုးထွန်းက ကုလသမဂ္ဂ အတွင်းရေးမှူးချုပ် အန်တိုနီယို ဂူးတားရက်စ်ထံကို စာရေးသား ပေးပို့ပြီး အကြောင်းကြားပါတယ်။

   စစ်တပ်ရဲ့ လုပ်ရပ်တွေဟာ လူသားမျိုးနွယ်ပေါ် ကျူးလွန်တဲ့ ရာဇဝတ်မှုမျိူးထိ မြောက်ကြောင်း ထင်ရှားလှတယ်လို့ သံအမတ်ကြီး ဦးကျော်မိုးထွန်းက ရေးသားထားပါတယ်။

   ဒါ့ကြောင့်၊ အာဏာသိမ်း မြန်မာစစ်တပ်ကို လက်နက်တင်ပို့ ရောင်းချတာကိုကမ္ဘာလုံးဆိုင်ရာ အတိုင်းအတာ အနေနဲ့ အလုံးစုံ ပိတ်ပင်နိုင်ဖို့ ကုလသမဂ္ဂ လုံခြုံရေး ကောင်စီက ဆုံးဖြတ်ချက် ချမှတ်ပေးပါ ဆိုပြီး ဦးကျော်မိုးထွန်းက ပန်ကြားထားပါတယ်။

   အာဏာသိမ်း စစ်တပ်ရဲ့ သတ်ဖြတ်မှု၊ ဖမ်းဆီးမှုတွေ အပါအဝင် ရက်စက်ကြမ်းကြုတ်မှုတွေ လျော့ပါးသွားမယ့် အရိပ်အယောင်တောင် မတွေ့ရဘူးလို့လည်း ဆိုပါတယ်။

   မြန်မာအရေးနဲ့ ပတ်သက်ပြီး နိုင်ငံတကာ အသိုင်းအဝိုင်းရဲ့ လူသားချင်း စာနာ နားလည်မှု ဆိုင်ရာ ကြားဝင် ဟန့်တား ဆောင်ရွက်တာမျိုးတွေ အရေးတကြီး လုပ်ဆောင်ပါ ဆိုပြီးတော့လည်း ဦးကျော်မိုးထွန်းရဲ့ စာထဲ တောင်းဆိုထားပါတယ်။

   လက်ရှိ အချိန်မှာ ကနီနယ်ထဲ တိုက်ပွဲတွေ ငြိမ်သက်နေပေမယ့် ဒေသခံတွေရဲ့ ရုပ်အလောင်းတွေ ထပ်ပြီးတွေ့လာနိုင်သေးတယ် ဆိုတဲ့ စိုးရိမ်မှုတွေ ရှိနေတယ်လို့ အဲဒီ ဒေသက လာတဲ့ သတင်းတွေက ဆိုပါတယ်။

   အာဏာသိမ်း စစ်တပ် တပ်ဖွဲ့ဝင်တွေနဲ့၊ စစ်တပ်က လက်နက် တပ်ဆင်ပေးထားတဲ့ သူတွေရဲ့ ရန်ကြောင့်ဒေသတွင်း ကျေးရွာတွေကသူတွေ အိုးအိမ်တွေ စွန့်ခွာ ထွက်ပြေး ခဲ့ကြရပြီး ဖြစ်တယ်လို့ ဆိုပါတယ်။

   အာဏာသိမ်း စစ်တပ်ဘက်က ထုတ်ပြန်ချက်ထဲမှာတော့ ပြီးခဲ့တဲ့ ဇူလိုင်လ အကုန်ပိုင်း ၃၀ ရက်နေ့တုန်းက ကနီနယ်ထဲက ဇီးပင်တွင်းရွာမှာ အကြမ်းဖက် လက်နက်ကိုင် အယောက် ၁၀၀ ဝန်းကျင်က တိုက်ခိုက်လာတဲ့ အတွက်၊ ပြန်လည် တိုက်ခိုက်ခဲ့တာမှာ အလောင်း ၉ လောင်းနဲ့အတူ အမဲလိုက်သေနတ်တွေ၊ လက်လုပ်ဗုံးတွေ ရရှိထားတယ် ဆိုပြီး ပြောထားပါတယ်။

6. ၅ သြဂုတ် ၂၀၂၁ဖုန်းခေါ်ဆိုမှုတွေကို စစ်တပ်က ကြားဖြတ်နားထောင်နေသလား

7. ၅ သြဂုတ် ၂၀၂၁မြန်မာဆိုင်ရာ အာဆီယံ အထူးသံခန့်အပ်မှုကို အပစ်ရပ်အဖွဲ့တွေ ကြိုဆို

   ဘရူနိုင်း နိုင်ငံခြားရေး ဝန်ကြီး ၂ ကို မြန်မာနိုင်ငံဆိုင်ရာ အာဆီယံ အထူးသံအဖြစ် ခန့်အပ်တာကို ကြိုဆိုတယ်လို့ အပစ်ရပ် တိုင်းရင်းသားလက်နက်ကိုင်အဖွဲ့တွေက ပြောဆိုလိုက်ပါတယ်။

   မနေ့ကနဲ့ ဒီကနေ့ ပြုလုပ်ခဲ့တဲ့ အပစ်ရပ် ၁၀ ဖွဲ့ရဲ့ ငြိမ်းချမ်းရေး ဦးဆောင်အဖွဲ့ အစည်းအဝေးမှာ ဆွေးနွေးချက်တွေအရ အခုလို ထုတ်ပြန်ခဲ့တာလို့ ဆိုပါတယ်။

