Matrix 4 çəkiləcək: baş rollarda Keanu Reeves və Carrie-Anne Moss olacaq

Dünyanın ən böyük kino film və televiziya şirkətlərindən biri olan Warner Bros bir dövr çox məşhur olan elmi-fantastika filmi Matrix-in dördüncüsünün çəkiləcəyini açıqlayıb.

Matrix 4-də baş rollarda yenə Keanu Reeves və Carrie-Anne Moss olacaq.

Keanu Reeves "Neo", Carrie-Anne Moss isə "Trinity" rollarını canlandıracaq.

Warner Bros və Village Roadshow Pictures ortaqlığı ilə çəkiləcək filmin rejissoru və senari müəllifi Lana Wachowski olacaq.

Matrix 4-ün əvvəlkilərin "davam filmi" olub-olmayacağı isə açıqlanmayıb.

Warner Bros sadəcə filmin "Matrix dünyasında baş verəcəyini" bəyan etməklə kifayətlənib.

Matrix 4-ün nə zaman çəkiləcəyi və göstəriləcəyi hələki açıqlanmayıb.

Filmin nümayişindən 1 milyard 600 milyon dollar gəlir olub

"Biri var baş verən həqiqət, biri də var baş verəndən uzaqdakı həqiqət" anlayışı ətrafında hazırlanan Matrix filmlərinin ilki 20 il əvvəl çəkilib.

ABŞ-da bu ay filmin xüsusi nümayişlərlə yenidən göstərilməsi planlaşdırılır.

Matrix filmlərindən üçüncüsü olan "The Matrix Revolutions" 2003-cü ildə dünya üzrə eyni saatda nümayişə təqdim olunan ilk film olub.

Matrix filmlərinin hər üçünün birlikdə nümayişindən əldə olunan məbləğ 1 milyard 600 milyon dollar olub.

"Matrix Revolutions" filminin axırında insanla texnika arasındakı müharibə həssas bir həll yolu ilə başa çatmışdı.