Tiraamp waliin kan wal dhaban Zeleniskiin UK'tti 'deeggarsa guutuu' argatan

Haguuggii Tamsaasa Kallattii

1. 1 Bitooteessa 2025Warri Yukireen aariin walitti dubbachuu Waayit Hawus keessa tureef deebii kennan

   Dubbii aariin walga'ii Zeleniskiifi Tiraampii fi itti-aanaa isaa Waayit Hawus keessatti turerratti Yukireenonni miirasaanii ibsataniiru, deebiis kennaniiru.

   Xiinxalaan siyaasaa Voloodmiir Fesenkoo TV Yukireen irratti akkas jechuun warra Yukireenitti dubbate: "Naasuun Pirezidant Zeleniskiin keessa ture akka hin hin milkoofne godheera. Kana caalaa of to'achuufi tasgabbaa'uun irra ture, keessumaa pirezidantii itti aanaa JD Vaans waliin. Akkuma kanas osoo Tiraamp waliin falmuu dhiiseera ta'ees baayyee gaarii ture."

   Gaazexeessaan Yukireen Illi'aa Ponomarenkoo akkuma kana haala jiru madaaluun akkas jedhe: "Baayyee kan nama qaanessudha. Isaan qaanii tokko malee wan tokko irraa arganna jedhanii Zeleniskiirra dubbii barbaadu," jechuun fuula X isaarratti barreeesse.

   "Kun hundi ammoo ija guutummaa addunyaa duratti osoo miidiyaan addunyaa kallattii tamsaasaa jiruu kan ta'edha. Zeleniskiidhaan cabsuudhaaf waan lafarra jiru isaan hin goone hin jiru."

   Aanga'oonni Yukireenis akkuma kana deebii kennaniiru. Bulchaan bulchiinsa naannoo Liviiv Maaksimii Koziitiksii akkas jechuun barreesse:"Taatee Waashingitenitti ta'aa ture kallattiin dhimmeen hordofaan ture. Ingilaand nama onnee leencaa qabu Richaard qabdi ture, nuti ammoo nama onnee leencaa qabu Voloodmiir qabna.

2. 1 Bitooteessa 2025Wal dhibdeen Tiraamp fi Zeleniskii rakkoon guddaan NATO keessa jiraachuu agarsiisa

   Hariiroon Doonaald Tiraamp fi Voloodmiir Zeleniskii osoo Waajira Ovaal keessatti aariin afaan keessa wal hin ba'iiniyyu gaarii hin turre.

   Pirezinat Traamp dursee Zeleniskiidhaan abbaa-irree ittiin jechuun waraanallee Yukireenitu jalqabe jedhee ture. Garuu kun sobadha.

   Hariiroon US-Yukireen Joo Baayiden kunuunsaa ture amma cicciteera.

   Waldhabdeen amma addabaabayiirratti irratti ifatti mul'ate kun miseensota NATO Awurooppaa fi Ameerikaa gidduu rakkoon cimaan dhalachaa jiraachuudha.

   Nageenya Awurooppaa Yukireeniin ala ta'aniif qophii US qabdu ilaalchisuun shakkiifi gaaffii baayyeetu jiraatu.

   Wanti guddaan waadaa dursaan isaa Harii Tiruumaan bara 1949 seenan kan yaaddoon haleellaa michoota NATO akka haleellaa Ameerikaa irratti gaggeeffameetti ilaalama jedhu ni eegamoo ni cabsa kan jedhudha.

   Yaaddoowwan kunneen murtoo Tiraam hariiroo cimaa pirezidantii Raashiyaa Vilaadmiir Puutin waliin qabu deebisuuf jdhurratti kan hundaa'udha.

   Puutiniif carraa kennaa Yukireen irratti ammoo dhiibbaa gochaa jira.

   Isaaf nageenyi Yukireen dhimma lammaffaa ta'ee mul'ata.