   ဒါ့အပြင် နိုင်ငံတကာ ကြားဝင်စေ့စပ်ဖျန်ဖြေမှုတွေကို လက်ရှိမြန်မာ့နိုင်ငံရေး အခြေအနေနဲ့ လိုက်လျောညီထွေ ဖြစ်အောင်လုပ်မယ်လို့လည်း ဆိုပါတယ်။

   စစ်ကောင်စီရဲ့ ရွေးကောက်ပွဲ ကော်မရှင်သစ်က ၂၀၂၀ ရွေးကောက်ပွဲ ရလဒ်တွေ ဖျက်သိမ်းလိုက်တာဟာ ဒီမိုကရေစီရေး နောက်ပြန်ဆုတ်စေတဲ့ လုပ်ရပ်ဖြစ်တယ်လို့လည်း ဝေဖန်လိုက်ပါတယ်။

   အချက် သုံးချက်ပါတဲ့ အဲဒီ ထုတ်ပြန်ချက်မှာ ကိုဗစ်ကာကွယ်ကုသရေးကို ကြိုးပမ်းဆောင်ရွက်မယ်လို့လည်း ပါရှိပါတယ်။

8. ၅ သြဂုတ် ၂၀၂၁မြန်မာဆိုင်ရာ အထူးသံခန့်အပ်မှု အာဆီယံရဲ့ အရေးကြီးတဲ့ ခြေလှမ်းလို့ ယူကေ သံအမတ်သစ် မှတ်ချက်ပေး

9. ၅ သြဂုတ် ၂၀၂၁မြန်မာပြည်ဆိုင်ရာ အာဆီယံ အထူးသံတမန် အကြောင်း သုံးသပ်ချက်

10. ၅ သြဂုတ် ၂၀၂၁တိမ်းရှောင်နေသူတွေပြန်လာရင် အမှုပိတ်ပေးမယ်လို့ စစ်ကောင်စီပြော

11. ၅ သြဂုတ် ၂၀၂၁အောက်စီဂျင်ကျတဲ့ကိုဗစ်လူနာတွေကို မြစ်ကြီးနားအထွေထွေဆေးရုံကြီးမှာ လက်ခံကုသပေးတယ်လို့ဆို, လူနာဘက်က အောက်ဆီဂျင်အိုးယူလာဖို့လိုအပ်

    မြစ်ကြီးနားမြို့ပြည်သူ့ဆေးရုံကြီးမှာတော့ အောက်စီဂျင်ကျတဲ့ကိုဗစ်လူနာတွေကိုလက်ခံကုသပေးနေတယ် လို့မြစ်ကြီးနားမြို့အခြေစိုက်လူမှုကူညီရေးပြုလုပ်ပေးနေတဲ့ လူမှုရေးအသင်းတွေကပြောပါတယ်။

    ရန်ကုန်အပါအဝင်မြို့ကြီးအချို့မှာ လူနာများပြားလွန်းတာကြောင့် အောက်ဆီဂျင်ကျကာအရေးပေါ်ကုသမှု ခံယူဖို့လိုအပ်ပေမယ့်လူနာတွေကို ဆေးရုံကတွေက တိုက်ရိုက်လက်ခံကုသတာမျိုးမလုပ်ပေးနိုင်လို့ အသက်ဆုံးရှုံးရတဲ့လူနာတွေရှိခဲ့ပါတယ်။

    မြစ်ကြီးနားမြို့က ကိုဗစ်ပေါ့စတစ်လူနာတွေနဲ့ပတ်သက်ပြီး ကူညီပေးနေတဲ့လူမှုကူညီရေးအသင်းတွေက သူတို့ရဲ့ အခက်အခဲနဲ့လိုအပ်ချက်တွေကို ဘီဘီစီကိုအခုလိုပြောပြပါတယ်။

    "တချို့ကိုတော့ဆေးရုံကလက်ခံတယ် စစ်ဆေးရုံကတော့ သံယာတော်သာသနာ့ဝန်ထမ်းတွေတော့ လက်ခံပါ တယ်။ မြစ်ကြီးနားအထွေထွေရောဂါကုဆေးရုံကတော့ လူနာနဲ့အတ အောက်စီဂျင်တွဲရက်ပါရတယ်။ အောက်စီဂျင်မပါရင်သူတို့ကလက်မခံတော့ဘူး’’လို့ ဧရာဝတီကရုဏာလူမှုကူညီရေးအသင်းက ကိုသန်းထွန်း ကပြောပါတယ်။

    ဒါကြောင့် လူနာတွေကို လက်မခံဘူးလို့ပြောတာဘဲဖြစ်ဖြစ် အောက်စီဂျင်မရှိဘူးပြောတာတွေကိုတော့ လူနာတွေကအားငယ်သွားတာတွေများတယ်လို့လည်းသူကပြောပါတယ်။

    ဒါအပြင်Rest In Peace Group (လူမှုကယ်ဆယ်ရေးအသင်း) ကလည်း "အောက်စီဂျင်ထိုးကျနေတဲ့ သူတွေကိုတော့ဆေးရုံကြီးကိုပို့ပါတယ်။ တချို့ကိုcenterတွေကိုပို့ပါတယ်။ ဆေးရုံတက်စရာမလိုဘူး ဆိုရင်လဲအိမ်ကိုပြန်ပို့ပေးပါတယ်။ အခက်အခဲကတော့ သိပ်မရှိပါဘူး။ အခက်အခဲ အနေနဲ့ကတော့ PPEဝတ်စုံရှာဝယ်ရတာအချိန်နဲ့တပြေးညီမရတဲ့အချိန်ကတော့အခက်အခဲဖြစ်တယ် " Rest In Peace Group လူမှုကယ်ဆယ်ရေးအသင်းအတွင်းရေးမှူးကိုဆိုင်းနော်ကပြောပါတယ်။

