မေ ၅ ရက် ထိပ်တန်းသတင်းများ- မြန်မာအိန္တိယ အတွက်အရေးပါတဲ့ စစ်တွေဆိပ်ကမ်း မေ ၉ ရက်နေ့စဖွင့်တော့မယ်

ရေးသားခဲ့သည်။ ၅ မေ ၂၀၂၃

ပြီးခဲ့တဲ့ နှစ်နှစ် စစ်တပ်က အာဏာသိမ်းလိုက်ချိန်ကစလို့ မြန်မာနိုင်ငံမှာ ကြုံတွေ့နေရတဲ့ နိုင်ငံရေးအကြပ်အတည်းကို ဖြေရှင်းရာမှာ ကူညီပေးဖို့အတွက် အင်ဒိုနီးရှားအစိုးရက နောက်ကွယ်ကနေ ဆောင်ရွက်နေတယ်လို့ ပြောပါတယ်။

အင်ဒိုနီးရှားအစိုးရအနေနဲ့ မြန်မာ့အရေးကို အသံကျယ်ကျယ်လောင်လောင်မထွက်တဲ့ သံတမန်ရေးနည်းနဲ့ ဆောင်ရွက်နေတယ်လို့ အင်ဒိုနီးရှားနိုင်ငံခြားရေးဝန်ကြီး ရက်တ်နို မာဆူဒီက ပြောပါတယ်။

အင်ဒိုနီးရှားအစိုးရက မြန်မာစစ်ကောင်စီနဲ့ရော၊ NUG အမျိုးသား ညီညွတ်ရေးအစိုးရနဲ့ပါ သူတို့ စကားပြောဆို ဆွေးနွေးထားခဲ့ပြီး ဖြစ်တယ်လို့ ဆိုပါတယ်။

လက်ရှိမှာ အာဏာသိမ်းမှု ဆန့်ကျင်တဲ့ လက်နက်ကိုင် ကာကွယ်ရေးတပ်တွေရဲ့ တိုက်ခိုက်မှုတွေကြောင့် စစ်ကောင်စီရဲ့ ထိန်းချုပ်နယ်မြေတွေ လျော့ကျလာနေပြီလို့ သတင်းတွေက ဆိုပါတယ်။

ပြည်သူ့ကာကွယ်ရေးတပ်မတော် PDF စတင်ဖွဲ့စည်းခြင်း နှစ်နှစ်ပြည့်ပြီ

နိုင်ငံတဝန်း PDF တပ်ရင်းနဲ့ စစ်ကြောင်း သုံးရာခန့်၊ ရပ်ရွာအခြေပြု ပြည်သူ့ကာကွယ်ရေးအဖွဲ့တွေကို မြိုန့ယ်ပေါင်း ၂၅၀ ခန့်မှာ ဖွဲ့စည်းထားနိုင်တယ်လို့ ယာယီသမ္မတ ဒူဝါလရှီးလ ပြော

ဒီကနေ့ မေလ ၅ ရက်နေ့ဟာ ပြည်သူ့ကာကွယ်ရေးတပ်မတော် PDF စတင်ဖွဲ့စည်းခြင်း နှစ်နှစ်ပြည့်ပြီဖြစ်ပြီး ပြည်သူလူထုအပေါ် အကြမ်းဖက်နှိပ်စက်ဖမ်းဆီး သတ်ဖြတ်နေတဲ့ အာဏာသိမ်း စစ်တပ်ရဲ့ ဘေးရန်ကနေ လူမျိုးပေါင်းစုံ ပြည်သူလူထုကို ကာကွယ်စောင့်ရှောက်နိုင်ဖို့ ဖွဲ့စည်းတည်ထောင်ခဲ့တာဖြစ်ကြောင်း အမျိုးသားညီညွတ်ရေးအစိုးရ NUG ရဲ့ယာယီသမ္မတ ဒူဝါလရှီးလ ကပြောကြားလိုက်ပါတယ်။

ဖက်ဒရယ်ပြည်ထောင်စုကိုကာကွယ်စောင့်ရှောက်ဖို့နဲ့ ဖက်ဒရယ်ပြည်ထောင်စုလုံခြုံရေးစနစ်ကို ဖော်ဆောင်နိုင်ဖို့အတွက်လည်း မျှော်မှန်းပြီးတည်ထောင်ခဲ့တာလို့ ယာယီသမ္မတက ဆက်ပြောပါတယ်။

