Iraan buufata UK-US, Diyeegoo Gaarsiyaatti misaa'ela dhukaaste

Haguuggii Tamsaasa Kallattii

1. 20 Bitooteessa 2026US loltoota dabalataa kumaan lakkaa'aman Baha Giddugaleessaatti erguuf -Gabaasa

   

   Madda suuraa, Getty Images

   Gabaasaaleen hedduun US loltoota galaanarraafi dooniirra hojjetan dabalataan kumaan lakkaa'aman Baha Giddugaleessaatti bobbaafamaa jiraachuu aanga'oota maqaan hin dha'amne eeruun mul'isaniiru.

   Loltoonni US galaanarra hojjetan 2,500 Kaalifoorniyaa buufatee kan jiru USS Boxer gareen Humna Galaanaa 11th jedhaman gara Baha Giddugaleessaa deemaa jiraachuu miidiyaa US gabaasan.

   Aanga'aan tokko Rooytarsitti akka himetti, bobbiin qarqara lixaa irraa ta'e kun guyyaa karoorfame torban sadii dursee raawwatame.

   Buufanni waraanaa Ameerikaa gurguddoon Baha Giddu Galeessaa keessa eessa jiru?

2. 20 Bitooteessa 2026Iraan Turkiifi Omaan irratti haleellaa hin raawwanne - Mojtaabaa Kaameenii

   

   Madda suuraa, AFP via Getty Images

   Hogganaan Olaanaa Iraan olloota kallattii bahaan jiran waliin ''baayye walitti dhihaanna,'' jechuun Paakistaan biyya abbaansaa ''hundarra caalsifatu'' akka tahe hime.

   Paakistaaniifi Afrgaanistaan gidduu hariiroon fooyya'aa akka jiraatu waamicha dhiyeessuun gamasaan ''tarkaanfii barbaachisu fudhachuuf'' qophii akka tahe hime.

   Yeroo waraana kanatti biyyoota nuyi hariiroo gaarii waliin qabnu''Turkii fi Omaan'' irratti haleellaan raawwate humnoota Rippaabliika Islaamaan kan raawwate miti,'' jedhe.

   Dhimma kanarratti Israa'el haasaa ''gowwomsaa'' taphachuun Iraaniifi ollootashee qoqqooduu feeti jechuun himate.

   Mojtaabaa Kaameeniin jalqaba baatii kanaatti abbaasaa Israa'eliin ajjeefame bakka bu'uun aangoo kan dhaale yoo tahu, erga aangoo qabatee qaamaan mul'atee hin beeku, suuraa kaafamee, viidiyoos waraabamee hin beeku.

   Ergaan inni barreefamaan dabarsu miidiyaalee Iraaniin dabarfama.

3. 20 Bitooteessa 2026Hogganaan Olaanaa Iraan ergaa barreefamaa dabarse

   

   Madda suuraa, IRINN

   Hogganaan Olanaa Iraan Mojtaabaa Kaameenii ergaa barreefamaa kabaja bara haaraa Parshiyaa Noowruuz irratti dabarse TV biyyaalessaa irratti sagalee guddaan dubbifameera.

   Ergaan dabarse kan fuula sagal qabu yoo tahu miidiyaalee Iraaniin maxxanfameera.

   Ergaa isaa keessatti bara kana Iraan waraana sadii keessa darbaa jirti jechuun haleellaa Israa'el Waxabajjii darbe raawwatte, waraana amma adeemaa jiruufi mormii mootummaa irratti Mudde darbe ka'e kaaseera.

   Kanneen mootummaa deeggaran jajuun, uummati bara haaraa Parshiyaa Noowruuz yeroo kabaju abbaa isaa ajjeefame Ayaatoolaa Alii Kaameenii yaadachuun akka tahu ergaa dabarseera.

   Abbaasaa gaafa Guraandhala 28 ajjeefame ''wareegama gaddisisaa hogganaa jaalatamaa,'' jedheera.

   Kaameeneen dhaadannoo bara kanaa ''Diinagdee Diddaa Gaaddisa Tokkummaa fi Nageenya Biyyaalessaa jalatti, '' jedhu baaseera.