    သူတို့အသင်းအနေနဲ့ တစ်ရက်ကို ကိုဗစ်နဲ့ ပတ်သက်ပြီး ပျှမ်းမျှ၁၀ယောက်လောက်ကို ကူညီပေးနေရတယ် လို့ပြောပါတယ်။

    ကချင်ပြည်နယ် မြစ်ကြီးနား မြို့မှာတော့လူမှုကူညီရေးအသင်းတချို့က PPE ဝတ်စုံဝယ်ယူဖို့ ခက်ခဲသလို တချို့လူနာတွေကတော့ အောက်စီဂျင်ရဖို့အခက်အခဲဖြစ်နေတာတွေလည်းရှိတယ်လို့ သိရပါတယ်။

12. ၅ သြဂုတ် ၂၀၂၁လွိုင်ကော်မြို့ပေါ်ရပ်ကွက်ထဲ မနေ့ညပိုင်းကပစ်ခတ်မှုဖြစ်ပြီးအမျိုးသမီးတစ်ဦးဒဏ်ရာရ, လမ်းမပေါ်မှာ စစ်ကောင်စီတပ်ဖွဲ့ဝင်တွေ လုံခြုံရေးတင်းကြပ်

    ကယားပြည်နယ်၊ လွိုင်ကော်မြို့၊ ‌နောင်ယားရပ်ကွက်မှာမနေ့ ဩဂုတ်(၄)ရက် ည (၈)နာရီဝန်းကျင်က ကညနရုံးမှာ ပေါက်ကွဲသံကြားရပြီး‌နောက် သေနတ်ပစ်သံတွေအဆက်မပြတ်ကြားခဲ့ရတယ်လို့ ဒေသခံတွေက ဆိုပါတယ်။

    ဒေသခံတချို့ကတော့ နှစ်ဖက်အပြန်အလှန်ပစ်ခတ်သံတွေလို့ဆိုပြီး အဲဒီလိုပစ်ခတ်မှုကြောင့် အိမ်ပျက်စီးမှု တချို့ရှိကာ အမျိုးသမီးတစ်ဦး ခြေထောက်ဒဏ်ရာရရှိခဲ့ပါတယ်။

    “အိမ်ကိုကျည်ကျပြီး အမျိုးသမီးခြေထောက်ထိတယ်ကြားတယ်။ နောင်ယားရပ်ကွက်ဘက်မှာပဲ ဖြစ်တာပါ။ လက်နက်ကြီးသံ ၂ ချက်လောက်ကြားပြီး သေနတ်ပစ်သံကြားရတာ ရမ်းပစ်သံလို့လည်းထင်ရတယ်။ တချို့ကတော့ နှစ်ဖက်ပစ်ခတ်တာလို့ပြောတယ်။”လို့ လွိုင်ကော်မြို့ပေါ်ရပ်ကွက်နေပြည်သူတဦးက ပြောပါတယ်။

    ဒီလိုပစ်ခတ်မှုဖြစ်ပြီးတဲ့နောက် ဒီနေ့ ဩဂုတ် (၅)ရက်မနက်ပိုင်းကစပြီး လမ်းမပေါ်တွေမှာ စစ်ကောင်စီတပ်ဖွဲ့ ဝင်တွေ စောင့်ကြပ်နေတာမျိုးရှိပြီး စစ်ဆေးတာမျိုးတွေတော့မရှိဘူးလို့ ဆိုပါတယ်။

    ဒါအပြင် စစ်ကောင်စီတပ်ဖွဲ့ဝင်တွေကကားနဲ့ မြို့ပေါ်မှာလှည့်လှည်သွားလာနေတယ်လို့ ဒေသခံတွေက ဆက်ပြောပါသေးတယ်။

    အခုဩဂုတ်လဆန်းကစပြီး လွိုင်ကော်မြို့ပေါ်မှာ ပေါက်ကွဲမှုတချို့နဲ့ ပစ်ခတ်မှုတွေပြန်ရှိနေတာပါ။

    မနေ့ညပိုင်းကဖြစ်စဉ်နဲ့ပတ်သက်လို့ စစ်ကောင်စီဘက်ကတော့ တစုံတရာထုတ်ပြန်တာမျိုးမရှိသေးပါဘူး။

13. ၅ သြဂုတ် ၂၀၂၁တစ်ပတ်ကိုလူရာချီသေဆုံးသည်အထိ ကိုဗစ်တတိယလှိုင်းဒဏ်ကိုအစောဆုံးခံခဲ့ရတဲ့ကလေးမြို့မှာ သေဆုံးနှုန်းသိသိသာသာလျော့ကျလာ

    ပြီးခဲ့တဲ့ ဇွန်လနဲ့ ဇူလိုင်လတွေအတွင်းသေဆုံးသူ ရာချီရှိခဲ့တဲ့ ကလေးမြို့မှာ သေဆုံးသူသိသိသာသာ လျော့ကျလာပြီး ကုသရေးစင်တာတွေမှာလည်း လူနာအနည်းငယ်သာကျန်တော့တယ်လို့ ကလေးမြို့ အိတ်စွပ်ကုသရေးစင်တာက တာဝန်ခံ ကိုတင်ထွန်းဝင်းက ဘီဘီစီကိုပြောပါတယ်။