မိမိတို့အသက်နဲ့ခန္ဓာကိုမြှုပ်နှံပြီး လူထုလွတ်လပ်ခွင့်အတွက် စွမ်းစွမ်းတမံ တိုက်ပွဲဝင်နေကြသူအပေါင်းနဲ့ ပြည်သူ့ကာကွယ်ရေးတပ်ဖွဲ့ဝင်ကောင်းတွေဖြစ်အောင် ဝိုင်းဝန်းပျိုးထောင်ပေးခဲ့တဲ့ တိုင်းရင်းသားလက်နက်ကိုင် အဖွဲ့ခေါင်းဆောင်တွေကိုလည်း အလေးပြုဦးညွတ်ကြောင်း၊ ဒါ့အပြင် ပြည်သူ့ကာကွယ်ရေးတပ်မတော်ထဲမှာမပါဝင်နိုင်သေးပေမဲ့ မိမိတို့ဒေသတွင်းက ပြည်သူလူထုကို စနစ်ဆိုးအောက်ကနေ ကင်းလွတ်အောင် ကြိုးပမ်းပေးနေတဲ့ ဒေသကာကွယ်ရေးတပ်တွေကိုလည်း လေးစားကြောင်း ပြောကြားသွားပါတယ်။

ဒီနှစ်နှစ်အတွင်း နိုင်ငံတဝန်း နေရာအနှံ့အပြားမှာ PDF တပ်ရင်းနဲ့စစ်ကြောင်း စုစုပေါင်း သုံးရာခန့် ဖွဲ့စည်းထားနိုင်ကြောင်း၊ ပြည်သူ့စစ်တာဝန်ကိုထမ်းဆောင်မယ့်ရပ်ရွာအခြေပြုပြည်သူ့ကာကွယ်ရေးအဖွဲ့ ပကဖတွေကိုမြို့နယ်ပေါင်း ၂၅၀ ကျော်မှာဖွဲ့စည်းတည်ထောင်ထားနိုင်တယ်လို့ ဆိုပါတယ်။

ဒါကြောင့် လူအင်အားအရ တိုက်ခိုက်ရေးအင်အားဟာ စစ်တပ်ထက် သာလွန်အင်အားစုဖွဲ့နိုင်ခဲ့ပြီလို့လည်း သူကဆက်ပြောနေပါတယ်။

တူမီးကနေ စခဲ့တဲ့ ဒီတော်လှန်ရေးမှာ အခုအခါ လက်နက်ခဲယမ်းတွေကို အတိုင်းအတာတစ်ခု အထိတပ်ဆင်နိုင်ခဲ့တဲ့အပြင် ကိုယ်ပိုင်ထုတ်လုပ်နိုင်တဲ့အဆင့်ထိ တက်လှမ်းနိုင်ခဲ့ပေမဲ့ ပွဲသိမ်းတိုက်ပွဲဆင်နွှဲနိုင်ဖို့ လက်နက်ခဲယမ်းအခြေအနေကိုရောက်ဖို့တော့ များစွာ ကြိုးပမ်းရဦးမယ်လို့ ဆိုပါတယ်။

အထူးသဖြင့် လေကြောင်းရန်ကို တန်ပြန်ခုခံတိုက်နိုင်ဖို့ ဗျူဟာမြောက် လက်နက်ပစ္စည်းတွေအလုံအလောက်ရရှိဖို့ ဆက်လက်ကြိုးပမ်းရမယ်လို့ ပြောပါတယ်။

ပြည်သူလူထုငြိုငြင်မုန်းတီးတဲ့ အရာတွေကို ရှောင်ရှားဖို့နဲ့ PDF တပ်ဖွဲ့တွေ အချင်းချင်းကြားကောင်းမွန်တဲ့ဆက်ဆံရေးနဲ့အပြန်အလှန် လေးစားမှုတွေမပြတ် ရှိဖို့ လိုအပ်ကြောင်းလည်း ယာယီသမ္မတက တိုက်တွန်းပါတယ်။

စစ်ကောင်စီကို ခုခံတော်လှန်ရာမှာ တစ်ကြောင်းတစ်ဂါထာ တစ်ရွာတစ်ပုဒ်ဆန်း ဖြစ်နေလို့မရကြောင်းနဲ့ ပိုမိုစုစည်းညီညွတ်အားကောင်းတဲ့ စစ်ရေးမဟာဗျူဟာထီးရိပ်တစ်ခုတည်းအောက်မှာ ခုခံတော်လှန်ဖို့လိုအပ်ကြောင်းလည်း သူက တိုက်တွန်းပါတယ်။

အရှိန်မြှင့်တက်လာတော့မယ် တော်လှန်ရေးမှာ ပြည်သူလူထုအနေနဲ့လုံခြုံရေးသတိအသိထားပြီး ပြည်သူကာကွယ်ရေးတပ်မတော်ကို ထောက်ပံ့ပေးဖို့လည်း ယာယီသမ္မတက တောင်းဆိုခဲ့ပါတယ်။

ရှမ်းကယားအစပ် တောင်စလုံးတိုက်ပွဲ ဘယ်လိုအခြေအနေဆက်ဖြစ်နေပါသလဲ။