4. 20 Bitooteessa 2026'Warra Iraanitti dubbachuu barbaanna garuu namni itti dubbatan hin jiru' - Tiraamp

   

   Tiraamp humna galaanaa, humna qilleensaa, raadaariifi hoogganooti Iraan tarreessuun booda ''hunduu hin jiran,'' jedhe.

   ''Achitti namni hogganaa tahuu barbaadu hin jiru kana booda,'' jedhe pireezidantichi.

   ''Nuti waliin dubbachuu barbaadna garuu namni itti dubbatan hin jiru,''

   Dabaluunis, ''sunimmoo nutti tola,'' jedhe.

   Iraan Baha Gidduugalaa dhuunfachuu feeti jechuun booda, ''meeshaa waraanaa nukilaaraa otoo qabaatanii itti fayyadamu ture,'' jechuu irra deebiin dubbate.

   Ameerikaan sana dhaabuun irra ture, ''kanammoo fagoo dur raawwachuu qabna ture,'' jedhe.

5. 20 Bitooteessa 2026Tiraamp michootasaa warra NATOn 'dabeeyyii' jedhe

   

   Madda suuraa, Reuters

   Pirezidantiin US Doonaald Tiraamp michootasaa miseensa NATO ta'aniin ''dabeeyyii'' jechuun waame. Osoo duulanii silaa Ulaan Hormuuz ni banama jedhe.

   Tiraamp dhaamsa Truth Social irratti qoodeen silaa dooniiwwan nagaan ulaa Hormuuz keessa bahuuf ni salpahataaf ture jedhe.

   ''USAn alattii NATOn maqaa qofa, waraana Iraan kan niikuleera qabdu waliin godhamutti makamuu hin feene jedhe.

   ''Amma waraanicha mooneerra, isaaniif balaa xiqqaatu jira, rakkoo qaala'uu boba'aa irraa dubbatan kanaaf gatii ni baasu, garuummoo Ulaa Hormuuz banuuf gargaaruu hin barbaadan, silaa sochii waraana murtaahetu gatii boba'aa qaalesse.

   ''Wanta salphaa, balaa xiqqaa waliin gochuu danda'aiindha. DABEEYYIIDHA, nutimmoo KANA NI YAADANNA!'' jedhe.

6. 20 Bitooteessa 2026Addunyaan seenaa keessatti rakkoo wabii annisaa guddaatu mudata-Ejansii Aannisaa Addunyaa

   

   Madda suuraa, Reuters

   Hogganaan Ejansii Aannisaa Addunyaa mootummooti fayyadama annisaa irratti ''jala muranii'' dubbachuu qabu, sababiinsaas ''addunyaan seenaa keessatti rakkoo wabii aannisaa guddaatu mudachaanii jira,'' jedhe.

   Faatih Birool gabaasa dhaabbati kuni (IEA'n) baase eeruun boba'aa daldalaafi manaaf faayidaarra oolu hir'ichuu qaba jedhe. Saffisa konkolaataan itti oofamu hir'isuu, manaa hojjechuu fa'i gorseera.

   ''Fayyadama boba'aa hir'isuun daldalaaf, maamilootaafi lammiileef gaarii dha, diinagdee isaanii gargaara,'' jedhe.

   Dhaabbanni IEA jedhamu bara 1970 yeroo dhiyeessiin boba'aa rakkoo keessa seene diinagdee addunyaaf dhiyeessiin gahaa akka jiraatu gochuuf ture kan hundaa'e. Danqaan waraana US fi Israa'el Iraan irratti jalqaban garuu ''akkaan guddaa dha,'' jedhe Faatih.

   ''Jijjiiramni boba'aa yeroo Raashiyaan Yukireen weerarate mul'ate inni miilanaa ni caala. Rakkoon guddaan kan mudatu xaa'oofi boba'aa fa'i irratti dha,'' jedhe.

   ''Addunyaan rakkoo aannisaa mudachaa jiru hangam bal'aa akka tahe hin hubanne,'' jedhe.

   Mootummooti biyyootaa ''dhimma kana jabeessanii hubachiisuu qabu, kunis hanga muraasa garagaara,'' jedhe.