    မနေ့က သြဂုတ် ၄ ရက်နေ့မှာတော့ ကိုဗစ်လက္ခဏာနဲ့သေဆုံးသူ ၅ဦးခန့်ရှိခဲ့ပြီး သေဆုံးသူအများစုဟာ ရပ်ကွက်တွေကနေအိမ်တွေမှာပဲ နေထိုင်ကုသနေသူတွေဖြစ်တယ်လို့ သူကပြောပါတယ်။

    ‘ ‘ မနေ့ကဆုံးတာဆိုရင် လေး၊ငါးဦးပဲရှိတယ်။ တစ်ယောက်ကတော့ နောက်စင်တာတစ်ခုမှာ ကုနေတာ လချီကြာနေပြီ။ အောက်ဆီဂျင်ကျပြီးဆုံးသွားတာ။ အများစုကတော့ ရပ်ကွက်တွေထဲက ဆုံးတာ။ အခုတော့ အတော်လေးလျော့သွားပြီ။ လူတွေကလည်းကြောက်တော့ အပြင်လုံးဝမထွက်သလောက်ဆိုတော့ ကူးစက် တာအတော်လျော့ကျသွားတယ်။ ကျွန်တော်တို့စင်တာမှာလည်း လူနာ ၁၅ယောက်လောက်ပဲ ကျန်တော့ တာ။ တခြားစင်တာတွေလည်း ဒီလိုပဲ။’’လို့ ကိုတင်ထွန်းဝင်းကပြောပြပါတယ်။

    ကိုဗစ် တတိယလှိုင်းဒဏ်ကို အစောဆုံးနဲ့အဆိုးဆုံးခံခဲ့ရတဲ့ ကလေးမြို့မှာ အိတ်စွပ်ကုသရေးစင်တာ၊ အားမာန်စင်တာနဲ့ ဆရာတော်ကြီးစင်တာဆိုပြီး စင်တာ ၃ခုဖွင့်လှစ်ခဲ့ရတယ်လို့ သူကပြောပါတယ်။

    ‘‘ အခုကတော့ လူနာအတော်လေးလျော့သွားတော့ ဒါတွေပြီးရင်ပေါင်းမလား၊ပိတ်ကြမလားပေါ့။ လက်ရှိ ကုသရေးစင်တာကနေ ကွာရန်တင်းစင်တာအဖြစ်လည်းပြောင်းသွားနိုင်တယ်။ နောက်ထပ် ကိုဗစ်လှိုင်း တစ်ခုထပ်မဖြစ်လာအောင် ကွန်တက်တွေသေချာလိုက်ပြီး ကွင်းဆက်ဖြတ်နိုင်အောင်လို့ပေါ့။’’လို့ ကိုတင်ထွန်းဝင်းကပြောပြပါတယ်။

    ပြီးခဲ့တဲ့ ဇွန်နဲ့ဇူလိုင်လအတွင်း ကိုဗစ်လက္ခဏာနဲ့သေဆုံးသူဟာသိသိသာသာများပြားခဲ့ပြီး အချို့သော ရက်တွေမှာ တစ်ရက်ကို လူ ၄၀ ကျော်သေဆုံးတာရှိသလို သင်္ဂြိုဟ်စက်တွေပါမနိုင်တော့တဲ့အထိ ဖြစ်ခဲ့ရတယ်လို့ လူမှုကူညီရေးအသင်းတွေက ပြောကြပါတယ်။

14. ၅ သြဂုတ် ၂၀၂၁ဝိုင်းမော်မြို့ရှိနယ်မြေခံတပ်ရင်းဘက်က မနေ့ညပစ်ခတ်မှုကြောင့်နေအိမ်တချို့ပျက်စီးတယ်လို့ဒေသခံပြော

    ကချင်ပြည်နယ်၊ ဝိုင်းမော်မြို့မှာမနေ့က ဩဂုတ်လ(၄)ရက် ည(၈)နာရီနောက်ပိုင်းမှာနယ်မြေခံတပ်ရင်းဘက် ကပစ်ခတ်သံတွေ ကြားရပြီးနောက် နေအိမ်တချို့ပျက်စီးမှုရှိခဲ့ပေမယ့် လူထိခိုက်မှုတော့မရှိဘူးလို့ ဒေသခံ တွေကပြောပါတယ်။

    “သတင်းအမှားရတယ်နဲ့တူတယ် နယ်မြေခံအဲ့တပ်ရင်းက အဲတာကြောင့် မနေ့က သုံးနေရာလောက်ရမ်းသမ်း ပစ်တာ၊ ဖြစ်တာတော့ ည ရှစ်နာရီနောက်ပိုင်း နားလိုက် ပစ်လိုက် နားလိုက် ပစ်လိုက်နဲ့ဘဲ ။ ကေအိုင်အေက လာမတိုက်ဘူး အဲတာကို သူတို့ဘာသာမှန်းပြီးပစ်တာ”လို့ ဒေသခံတဦးက ဘီဘီစီကို အခုလိုပြောတာပါ။

    အလားတူ ဩဂုတ်(၃)ရက် ညပိုင်းမှာလည်း ဝိုင်းမော်မြို့တဝိုက် လက်နက်ကြီးပစ်ခတ်သံတွေ ကြားခဲ့ရပြီး အဲ့ဒီပစ်ခတ်မှုကြောင့် လဘန်ကျေးရွာထဲလက်နက်ကြီးကျည်ကျကာ အိမ်တချို့ထိခိုက်တာ၊ ရွာသားတွေ မွေးမြူထားတဲ့ ဝက်တွေလို အိမ်မွေးတိရစ္ဆာန်တွေအစုလိုက် သေဆုံးတာမျိုးတွေရှိခဲ့တာပါ။ အဲ့ဒီနေ့ ညပိုင်းမှာဘဲ ကေအိုင်အေဌာနချုပ် လိုင်ဇာမြို့အနီးမှာလည်း လက်နက်ကြီးကျည် (၆)လုံးထက်မနည်းကျခဲ့ပါတယ်။

