ကေအိုင်အေကို ဆန့်ကျင်ကြောင်း လီဆူ တိုင်းရင်းသားတွေ မြစ်ကြီးနားမှာ ဆန္ဒဖော်ထုတ်

ဒေတာကုန်ကျမှုသက်သာအောင် စာသားသက်သက်ဖတ်ရန်

ဓာတ်ပုံ ပုံစာ, ဒီတောင်းဆိုချက်တွေ မရမချင်း ဥပဒေဘောင်ထဲကနေ တောင်းဆိုမယ်လို့ဆို

ရေးသားခဲ့သည်။ ၃ ဇွန် ၂၀၁၉

ကချင်လွတ်လပ်ရေးတပ်မတော် KIA/KIO ကို ဆန့်ကျင်တဲ့ ဆန္ဒဖော်ထုတ်ပွဲတခုကို ဇွန်လ ၃ ရက်နေ့က မြစ်ကြီးနားမြို့မှာ လီဆူတိုင်းရင်းသားတွေက ကျင်းပခဲ့ပါတယ်။

လီဆူတိုင်းရင်းသားတွေကို KIA/KIO က လူမျိုးရေးအရဖိနှိပ်တာတွေ ရပ်တန့်ဖို့ အပါအဝင် တောင်းဆိုချက် ခြောက်ချက်ကို ဆန္ဒပြပွဲမှာ တောင်းဆိုကြပါတယ်။

KIA အနေနဲ့ လီဆူ တိုင်းရင်းသားတွေကို တရားဝင်တောင်းပန်ဖို့နဲ့ တပ်သားသစ်အတင်း အဓမ္မ မစုဆောင်းဖို့အချက်တွေကိုလည်း ဆန္ဒဖော်ထုတ်သူတွေက တောင်းဆိုကြတာဖြစ်ပါတယ်။

ဒီတောင်းဆိုချက်တွေ မရမချင်း ဥပဒေဘောင်ထဲကနေ တောင်းဆိုမယ်လို့ လီဆူအမျိုးသားဖွံဖြိုးတိုးတက်ရေး ပါတီ (ဒူးလေပါတီ) ဥက္ကဌ ဦးရွှေမင်း က ပြောပါတယ်။

ဓာတ်ပုံ ပုံစာ, လီဆူတိုင်းရင်းသား ရာဂဏန်း စီတန်းလှည့်လည် ဆန္ဒဖော်ထုတ်ခဲ့

၂၀၁၇ ခုနှစ်ကနေစပြီး KIA က လီဆူတိုင်းရင်းသား ၂၀ ကျော်ကို ဖမ်းဆီးသတ်ဖြတ်တာတာတွေရှိနေပြီး KIA က နှိပ်စက်လို့ ဒဏ်ရာရသူတွေလည်း ၂၀ ကျော်ရှိတယ်လို့ (ဒူးလေပါတီ) ဥက္ကဌ ဦးရွှေမင်းက ပြောပါတယ်။

ဆန္ဒဖော်ထုတ်ပွဲမှာ ကိုယ်တိုင်ပါဝင်တဲ့ မဂျေအားနာက "အခုလိုကျမတို့လီဆူလူမျိုးတွေ ကြွေးကြော်တာ ကတော့ တောထဲတောင်ထဲမှာ ရှာစားတဲ့ခါမှာအပြစ်မဲ့တဲ့သူတွေကို သတ်ဖြတ်ခြင်း၊ အမျိုးမျိုးနှိပ်စက်လို့ ကိုမနေနိုင်တော့လို့ကြွေးကြော်တာဖြစ်ပါတယ်" လို့ ဘီဘီစီကို ပြောပါတယ်။