   ''Gama biraan aannisaa haarofamu fi biyya ofiitti oomishamu dabaluu qabna,'' jechuun beeksise.

7. 20 Bitooteessa 2026Artist Daawwitee Mokonniin wallee sirbuu dhaabuuf jedhaa?

   Maxxansa YouTube irra dabri

   Qabiyyee Google YouTube hayyamtaa?

   Barreeffamni kun qabiyyee [social_media-site]n dhiyaatan qaba. Tarii 'cookies' fi teknolojiiwwan biraa fayyadamuu waan danda'aniif, osoo tokkoonsaa gadi hin buufamiin dura hayyama keessan gaafanna. Osoo hin simatin dura Google YouTubeimaammata cookies fi imaammata mateenyaa dubbisuu barbaadda ta'a. Qabiyyee kana ilaaluuf 'waliigaluun itti fufi' filadhu.

   Accept and continue

   Hubachiisa: Qabiyyee marsariitiiwwan alaatiif BBCn itti gaafatamummaa hin fudhatu. YouTube beeksisa qabaachuu danda'a.

   Xumura maxxansa YouTube

   Artist Daawwitee Mokonniin weellistoota fakkeenya ta'aniif keessaa tokko weellisaa Tsaggaayee Danda'aa ta'u dubbate.

   Daawwiteen wallee xiqqeessaa jiraa? Wallee isaa keessaa kam jaalata? Kutaa lammaffaa turtii addatti BBC waliin taasise kunooti. Dhihaadhaa!

8. 20 Bitooteessa 2026Saa'ud Arabiyaa 'obsi koo kan daangaa hin qabne miti' jette - Biyyoonni Galoo Galaanaa haaloo bahuufii?

   

   Madda suuraa, Reuters

   Sa'ud Arabiyaan yoo Iraan itti fuftee bu'uraaleen misoomaa kan haleeltu taate haaloo bahuuf akka dirqamtu yaadaa jiraachuu himte.

   "Obsi keenya kan daangaa hin qabne miti," jechuun ministirri dhimma alaa Sa'ud Arabiyaa Faayisal Biin Farhaan dubbateera.

   Biyyi isaafi michoonni Galoo Galaanaa Arabaa barbachisaa taanaan deebii kennuuf humna barbaachisu" ni qabu jedhe itti dabaluun.

   Biyyoonni Galoo Galaanaa humna qilleensaa cimaa kan baasii guddaatiin US, Biriteen fi Faransaay irraa bitatan ni qabu.

   Haata'u malee, humna waraanaa waloo US-Israa'el Iraan irratti banan kanatti makamuun ammoo balaa salphaa hin taane qaba.

   Iraan haleellaa biyyoota Galoo Galaanaa keessatti gaggeessa ajirtu baballisaa kan jirtu yoo ta'u, xiyyeeffannaashees bakkawwan akka gamoowwan mootummaafaarratti ballisuu dandeessi.

   Kun taanaan ammoo ilaalchi ummata biyya keessaa dhimma ilaalcha keessa galuu qabudha.

   Lammileen Sa'udii jaalala biyyaa cimaa kan qaban ta'ulleen, yoo mootummaan gama Israa'el goree waraana biyya biraa ummanni Musliimaa guddaan keessa jiraturratti gaggeefamnaan itti gammaduu dhiisuu danda'u.

9. 20 Bitooteessa 2026Lammiin Iraan buufata humna galaanaa UK yeroo seenuuf yaalu qabame

   

   Madda suuraa, PA Media

   Lammiin Iraan dubartii biraa tokko waliin buufata humna galaanaaa UK iddoo meeshaaleen waraanaa niwkilaaraa biyyatti jiran yeroo seenuuf jedhan qabaman.

   Poolisiin Iskootilaand dhiirri ganna 34 fi dubartiin ganna 31 buufata humna galaanaa HM jedhamutti kaleessa Kamisa guyyaa keessaa sa'atii 11:00 to'ataman jedhe.

   Dubbihimaan humna galaanarraa qorannoon irratti geggeefamaa jira jedhe.

   Humni galaanarraa UK Rooyaal Neevii, shakkamtoonni ''buufata kana seenuuf yaalii hin milkoofne taasisan,'' jedhe.