    အဲ့ဒီဩဂုတ် (၃)ရက် ဝိုင်းမော်မြို့ပစ်ခတ်မှုတွေနဲ့ပတ်သက်ပြီး နှစ်ဘက်ပစ်ခတ်တာမျိုးမဟုတ်ဘဲ စစ်ကောင်စီဘက်ကပစ်ခတ်တာလို့ ကေအိုင်အေပြန်ကြားရေးတာဝန်ခံဗိုလ်မှူးကြီးနော်ဘူကအတည်ပြု ပြောကြားခဲ့ပါတယ်။

    အခုဩဂုတ်လ (၄)ရက် ညပိုင်းဝိုင်းမော်မြို့ပစ်ခတ်သံတွေနဲ့ပတ်သက်ပြီးတော့ စစ်ကောင်စီဘက်ကနေ တစုံတရာထုတ်ပြန်ချက်မတွေ့ရသေးသလို ဘီဘီစီဘက်ကလည်း မေးမြန်းဖို့ကြိုးစားနေပါတယ်။

15. ၅ သြဂုတ် ၂၀၂၁ပေါင်းတည်စွန္နီဂျာမေဗလီဝတ်ကျောင်းတော်မှာလည်း Oximeter တစ်လုံးကိုကျပ်ငွေခြောက်ထောင်နဲ့ရောင်းချပေး

    ပဲခူးတိုင်းဒေသကြီး ပေါင်းတည်မြို့၊ မင်းကွက်(၂)ရပ်ကွက်၊ ၁၃ လမ်း စွန္နီဂျာမေဗလီဝတ် ကျောင်းတော် မှာဒီကနေ့ သြဂုတ် ၅ ရက်နေ့ မနက်၉နာရီကစပြီး (Oximeter) တစ်လုံး ကို ကျပ်(၆၀၀၀) နှုန်းနဲ့အမြတ်မယူဘဲ ရောင်းချပေးနေတယ်လို့ သိရပါတယ်။

    ကိုဗစ်တတိယလှိုင်းအတွင်း ကိုဗစ်ကူးစက်သေဆုံးမှုတွေမြင့်တက်လာချိန် ကိုဗစ်လူနာ တွေအတွက် အရေးပေါ် လိုအပ်တဲ့ Oximeter တစ်လုံးကို ကျပ်နှစ်သောင်းဝန်းကျင် ကနေ ကျပ်ခြောက်သောင်းကျော်အထိ ဈေးတွေမြင့်တက်လာတဲ့အတွက် လူမှုအဖွဲ့ အစည်းအချို့ကနေအမြတ်မယူပဲ ဈေးနှုန်းသက်သာစွာနဲ့ ရောင်းချပေးလာကြတာလည်းဖြစ်ပါတယ်။

    ဒီလိုရောင်းချပေးမှုကို ရန်ကုန်မြို့က နွယ်အေးဗလီနဲ့ ချိတ်ဆက်ပြီးရောင်းချပေး နေတာ ဖြစ်တယ်လို့လည်း သိရပါတယ်။

    ဒီလိုရောင်းချပေးရာမှာ လူတစ်ဦးကို Oximeter တစ်ခုနှုန်းသာရောင်းချပေးနေတာ လို့ဆိုပါတယ်။

16. ၅ သြဂုတ် ၂၀၂၁ရခိုင်ပြည်နယ်အတွင်း နေအိမ်မှာနေထိုင်ရေး Stay at home အစီအစဉ် (၂)ပတ်ထပ်တိုးတယ်လို့ ULA/AA ကထုတ်ပြန်

    ကိုဗစ်ရောဂါ ပြည်နယ်အတွင်းထိန်းချုပ်နိုင်ဖို့အတွက် နေအိမ်မှာနေထိုင်တဲ့အစီအစဉ် Stay at home ကာလကိုဩဂုတ်လ (၅)ရက်ကနေ (၁၈)ရက်အထိ နှစ်ပတ်တိုးမြင့်တဲ့အကြောင်း ရက္ခိုင်အမျိုးသားအဖွဲ့ချုပ် ULA/AA က ထုတ်ပြန်ထားပါတယ်။

    ရက္ခိုင်အမျိုးသားအဖွဲ့ချုပ်ကနေ ဇူလိုင် (၂၀)ရက်ကနေ ဩဂုတ်လ (၄)ရက်အထိ Stay at home နေဖို့ ပထမတကြိမ် ကြေညာထားပြီး အခုတခါ (၂)ပတ်ထပ်တိုးလိုက်တာပါ။

    ဒီStay at home (၂)ပတ်ဟာ ပြည်သူတွေအတွက် ထိရောက်ပြီး အရင်ကိုဗစ်ပထမလှိုင်း၊ ဒုတိယလှိုင်းတွေနဲ့ နှိုင်းယှဉ်ရင် အခုတခါမှာစံချိန်တင်ကူးစက်မှု၊ သေဆုံးမှုရှိပေမယ့် ကိုဗစ်ရောဂါကို အတိုင်းအတာတခုအထိ ထိန်းချုပ်လာနိုင်ပြီလို့ဆိုပါတယ်။ အခုလို Stay at home မသတ်မှတ်ရင် အောက်ဆီဂျင်လိုအပ်ချက်ပိုများ လာနိုင်ပြီး အခက်အခဲရှိလာနိုင်မှာသေချာတာကြောင့် ကိုဗစ်စည်းကမ်းတွေလိုက်နာပြီး အိမ်မှာနေကြဖို့ ထုတ်ပြန်ချက်မှာပါရှိပါတယ်။