3. 1 Bitooteessa 2025Ministirri Dhimmaa Alaa US Maarkoo Ruubiyoo Zeleniskiin dhiifama gaafachuu qaba jedha jedhe

   Ministirri Dhimma Alaa US , Maarkoo Ruubiyoo CNN irratti gaaffiifi deebiif dhiyaatee, walga'iin Pirezidant Doonaald Tiraamp fi Voloodmiir Zeleniskii gidduu ture 'qaaniidha' jechuun ibsuun hogganaan Yukireen dhiifama gaafachuu qaba jedhe.

   "[Zeleniskiin] hanga sana deemee faallaa dhaabbatee falmuun isarra hin jiraatu ture," jedhe Ruubiyoon.

   “Waa’ee sanaa cimsitee dubbachuu yeroo jalqabdu – pirezidaantichis nama waliigaltee uumuudha, jireenya isaa guutuu waliigaltee hojjete – namoota gara mariif gara minjaalatti hin fiddu,” jedhe.

   "Yeroo akkasii, Zeleniskiin nagaa hin barbaadu ta'a jettee yaaduu jalqabda. Nagaan barbaada jedheera garuu dhugaatti kan barbaadu ta'uu dhiisuu mala," jedhe RTuubiyoon.

4. 1 Bitooteessa 2025Waraana Raashiyaa -Yukireen: NATOn humna hangamii qaba? Maalifi Raashiyaaf bowwuu mataa ta’e?

   Raashiyaan Yukireen weeraruun qormaata NATOn waggoota 73 keessatti argee hin beekneefi isa mudatee hin beekne itti ta'eera.

   Waraanni yeroo ammaa Raashiyaan Yukireen keessatti gaggeessaa jirtu kun daangaa biyyoota miseensota NATO ta'an irratti yoo ta'u, biyyoonni miseensota NATO ta'an hangi tokko itti aanee ammoo Raashiyaan waraana nurratti banti jedhanii yaaddoo qabu.

   Ameerikaa, Kanaadaa, Yunaayitid Kingidom, Firaans, jarman fi biyyoota Awurooppaa baayyee miseensummaan kan qabateeru NATOn Baha Awurooppaa keessa loltoota dabalataa sochoosaa jira.

   UK fi Yunaayitid Isteet garuu loltoota gara Yukreenitti galchuuf karoorri kamiyyuu akka hin jirre ibsaniiru.

   Garuu NATOn maali?

   NATOn humna hangamii qaba? Maalifi Raashiyaaf bowwuu mataa ta’e?

5. 1 Bitooteessa 2025'Yoo abidaafi dhiibbaa akasii keessatti mari'atame malee baayyeen hin baramu'- Tiraamp

   Pirezidantiin Ameerikaa Doonaald Tiraamp erga gitasaanii Yukireen Volodmiir Zeleniskii waliin osoo mari'atamuu miira aariitiin adda bahanii booda ''har'a walgahii baayyee hiika guddaa qabu Waayit Haawusitti taasifanneerra'' jedhan.

   Tiraamp erga ibsi waloo Zeleniskii waliin gaazexessitootaaf kennuuf turan haqamuun ibsameen booda, barreeffama X irratti barreessaniin, ''marii abiddaa fi dhiibbaa akkasii keessatti yoo ta'e malee gonkumaa hin hubatamne baayyee baranneerra'' jedhan.

   Waanti miira keessaa dhufe baayyee ajaa'ibsiisaadha kan jedhan Tiraamp, ''Ameerkaan yoo keessa jiraatteeZeleniskiin nageenyaaf qophii akka hin taanee ani mirkana'' jedhan.

   Itti dabalunis, sababiinsaas ''nuti jiraachuun keenya faayidaa olaanaa akka kennuuf itti dhagahama'' jedhan.

   ''Ani faayidaa hin barbaadu, Ani nagaan barbaada malee'' jedhan.

   Tiraamp waajjiira kabajamaa Ovaalii keessaatti Ameerikaa salphisee. Yeroo nagaadhaaf qophii ta'eetti deebii'ee dhufuu danda'a'' jechuun Zeleniskii himatan.