   Dubbii himaan kuni dabaluunis: ''Dubbiin qorannoorra waan jiruuf yaada dabalataa hin kenninu, '' jedhe.

   Lammummaan dubartii qabamtee hin baramne

10. 20 Bitooteessa 2026Mootummaan UK 'waraana kanatti kallattiin hin seennu' jedhe

    

    Madda suuraa, Reuters

    Ministarri hajaa alaa Iraan UK'n Ameerikaadhaaf buufata waraanaa akka fayyadamtu eeyyamnaan ''weerara irratti hamma hirmaachutti lakkaa'ama'' jechuun booda waajirri minisitira mummee UK Downing Steert 'waraana hammaataatti hin seennu,' jedhe.

    Kanaan dura ministeerri hajaa alaa Iraan, Ministar Abbaas Araagaachiin gita isaa UK Eveet Kuupar waliin marii'achuu himee ture. Deeggarsi Ameerikaaf taasifamu kamiyyuu ''haala jiru hammeessuu' akka tahe itti himeera.

    Dubbii himaan ministara mummee UK, ''ejjennoon keenya ifaa dha. Haleellaa jalqabaa irratti hin hirmaanne, waraana hammaatee jiruttis hin hirmaannu,'' jedhe.

    ''Buufata waraanaa keenya Ameerikaan haleellaa ittisuufi haleellaa jabaa Iraaniif deebii kennuuf haala murtaa'aa taheen akka fayyadamtu ni eeyyamna.

    Kuni yaaddoo hatattamaa dhabamsiisuufi karaa dippiloomaasii deebisuuf mala sirrii akka tahe amanna,'' jedhe.

11. 20 Bitooteessa 2026Morkiin waancaa Karabawoo 'fokkisaa fi kan hin hawwanne ta'a'

    

    Madda suuraa, BBC Sport

    Morkiin Piriimiyeer Liigii torbee 31 Jimaata kana, Sambataa fi Dilbata kana itti fufee gaggeeffamu morkattoota waancaa liigichaa hin hirmaachisu.

    Arsenaaliifi Siitiin Dilbata kana morkii liigichaa dhiisanii waancaa Karabaawoof falmatu. Xiinxalaan kubbaa miilaa BBC Kiriis Saatan taphni kun haala kamiinuu morkii waancaa liigichaarratti dhiibba ani uuma jedhee akka hin amanne ibseera.

    Amma dura yaadni bal'innaan qoodamaa ture gareen lamaan keessaa waancaa Karabaawoo injifate liigichas injifachuuf hamilee ni qabaata jedhu adeemaa ture. Amma garuu Webileetti wanti barbaadeyyuu yoo ta'e, Siitiin morkii liigichaan Arsenaaliin hin qaqqabu jedha Saatan.

    Siitiin morkii Shaamiyoonsi Liigii keessaa bahus Etihaaditti Maadriidiin qoree ture jedheera. Carraa hedduu uumuuf yaalaniirus jedha.

    Morkiin waancaa Karabaawoo kan Piriimiyeer Liigiiin adda ta'a. Ammoo tapha nuffisiisaa fi fokkisaa ta'a, gareen lamaanuu eeggannoon taphachuu filatu ta'a jedha.

    Tilmaamni Saatan morkiin daqiiqaa 90 garee lamaanii goolii malee xumuramee, rukuttaa peenaalitiin wayita gargara bahan Siitiin ni injifata jedha.

12. 20 Bitooteessa 2026Haleellaan misaayelaa Iraan Yeruusaalem irratti rawwattu dabalaa jira

    

    Madda suuraa, WANA via Reuters

    Haleellaan misaayelaa Iraan Yeruusaalem irratti rawwattu hanga tahe dabalaa jira- eda galagala sa'atii tokko gidduutti haleellaa rawwataa turte, har'a ganama lama, namni miidhamuun garuu hin himamne.

    Haleellaan dabalataa biraa ammoo kibbaafi kaaba Israa'elitti qiyyaafatee ture.

    Israa'el gama isheetiin kaleessa galgala ''bu'uuralee'' mootummaa Iraan jettu haleelteetti.