    စားဝတ်နေရေးကိစ္စ ဈေးသွားလာရာတွေမှာလည်း ကိုဗစ်စည်းကမ်းတွေကို လိုက်နာကြဖို့၊ ကိုဗစ်ကာကွယ် ဆေးမထိုးရသူတွေရှိရင်လည်း မဖြစ်မနေထိုးကြဖို့နဲ့ ကာကွယ်ဆေးထိုးချိန်မှာလည်း လူစုလူဝေးမဖြစ်အောင် ရှောင်ရှားကြဖို့ AAဘက်က တိုက်တွန်းထားပါတယ်။

    ရက္ခိုင့်အမျိုးသားအဖွဲ့ချုပ်ဟာ ပြည်နယ်အတွင်းကိုဗစ်ထိန်းချုပ်ရေးအတွက်သာမက ရခိုင်ဒေသမှာရှိတဲ့ မတရားမှုတွေအတွက်ပါ တိုင်ကြားနိုင်တယ်လို့ အခုရက်ပိုင်းအတွင်းစာထုတ်ပြန်ထားပါသေးတယ်။

    အဲဒီလို တိုင်ကြားနိုင်‌ကြောင်းထုတ်ပြန်တာနဲ့ ပတ်သက်ပြီးအခုလိုစာမထုတ်ခင်ကတည်းက ULA/AA ထိန်းချုပ်ထား တဲ့နေရာတွေမှာ ပြည်သူ့ရေးရာ စီမံအုပ်ချုပ်မှုတွေကိုလုပ်ဆောင်ပေးနေတယ်လို့ ရက္ခိုင့်တပ်တော် ပြောရေးဆိုခွင့်ရှိသူ ခိုင်သုခက ဘီဘီစီကိုပြောထားပါတယ်။

17. ၄ သြဂုတ် ၂၀၂၁စစ်အာဏာသိမ်းမှု နောက်ပိုင်း မြန်မာ့သစ်သီးပို့ကုန် စျေးကွက်သစ်တွေ လက်လွတ်ဆုံးရှုံး, ရှာထားသမျှ စျေးကွက်သစ်တွေ စစ်အာဏာသိမ်းမှုနောက်ပိုင်း အော်ဒါမမှာတော့

    တကျော့ပြန် စစ်အာဏာ သိမ်းခံခဲ့ရတဲ့နောက် ၆ လတာ ကာလ အတွင်းမှာ မြန်မာ့ သစ်သီးဝလံတွေကို ပြည်ပကနေ မှာယူတဲ့ အော်ဒါတွေ မရှိတော့ဘူးလို့ မြန်မာနိုင်ငံ သစ်သီးဝလံ ပန်းမန်နဲ့ ဟင်းသီးဟင်းရွက် စိုက်ပျိုး ထုတ်လုပ် တင်ပို့ရောင်းချသူများ အသင်း MFVP က တာဝန်ရှိသူ တစ်ဦးက ဘီဘီစီကို ပြောပါတယ်။

    ဒါ့ကြောင့် နောက်ရာသီမှာ ဆိုရင်ရင် သစ်သီးဝလံ တောင်သူတွေဟာ လက်ရှိ စိုက်ပျိုးထားတာတွေရဲ့ ၅၀ % လောက်ပဲ ပြန်စိုက် နိုင်မယ့် အခြေအနေမျိုး ရောက်နေတယ်လို့ ဆိုပါတယ်။

    မြန်မာ့ သစ်သီးပို့ကုန်တွေကို တရုတ်စျေးကွက် တစ်ခုတည်းကိုပဲ အဓိက အားထား နေရတာကနေ လွတ်အောင် အင်္ဂလန်၊ ယူအေအီး စတဲ့ နိုင်ငံတွေမှာလည်း စျေးကွက် ရှာဖွေတာတွေ စစ်အာဏာသိမ်းမှု မတိုင်ခင် ကာလမှာ လုပ်ထားပါတယ်။

    ဒါပေမယ့် အဲဒီ သစ်သီးဝလံ စျေးကွက်သစ်တွေအားလုံး လက်လွတ်ဆုံးရှုံး သွားရတာ ဖြစ်ပါတယ်။

    လက်ရှိ အချိန်ဟာ တရုတ်ဘက် သစ်သီးတွေ သွားလေ့ရှိတဲ့ ရာသီမျိုး မဟုတ်တဲ့အပြင်၊ ကိုဗစ်ရောဂါ စိုးရိမ်ချက်တွေကြောင့် တရုတ်က သူတို့ရဲ့ နယ်စပ်ကုန်သွယ်ရေး ဂိတ်ပေါက်တွေကို ပိတ်ဆို့ထားချိန် ဖြစ်ပါတယ်။

    ဒါ့ကြောင့် သစ်သီးတွေ ပြည်ပတင်ပို့မှု အရောင်းအဝယ် လုံးဝ ရှိမနေဘူးလို့ အသင်း အတွင်းရေးမှူး ဦးကျော်သူက ဆိုပါတယ်။

18. ၄ သြဂုတ် ၂၀၂၁စမ်းချောင်းထဲက အုပ်ကြီးရုံးတစ်ခုမှာ ပေါက်ကွဲမှုဖြစ်ပြီး မီးလောင်