6. 1 Bitooteessa 2025Tiraamp 'Waraana Addunyaa Sadaffaa waliin qumaara taphata' jechuun Zelenskii himatan

   Doonaald Tiraamp Waayit Haawusitti Voloodmiir Zeleniskii simatanii aariin walitti dubbachuurra darbanii miira walitti bu'insaan gargar deebiyan.

   Pirezidant Tiraamp Pirezidant Zeleniskiin Raashiyaa waliin waliigaltee taasifamu kana fudhadhu ta'uu baannaan ''nuti keessaa baana'' jechuun itti hime.

   Marii waliigaltee albuudaa mallatteessuun dura Waayit Hawus keessatti taasisaniin, dubbii afaanirratti wal qabuun addaan walirratti kukkutaa turan.

   Erga jalqaba Tiraamp marii nagaa Yukireen Raashiyaa waliin taasifamu akkamitti akka qabataniin ilaalchisee wal dhabdeen uumamee booda, waliigalteen albuudaa kun hariiroo nageenyaa biyyoota kanaa dabalataaf tarkaanfii ta’uu qaba ture.

   Haata'u malee, Zeleniskiin waliigalteen kun osoo hin mallattaa'iin gadhiisanii bahan.

   Yeroo aariin walitti dubbachaa turanitti, Pirezidant Tiraamp gitasaanii Pirezidant Zeleniskiidhaan humna waraanaa US fi gargaarsa siyaasaa taasifameef galata hin qabdu jechuun himate.

   Itti dabaluunis, Waraana Addunyaa Sadaffaa waliin qumaara taphachaa jirata" jechuun Zeleniskii hadheeffate.

7. 1 Bitooteessa 2025Qondaalli Raashiyaa Zeleniskiin 'kaballaa' argateera jedhan

   Qondaaltonni Raashiyaa tokko tokko walga’ii har’a US Waajjira Ovaal keessatti geggeeffame hordofuun deeggarsa Tiraamp'f dhiyaataa jiru.

   Itti aanaan itti gaafatamaan mana maree nageenyaa Raashiyaa Dimitrii Medvedeviin, haasaa waljijjiirraa Tiraamp, Vaansii fi Zeleniskii gidduutti taasifameen yeroo muraasa booda barreeffama toora X irratti barreesseen, Zeleniskii "dhuma irratti Waajjira Oval keessatti kaballaa sirrii ta'e argateera.

   Akkasumas @realDonaldTrump sirrii'dha: Mootummaan Kiiyiv 'Waraanaa Addunyaa sadaffaa (WWIII) waliin qumaara taphachaa jira.'" jechuun barreesse.

   Yeroo waldhabdee kanaatti Tiraamp waa’ee balaa Waraana Addunyaa Sadaffaa ilaalchisee Zeleniskii’f yaada wal fakkaatu dubbataniiru.

8. 28 Guraandhala 2025Seenaatarri US waldhabdee Waayit Haawus booda Zelenskiin akka aangoo gadhisuuf gaafate

   Senaatar Liindisii Giraaham sa'aatii muraasaan dura Waajjira Ovaaliin alatti haasaa taasisaniin, ilaalchi inni Zeleniskii irratti qabu akka jijjiirame ifaa ture.

   Duraan ittisaa cimaa Yukireen kan turan Giraaham, ammaammoo Zeleniskiin aangoo gadhiisuu akka qabu ykn namni gara biraa marii kanaaf dhiyaachuu akka qabu gaazexeessitootatti himan.

   Senaatarichi itti dabaluu, Zelenskiin waliigaltee osoo hin mallatteessiin dura waa'ee dhukaasa dhaabuu ykn yaaddoo nageenyaa kaasuu qaba ture jedhee hin amanu jedhan.

   Akkasumas, gaaffiifi deebii Fox News waliin taasisaniin, Zeleniskiin lammiilee Ameerikaa ''dhiifama akka gaafatu'' gaafateera, kunis galgala kana gara boodaatti eegama.