    Waraanni Israa'el Iraan ammallee laawuncharoota misaayelaa 150 fi misaayelota dhibba baayyeen lakkaa'aman qabdi.

    Miidiyaan Israa'el Kan News akka gabaasetti erga waraanni jalqabee Iraan misaayelota 900 kan dhukaaste yoo tahu isaan keessaa 350 kan Israa'el irratti qiyyaafatamani dha, kaan biyyoota Galoo Galaanaa irratti qiyyafataman.

    Viidiyoon madda oduu Iraan WANA jedhamuun gadhiifame akka agarsiisutti misaayeloonni Iraan iddoo adda hin baafamnerraa dhukaafamaa jiru.

    Israa'el Iraan misaayela oomishuu akka dhaabdu godheera jettullee dubbii himaan IRGC yeroo waraanaatti warshaan misaayelaa yaaddoo akka malee oomishuufi kuusuu cinatti dhiisee sadarkaa olaanaa oomisharra jira.

13. 20 Bitooteessa 2026Daawwadhaa! Battala gaazexeessaan misaa'ela jalaa oole

    Gaazexeessaan osoo kallattiin tamsaasu misaa'ela jalaa akkamiin akka oolee agartanii?

    Daawwadhaa!

14. 20 Bitooteessa 2026Iraan buufata ishee Ameerikaaf akka hin heeyyamne UK akeekkachiifte

    

    Madda suuraa, AFP via Getty Images

    Iraan UK'n buufata waraanaa ishee US'f heyyamuun "weerara keessatti hirmaachuu,"dha jechuun akeekkachiifte.

    Ministirri Dhimma Alaa Iraan Abbaas Araagchii gita isaanii UK Yvette Cooper, waliin bilbilaan wayita haasawanitti tumsi UK'dhaan godhamu kamuu "haalicha hammeessaa" deema jedhan.

    Araagchiin UK fi biyyoota Gamtaa Awurooppaa kaan "weerara badaa" US fi Israa'eliin raawwatamu irratti "ilaalcha loogii" qabdu jedheen.

    UK haleellaa Israa'el buufata boba'aa Iraan Saawuz Pars irratti raawwatte balaaleffachuu dhabuushees qeeqe.

    Mootummaan UK dhimma kanarratti waa hin jenne. BBC'n hordofaa jira.

15. 20 Bitooteessa 2026Iraanonni waraana jalatti bara haarawaa Pershiyaa kabajachaa jiru

    

    Madda suuraa, EPA

    Jala-bultii waggaa haaraa Pershiyaanotaa, festivaala Noowruuz jedhamuuf, lammiileen Iraan gammachuu fi hawwii guddaan qophaawu ture.

    "Akka malee ko'oommannee qophoofna ture... mana qulqulleessina, uffata haaraa bibbitanna, karameellaa fi biskutii fa'i bitannee eegna ture" jetti harmeen waggaa 50 takka.

    Garuu, kan baranaa adda ta'e jetti, boo'ichaan dubbatti.

    "Barri kuni moo? Guyyaan hundi dheeraa dha. Toorri jireenya koo na harkaa badeera" jetti Miinaan

    Nowruuz, jechuun "guyyaa haaraa" yoo ta'u akka aadaa Pershiyaanotaatti barii Birraa labsa. Lammata dhalachuu uumaa, jalqabbii bara haarawaa ti Iraanii fi biyyoota kaan keessatti. Festivaalli kun waggoota 3000 eegale. Festivaala umrii dheeraa addunyaa keenyaati.

    Barana Bitootessa 20 (har'a) irra oola. Ayyaanni kun barana yeroo jalqabaatiif Iraanotaan waraana jalatti kabajama. Iraan Guraandhala 28 kaasee waraana keessa jirti.

    Gareen mirga namoomaa US maandheffate Human Rights Activists in Iran hanaga ammaa namoonni 3,114 ajjeefamuu gabaase. kanneen keessaa 1354 kan ta'an namoota nagaa ti. Kanneen 207 ta'an immoo daa'immani. Namoonni hojii dhabaa jiru, dhaabbilee fi misoomawwan bu'uuraa diigamaa jiru.

    "Akkaataa kanaan Iraan waan irraa haftu hin fakkaatu. Ayyaanni kun Noowruuz isa dhumaa akka ta'u hin fedhu."