    ရန်ကုန်၊ စမ်းချောင်းမြို့နယ်ထဲက မုန့်တောင်ရပ်ကွက်ရုံးကနေ ပေါက်ကွဲသံ ထွက်လာပြီးတဲ့နောက် မီးလောင်နေတယ်လို့ အနီးဝန်းကျင် နေကြသူတွေက ပြောပါတယ်။

    ၈ နာရီ ဝန်းကျင်မှာ ဝုန်းကနဲ ပေါက်ကွဲသံ ထွက်လာပြီးတဲ့နောက် မီးလောင်ခဲ့တာ ဖြစ်တယ်လို့ ဆိုပါတယ်။

    စစ်ကောင်စီရဲ့ ဒေသန္တရ အုပ်ချုပ်ရေး ရုံးတစ်ခု ပစ်မှတ်ထား တိုက်ခိုက် ခံရတာ ဖြစ်နိုင်တယ် ဆိုတဲ့ သုံးသပ်မှုတွေ ရှိပေမယ့်၊ ဘီဘီစီ အနေနဲ့တော့ သီးသန့် အတည်မပြုနိုင်ပါဘူး။

    လူထိခိုက် သေဆုံးမှုရှိလား ဆိုတဲ့ အသေးစိတ် အချက်တွေလည်း ထွက်မလာသေးပါဘူး။ အခင်းဖြစ်ရာနေရာကို အာဏာသိမ်း စစ်တပ်ရဲ့ လက်နက်ကိုင် တပ်ဖွဲ့တွေ ရောက်လာကြတယ်လို့ ဆိုပါတယ်။

19. ၄ သြဂုတ် ၂၀၂၁KIA ဌာနချုပ် လိုင်ဇာကို စစ်ကောင်စီဘက်က လက်နက်ကြီးနဲ့ ပစ်ခတ်တာတွေ ထပ်မံ လုပ်ဆောင်နေတ​ယ်လို့ KIA ပြော, ဝိုင်းမော်တဝိုက်မှာလည်း စစ်ကောင်စီဘက်က တစ်ဘက်သတ် ပစ်ခတ်ခဲ့တာလို့ KIA ပြော

    ဝိုင်းမော်မြို့တဝိုက် ကြားနေခဲ့ရတဲ့ လက်နက်ကြီး ပစ်ခတ်သံတွေဟာ ကချင် လွတ်မြောက်ရေးတပ် KIA နဲ့ကြား ပေါ်ပေါက်ခဲ့တဲ့ တိုက်ပွဲ မဟုတ်ဘူးလို့ KIA ဘက်က ငြင်းဆိုပါတယ်။

    “ဘယ်အဖွဲ့အစည်းနဲ့ တိုက်ခိုက်ကြတယ် ဆိုတာ အတိအကျ မပြောနိုင်ပါဘူး။ ပြည်သူလူထု ပေးပို့လာတဲ့ အသံဖိုင်တွေအရတော့ အပြန်အလှန် ပစ်ခတ်သံတွေ ဆိုတာထက် စစ်ကောင်စီက ပစ်ခတ်နေတဲ့ အသံတွေပဲ အဓိက ကြားတယ်” ဆိုပြီး KIA ပြန်ကြားရေး တာဝန်ခံ ဗိုလ်မှူးကြီး နော်ဘူက ဘီဘီစီကို ပြောပါတယ်။

    ဩဂုတ်လ ၃ ရက် ညပိုင်း ဝိုင်းမော်မြို့ အနီး ပေါ်ထွက်လာခဲ့တဲ့ လက််နက်ကြီးသံ၊ ပစ်ခတ်သံတွေဟာ KIA နဲ့ စစ်ကောင်စီတပ်ကြား တိုက်ပွဲ ဖြစ်တာဆိုတဲ့ ယူဆချက်တွေ ထွက်လာခဲ့ပေမယ့် KIA ကတော့ သူတို့နဲ့ ဖြစ်တာ မဟုတ်ဘူး၊ စစ်ကောင်စီတပ်ရဲ့ တစ်ဘက်သတ် ပစ်ခတ်မှု ဖြစ်တယ်လို့ ပြောနေတာပါ။

    ဝိုင်းမော်မြို့နယ်ထဲက နယ်မြေခံတပ်ရင်း ၅၈ ကနေ လက်နက်ကြီးတွေနဲ့ မြို့အနီးတဝိုက် ပစ်ခတ်တာတွေ ပြုလုပ်ခဲ့တာ ဖြစ်တယ်လို့လည်း ဆိုပါတယ်။

    အဲဒီ ပစ်ခတ်မှုတွေကြောင့် လဘန်ကျေးရွာထဲ လက်နက်ကြီးကျည်ကျပြီး အိမ်တချို့ ထိခိုက်တာ၊ ရွာသားတွေ မွေးမြူထားတဲ့ ဝက်တွေလို အိမ်မွေးတိရိစ္ဆာန်တွေ အစုလိုက် သေဆုံးတာမျိုးတွေ ရှိခဲ့တယ်လို့ ဒေသတွင်း သတင်းတွေက ဆိုပါတယ်။

    ဒါ့အပြင် ဩဂုတ်လ ၃ ရက် ညပိုင်းမှာပဲ KIA ဌာနချုပ် လိုင်ဇာမြို့အနီးမှာလည်း လက်နက်ကြီးကျည် ၆ လုံးထက်မနည်း ကျခဲ့တယ်လို့ ဗိုလ်မှူးကြီးနော်ဘူက အတည်ပြုပါတယ်။