9. 28 Guraandhala 2025Ministirri dhimma alaa Yukireen 'gootummaa fi cimina' Zeleniskii faarsan

   Ministirri Dhimma Alaa Yukireen Andirii Saaybihaa, pirezidaantichi Waayit Haawus gadhiisanii saffiisaan bahuu isaanii hordofee, Volodymiir Zeleniskiin ''waan sirrii ta'eef dhaabbachuuf nama gootummaa fi cimina qabudha,'' jechuun leellisan barreeffama toora X irratti barreesseeniin.

   Itti fufuun Siibihaan, “Inni Yukreeniif, akkasumas galma nagaa haqa qabeessaa fi waaraa ta’eef ni dhaabata,” jechuun Yukireen, “yeroo hunda Ameerikaa deeggarsa isheef galateeffatteetti, galateeffachuus itti fuftis” jedhan.

10. 28 Guraandhala 2025Yeroo Zeleniskiin Waayit Haawus gadhiisanii bahanitti

    Doonaald Tiraampiifi Volodmiir Zeleniskii marii Waayit Haawusitti gochuuf turan irratti aariin walitti dubbachuun, Zelenskiin jidduutti maricha dhiisanii bahan.

    Yeroo bahaniitti haalli ture viidiyoon kana fakkaata.

11. 28 Guraandhala 2025Hoggantoonni Awurooppaa waldhabdee Tiraamp fi Zeleniskiirratti deebii kennan

    Hoggantoonni biyyoota Awurooppaa muraasni dubbii aarii Tiraamp, Vaansii fi Zelenskii gidduutti uumamee irratti deebii kennuu jalqaban.

    Ministirri muummee Poolaandiii pirezidantiin duraanii Mana-Maree Awurooppaa Doonaald Taask barreeffama toora X irratti baasaniin, Zeleniskii maqaa dhahuudhaan, "kabajamtoota lammiilee Yukireen hiriyyootaa, isin kophaa miti" jedhan.

    Waa'ee waldhabdee Tiraampiifi Zeleniskii jidduutti mudate kanaaosoo Poorchugaal jiranii kan gaafataman Pirezidaantiin Faransaay Imaanu'eel Maakroon miidiyaa Faransaayitti akka himanitti, Raashiyaan weerartuufi ummanni Yukireen warra haleellaan irra ga'aa jiru ta'uu ibsan.

    Itti dabaluudhaanis, biyyoonni Awurooppaa fi michoonni biroo waggaa sadii dura Yukireen gargaaruu fi Raashiyaarra qoqqobbii kaa'uu fi itti fufuun sirrii akka turan dubbatan.

    Akkasumas, warra jalqabarraa kaasee kabaja, mirgaa fi nageenya Awurooppaa isaaniif qabsaa'aa turan "kabajuun" barbaachisaa ta'uu dubbatan.

12. 28 Guraandhala 2025Amma nu gahe, Zelenskiin yeroo afur Tiraampii fi US galateeffatan

    Donaald Tiraamp waliin erga wal arganii booda yaada jalqabaa kennaniin, prezidaantiin Yukireen Volodimiir Zelenskiin gita isaanii Ameerikaa fi lammiilee Ameerikaa irra dedebiin yeroo hedduu galateeffatan.

    (Yaada bu'uuraatiif: Tiraamp kanaan dura Zelenskiin deeggarsa Ameerikaaf "galateeffachuu" akka qaban kan himan yoo ta'u, itti aanaan pirezidaantii Ameerikaa, JD Vaansi walgahii kana irratti galatoomaa jechuu dhiisuu isaaniitiif komatan.)

    Barreeffamni Zelenskii toora X irratti barreessan guutummaatti kunooti:

    "Ameerikaa galatoomi, deeggarsa nuuf gootaniif galatoomaa, daawwannaa kanaafis galatoomaa."

    "@POTUS, Kongiresii fi ummanni Ameerikaa galatoomaa. Yukireen haqaa fi nagaa waaraa barbaaddi, kanaafis sirriitti hojjechaa jirra."