    Iraanotaaf, Noowruuz seenaa, eenyummaa biyyaalessaa, fi aadaa bakka bu'a. Pershiyaanonni : Parsoonni, Kurdoonni, Armanoonni, Azerbaayijaanonni, Taajikoonni, Kaazakhsoonni, Uzbeekonni fi kuun ni kabaju..

16. 20 Bitooteessa 2026Israa'el Sooriyaa keessatti haleellaa raawwachuu ibsite

    IDF kaleessa galgala Sooriyaa keessatti haleellaa raawwachuu ibse.

    Iddoowwan qiyyeefannaa Kibba Sooriyaa irratti haleellaa raawwadheera jedhe.

    Haleellaan kun deebii haleellaa uummata Diruuz naannoo As-Suwaayidaa jiru irratti raawwateeti jedhe.

    As-Suwayidaan magaalaa Kibba Sooriyaa keessatti argamtudha.

    IDF miidhaa uummata Diruuz irra gahuuf obsa hin qabu. Isaaniin haleellaa irraa ittisuuf oppireeshinii isaa akka itti fufu ibseera.

    Haleellaan raawatan gidduugala ajajaa fi kuusaa meeshaalee waraanaa mootummaa Sooriyaa irrati akka tahe ibseera.

17. 20 Bitooteessa 2026Qondaalli IRGC haleellaa Israa'eliin ajjeefamuu ibsame

    

    Madda suuraa, FARS

    Haleellaa Iraan keessatti gaggeeffameen qondaalli olaanaan IRGC ajjeefamuu ibsame.

    Dubbii himaan Eegdota Warraaqsa Islaamaa Iraan haleellaa Ameerikaa fi Israa'eliin ajjeefamuu miidiyaaleen gabaasaniiru.

    Alii Mohaammad Naayinii Eegdota Warraaqsa Islaamaa Iraan keessa gara waggoota afurii tajaajileera. Dubbii himaa warraaqsichaa tahuun waggaa lama kan tahu tajaajieera.

    Israa'elii fi Ameerikaan erga waraana kana Iraan irratti bananii gaggeesitoota Iraan olaanoo hedduu ajjeesaniiru.

18. 20 Bitooteessa 2026Dawwadhaa! Wiirtuu gaazii Iraan haleellaa booda yeroo gubatu

    Kuusaan gaazii Iraan haleellaa qilleensaa irratti raawwateen yeroo boba'u.

    Eegasii Iraan wiirtuu boba'aa Qaataar irratti haleellaa raawwatteetti.

19. 20 Bitooteessa 2026Biyyoonni Galoo Galaanaa haleellaa Iraaniif deebii kennaa jiru

    Biyyoonni Galoo Galaanaa: UAE, Kuweet, Sawud Arabiyaa fi Bahaareen sa'aa darban keessa diroonii ykn misaa'ela Iraaniin haleelamuu ibsaniiru.

    Ministirri Ittisaa UAE, amma haleellaa Iraan irraa nutti dhufaa jiruuf deebii kennaa jirra jedhan.

    Jiraattonni yeroo ittisni qilleensarraa biyyichaa misaa'ela rukutee buusu akka dhagahan himan.

    Kuweet: Yeroo misaa'ela Iraan qilleensa irratti qolatan sagalee dhohinsaa jiraattonni akka dhahan himuun gorsa of eeggannoo mootummaan kennu akka hordofan dhaaman.

    Ministirri Ittisaa Sawud Arabiyaa baha biyyattii keessatti diroonii hedduu mancaasuun misaa'eloota ammoo ofirraa qolachuu himan.

    Bahaareen keessatti sagaleen akeekkachiiftuu yeroo bilbilu uumanni bakka dahannaa isaatti akka baqatu dhaaman.

    Bahaareen kun bu'aa ''weerara Iraan'' jettee haleellaa misaa'elaa irratti gaggeeffamee qolatan naannoo man-kuusaatti abidda kaasuu himte.

20. 20 Bitooteessa 2026Daawwadhaa: Sa'ud Arabiyaatti dhohinsa dhaabbata boba'aa biratti uumame