    လိုင်ဇာကို ပစ်မှတ်ထား ပစ်ခတ်တာမျိုးတွေကို ဇူလိုင် လကုန်ပိုင်းတုန်းကလည်း စစ်ကောင်စီတပ် ဘက်က ပြုလုပ်ခဲ့ပြီး အခုတစ်ကြိမ် ထပ်ပြီး ပစ်ခတ် ခံရတာလို့ ဆိုပါတယ်။ လိုင်ဇာမှာ အပျက်အစီး အထိအခိုက် တစုံတရာ ရှိလား ဆိုတာတော့ အတိအကျ မသိရပါဘူး။

    တရုတ်နိုင်ငံဘက်ခြမ်းထိ ကျည်ကျော်ကျတယ် ဆိုတဲ့ သတင်းတွေ ထွက်လာပေမယ့် ဘီဘီစီ အနေနဲ့ သီးသန့် အတည်ပြုနိုင်ဖို့ ကြိုးစားနေဆဲ ဖြစ်ပြီး၊ ဝိုင်းမော်နဲ့ လိုင်ဇာ တဝိုက် ပစ်ခတ်မှုတွေနဲ့ စပ်လျဥ်းပြီး စစ်ကောင်စီဘက်က ပြောဆိုချက်ကို ရရှိနိုင်ဖို့ ကြိုးစားနေဆဲ ဖြစ်ပါတယ်။

20. ၄ သြဂုတ် ၂၀၂၁မြန်မာ့အရေး အာဆီယံ အထူးကိုယ်စားလှယ် ခန့်အပ်မှု ဥရောပ သမဂ္ဂကြိုဆို

    မြန်မာနိုင်ငံရေး အကျပ်အတည်းကို ဖြေရှင်းဖို့အတွက် အာဆီယံ အထူးကိုယ်စားလှယ်အဖြစ် Mr Erywan Yusof ကို ခန့်အပ်ခဲ့တဲ့အပေါ်မှာ ဥရောပ သမဂ္ဂအဖွဲ့ကလည်း ကြိုဆိုကြောင်း ကြေညာချက်ထုတ်ပြန်ခဲ့ပါတယ်။

    မြန်မာနိုင်ငံမှာဖြစ်ပျက်နေတဲ့ အခက်အခဲတွေအတွက် အာဆီယံက ဧပြီလ ၂၄ ရက်မှာ ချမှတ် ထားတဲ့ လုပ်ငန်းစဥ် ၅ ရပ်ကို အကောင်အထည်ဖော်ဖို့ အထူးကိုယ်စားလှယ်က လုပ်ဆောင် နိုင်လိမ့်မယ်လို့ မျှော်လင့်ကြောင်း ဥရောပ သမဂ္ဂ ရဲ့ ပြောခွင့်ရ ပုဂ္ဂိုလ် နာဘီလာ မက်စရာလီ က ဆိုပါတယ်။

    ဒါ့အပြင် မြန်မာနိုင်ငံမှာ ဒီမိုကရေစီဖော်ဆောင်ဖို့အတွက် မြန်မာပြည်သူတွေနဲ့ အတူရပ်တည်ပြီး၊ အာဆီယံနိုင်ငံတွေအပြင် ဥရောပ သမဂ္ဂရဲ့ မိတ်ဖတ်နိုင်ငံတွေနဲ့ အတူ လက်တွဲ ဆောင်ရွက်သွားမယ်လို့ ထုတ်ပြန်ချက်ထဲမှာ ဖော်ပြပါတယ်။

    ဒီလုပ်ငန်းစဥ်တွေအောင်မြင်ဖို့ ဆိုရင်တော့ မြန်မာနိုင်ငံတွင်းက သက်ဆိုင်ရာ အဖွဲ့အစည်း တွေဟာ အထူးကိုယ်စားလှယ်နဲ့ အတူ လက်တွဲ လုပ်ဆောင်သွားဖို့ လိုတယ်လို့လည်း ဥရောပ သမဂ္ဂဘက်က ပြောပါတယ်။

    မြန်မာနိုင်ငံရေးအတွက် အာဆီယံက ချမှတ်ထားတဲ့ လုပ်ငန်းစဥ် ၅ ရပ်ကို အထောင်အထည် ဖော်ဖို့အတွက် အားလုံးပါဝင်တဲ့ နိုင်ငံရေး ဆွေးနွေးပွဲတွေ အပြင်၊ CRPH၊ NUG အစိုးရတို့နဲ့ပါ ဆွေးနွေးဖို့အတွက်က အဓိက အချက်အဖြစ်ပါဝင်နေကြောင်းကိုလည်း ဥရောပ သမဂ္ဂဘက် က ထောက်ပြပါတယ်။

    ဒါကြောင့် မြန်မာ စစ်တပ်အနေနဲ့ ဒေါ်အောင်းဆန်းစုကြည်၊ သမ္မတ ဦးဝင်းမြင့်နဲ့ ဖမ်းဆီးထိန်းသိမ်း ထားတဲ့ နိုင်ငံရေး သမားတွေကို အမြန်ဆုံးလွှတ်ပေးဖို့ကိုလည်း ဥရောပ သမဂ္ဂဘက်က တောင်းဆို တိုက်တွန်းသွားခဲ့ပါတယ်။

    မြန်မာနိုင်ငံမှာ လူမှုကူညီရေးတွေ အရေးပေါ်လိုအပ်နေပြီး၊ ဒုက္ခသည်တွေဆီကို အကူအညီ တွေ အလျင်အမြန် ရောက်နိုင်ဖို့ စစ်တပ်က အလေးထား ဆောင်ရွက်ဖို့ကိုလည်း ဥရောပ သမဂ္ဂ ဘက်က ပြောပါတယ်။