13. 28 Guraandhala 2025Viidiyoo yeroo aanga'oonni US fi Zalanskiin aariin walitti dubbatan agarsiisu

    Yeroo Zelenskii, Vaansii fi Tiraamp dhimma Yukireen irratti aariin walitti dubbatan miira ture kana ilaalaa.

14. 28 Guraandhala 2025Amma nu gahe, Waliigalteen albuudaa hin mallattoofne- Waayit Haawus

    Waliigalteen albuudawwan qaalii Ameerikaa fi Yukireen gidduutti Ameerikaan akka mallattaa'u yaada dhiheessite hin mallattoofne jedha dubbi himaan Waayit Haawus.

    Har’a gara ganamaa Tiraamp, isaaniifi Zeleniskii wayita ibsa waloo gaazexeessitootaaf kennaniitti waliigalticha akka mallatteessan kan dubbatan yoo ta’u, ergasii ibsi sun ni haqame.

15. 28 Guraandhala 2025Dhugaadha dhukaasa dhaabuun barbaada, garuu wabii waliin - Zelenskii

    Haasaa aarii walitti masaraa US keessatti Tiraamp fi Zelenskii gidduutti taasifamaa ture irratti odeeffannoo dabalataa isiniif fiduu itti fufna. Dabalataaf barreeffamoota keenya muraasa darban keessa deebiin kunooti:

    "Osoo yeroo ammaa kana dhukaasa dhaabuu argachuu dandeessee, akka rasaasni balali'uu dhaabuuf fudhadhun siin jedha," jedhan Tiraamp.

    Zelenskiin ammoo akkas jedha: "Dhugaadha waraana dhaabuun barbaada."

    Tiraamp dubbiisaa addaan kutuudhaan: "Dhukaasa dhaabuu hin barbaaddu jetta."

    Zelenskii ammoo waliigaltee dhukaasa dhaabuu ''wabii'' qabu akka barbaadu dubbata.

    Innis ummanni Yukireen waliigaltee dhukaasa dhaabuu irratti maaltu akka itti dhagahamu akka gaafatan Tiraampitti hima.

16. 28 Guraandhala 2025Ibsi waloo Tiraampiifi Zeleniskii haqame

    Ibsi waloo pirezidant Ameerikaa Doonaaldi Tiraampiifi Volodmiir Zeleniskiin marii isaanii booda kennuuf turan haqame.

    Waayit Haawus marii muddamaan guute booda ibsi waloo haqamuu beeksise.

17. 28 Guraandhala 2025Zeleniskiin dhukaasa dhaabuu wabii qabu akka barbaadu Tiraampitti hime

    Masaraa US keessatti mariin Tiraampiifi Zeleniskii waliin godhame inni ijoon waayee dhukaasa dhaabuurratti ture.

    Tiraamp dhukaasa dhaabuutti amma yoo waliigaltee, akka fudhattun sitti hima achiis rasaasni samiirra yaa'u ni dhaabata jedhaniin.

    Zeleniskiin dhugaadha waraana dhaabuun barbaada jedhee deebise.

    Tiraamp hasaa isaa gidduu galuun dhukaasa dhaabuu hin barbaadu jettee? jechuun gaafatan.

    Achiis Zeleniskiin dhukaasa dhaabuu wabii wajjin akka barbaadan hime.

18. 28 Guraandhala 2025Zeleniskiin ''US masaraa isa adii keessatti kabaja dhowwate' - Tiraamp

    Pirezidantiin US Doonaald Tiraamp mariin Pirezidantii Yukireen Zeleniskii waliin godhame xumuramuu booda miidiyaa hawaasaa gubbaatti ibsa baasan.

    Walgahii ''hiika qabu'' ittiin jedhan kanarraa ''waan hedduun baratameera'' jedhan. Osoo wal arguu baatanii waan osoo hin hubatanii hafan hubachuu himan.

    Maxxansa Truth Social irratti baasaniin dhiibbaa guddoo jalatti marii gaggeefameerraa ''miira keessa wanta hedduun baheera'' jedhan.

    ''Ameerikaan keessa galti yoo ta'e nagaa buusuuf Zeleniskiin qophii akka hin taane hubadhe.'' Sababni isaas Ameerikaan yoo keessa jiraatte hiree gaarii qabachuu amanaa jedhen.

    Ammoo ''ani hiree osoo hin taane nagaan barbaada'' jedhan.

    Ibsa isaanii gara dhumaattis ''Yunaayitid Isteetsiin masaraa isa adii keessatti kabaja dhowwate'' jedhan.

    ''Nagaaf yeroo qophii ta'u deebi'ee dhufa'' jedha ibsi isaanii dhumarratti.

19. 28 Guraandhala 2025Tiraamp Zeleniskiidhaan galateeffadhu jedhan

    Pirezidantiin Yukireen Vilidimiir Zeleniskii Waayit Haawus gahanii gita isaani Tiraamp waliin mariitti jiru.

    Akk rippoortarootni jedhanitti pirezidantii itti aanaan US Zeleniskiidhaan ''kabaja namaa hin laatan'' jechuun komataniiru.

    Tiraamp ammoo itti aansuun ''Waraana Addunyaa Sadaffaatiin tirgaa taphata'' jedhan.

    Marii isaanii gara xumuraatti ammoo Tiraamp nama galataa akka hin taane itti himan.

    Zeleniskiinis bayyeen galateeffadhaa jedhe.

    Tiraamp waraana kana keessatti Yukireeniif deeggarsa godhan ilaalchisee yaada kennaniin waraanicha goolabuu waan fedhaniif meeshaa waraanaa ergu itti fufaniis deeggarsichi hir'ataa akka deemu himaniiru.

    Zeleniskiin gama isaan Pirezidantii Raashiyaa Vilaadimiir Putiin waliin marii nagaarratti waliigalteerra gahuun rakkiisaa ta'uu dubbate.

    Miidhaa waraanni irraan gahe suuraan agarsiisuun ''Tiraamp ni cinaa jira jennee yaadna'' jedheera.

20. 28 Guraandhala 2025Maakroon lammiileen Awurooppaa 'gammachiiftota' US ta'u akka didan akeekkachiisan

    Pirezidaantiin Faransaay Imaanu'eel Maakroon, daawwannaa mootummaa guyyoota lamaaf Poorchugaal keessatti taasisaniin, lammiileen Awurooppaa "yeroo kamiyyuu caalaa tokkummaa fi ciminaan" akka of agarsiisaniif gaafachuu AFP fi miidiyaaleen biyya keessaa gabaasan.

    Kamisa kaleessaa waa'ee US wayita dubbataniitti ammoo, ''harka kennachuun deebii miti'' jechuun akeekkachiisaniiru, itti dabaluunis ''qabeenyaa gammachuu akka hin taane'' ibsaniiru.

    Awurooppaanonni ''miira balaa, hawwii fi aangoo irra deebiidhaan akka baran'' dhaamaniiru. Dhimma Yukireen fi gibiira gumurukaa irratti akkasumas waa'ee Doonaald Tiraamp irrattis raaguu dadhabuu kaasan.

    Akka yaadachiisaatti, Maakroon hoggantoota sadii torban kana Tiraampiin waliin wal arganii dhimma waraana Yukireen irratti mari'atan keessaa isa jalqabaa ture.

    Marii Wiixata darbe taasifame irratti Maakroon biyyoonni lamaan akkamiin nagaa akka barbaadan dubbachuudhaan, Awurooppaan nageenya mataa isheetiif itti gaafatamummaa dabalataa fudhachuu akka qabdu waliigalan.

    Erga yeroo sanaatii as,Ministiirri mummee UK Kiir Istaarmar pirezidantii Ameerikaa waliin kan wal argan yoo ta'u, nagaa Yukireen mirkaneessuu irraa kaasee hanga waliigaltee UK Chagos irratti kan mari'aniiru.

    Har'a ammoo Pirezidantiin Yukireen Volodymiir Zelenskiin Doonaald Tiraamp waliin mari'achuuf Waayit Haawusitti eegamaa jirra.