Haleellaa misaa'elaa Raashiyaan hedduun ''ajjeefamuu fi madaa'uu'' Zeleniskiin hime

Haguuggii Tamsaasa Kallattii

1. 7 Ebla 2025Zimbabween qaraxa oomishaalee Ameerikaarra kaa'ame kaasuudhaaf

   Pirezidantiin Zimbabwee Emarsan Mnaangaagwaa bulchiinsa Tiraamp waliin ''walitti dhufeenya gaarii qabaachuuf'' jecha oomishaalee Ameerikaarraa galan irraa qaraxa akka kaasan beeksiisan.

   Pirezidantiin Ameerikaa Doonaald Tiraamp ammoo oomishaalee Zimbaabwe irraa gara Ameerikaa seenan irratti erga qaraxa %18 kaa'aniin booda ture murteen kun kan dhufe.

   ''Tarkaanfiin kun oomishaalee Ameerikaa irraa gara Zimbaabwe seenan gabaa biyyattii keessatti babal'isuufi akkasumas deebiisaatiif ammoo daldala alaa Zimbabween gara Ameerikaatti taasiftuu guddiisuudhaaf'' jechuun ture Minaangawaan toora X isaanii irratti kan barreessan.

   Zimbaabween erga koloneefamuu jalaa baatee booda lafa namoota adiidhaan qabamee ture muraasa ummata gurraacha biyyattiifan adda qooda jechuun imaammata baafte Ameerikaa dabalatee walitti dhufeenya biyyoota lixaa waliin qabdu akka laafu taasisee ture.

   Biyyoonni lamaan wal jijjiraa daldalaa bara 2024 keessaa qabaachaa turanin doolaara miiliyooan 111.6 qofaa akka ture odeeffannoon mootummaa Ameerikaa irraa argame ni agarsiisa.

   Ameerikaan bara kanatti daldala ala ergii doolaara miiliyoona 43.8 gara Zimbaabeetti kan raawwatte yoo ta'u, kunis waggaa kanaan dura ture waliin wal bira yoo qabamu dabala %10.6 agarsiiseera.

   Ta'us oomishin Zimbaabween galchite doolaara miiliyoona 67.8 yoo ta'u, kan waggaa duraa irra %41 gadi bu'eera.

2. 7 Ebla 2025Wantoota ijoo biyya bulchiinsa nam-tokkee Ertiraan adda taasisan muraasa

   Ertiraan biyyoota Afrikaa yeroo dhiyoo hundaa'an keessaa tokko. Itoophiyaarraa adda baatee erga walabummaa labsattee ganna 30 ta'eera. Gaanfa Afrikaarraa biyyoota sadi: Itoophiyaa, Jibuutii fi Sudaaniin wal-daangessiti.

   Keessumaa qarqara Galaanaa Diimatti argamuusheetiin biyya bakka akkaan tarsiimawaa ta'eerratti argamtuudha.

   Addunyaarratti biyyoota bulchiinsa nam-tokkee (totalitarian) ta'an muraasa keessa tokko Ertiraadha.

   Ofii Ertiraa keessatti bulchiinsi mootummaa nam-tokkee maal fakkaata? Ertiraan erga hundooftee maal keessa dabarte? Haalli diinagdeefi hawaasummaa, qabiinsi mirga namaafi dimokiraasii ishee maal fakkaata? Kanneen jedhan maddawwan garaa garaa irraa qindeessineerra.

   Odeessaalee dabalataa argachuudhaaf karaa kanaan seenuu dandeessu.

3. 7 Ebla 2025Tamsaasa kallattii eegalleera

   Ashamaa hordoftoonni BBC Afaan Oromoo bakka jiratan maratti.

   Tamsaasa kallattii kan ittiin odeessaalee gagabaaboo addunyaa mara irraa isin biraan geenyu kunoo amma eegalleerra.

   Odeessaalee keenyaa kaan bal'inaan argachuuf ammoo karaa marsariitii keenyaa, ykn gama chaanaalii WhatsAppii keenyaa millachuu hin dagatiinaa.

4. 5 Ebla 2025Evertan doorsisa ajjeechaa taphataa isarratti taasifame balaaleeffate

   Doorsisi ajjeechaa kuni dursaa taphattoota Evartan, Jeemis Taarkowiskiifi maatii isaarratti qiyyaafate.

   Kunis, gaafa Roobii tapha morkataa isaanii Liivarpuul waliin taasifameerratti ittisaan Evartan kuni utubaa Liivarpuul Aleeksiis Maak Aliistar irratti waan badii waan raawwateefi.

   Murteessaan taphichaa kaardii keelloon bira darbaniiru.

   Kilabiin Evartan ibsa baasen eegasii doorsisa ajjeechaa taphataa isaaniifi maatii isaarratti adeemaa jiru akka quba qabuufi balaaleeffatu ibse.

   ''Amalli akkanaa takkaa fudhatama hin qabu, ispoortii keessas ta'e hawaasa keessatti bakka hin qabu,'' jedha ibsi bahe.

   Haati warraa taphatichaa barreeffama Inistaagiraama gubbaa katabdeen waan adeemaa jiru ''baay'uma jibbisiisa'' jette.

   ''Namoonni taphataa kubbaa miilaan ala abbaa warraa, ilma, obboleessa, hiriyyaafi abbaa ijoollee keenya lamaa ta'uu dagatu,'' jechuun qeeqxe.

   Taphi akkuma xumurameen Taarkowiskiin Maak Alistaritti dubbataa ture.

   Akkatti kubbaa jalaa fudhachuuf jala seene sirrii akka hin taaneefi dhiifama isa jechuu innis fudhachuu dubbate.

   ''Itti dubbadheera, dhiifamas jedheera,'' jechuun tapha booda dubbate.

   Leenjisaan Evartan dursaan taphattoota isaanii badii erga raawwatee booda kaardii keelloon bira darbamuun 'carra qabeessa' jedhaniiru.

5. 5 Ebla 2025Puutiin waa'ee dhukaasa dhaabuu 'torbanoota' keessa murteessu - US

   Dippilomaatiin olaanaa US Pirezidantiin Raashiyaa dhuguma hamma jedhan gahu yoo ta'e waliigaltee dhukaasa dhaabuu ''ji'oota osoo hin taane torbanoota keessa murteessu'' jedhanii akka eegan himan.

   Ministirri Dhimma Alaa US Maarkoo Ruubiyoo murteen waraana dhaabuu Pirezidantii Raashiyaan murtaa'a jedhan.

   Ruubiyoon walgahii ministeerota dhimma alaa NATO Biraasals taasifameerratti erga hirmaatan booda kana jedhan.

   Dubbii isaanii dura ministiroonni dhimma alaa Biriteen fi Faransaay yaada wal fakkaataa dhiheessaniiru.

   Dureewwan kunneen Putiinitu dubbii lafarra harkisa jechuun himataniiru.

   Akka aangawoonni Yukireen jedhanitti, haleellaa Raashiyaan Jimaata galgala raawwatteen yoo xiqqaate shan ajjeefamaniiru.

   Haleellaan misaa'ela baalistikii immoo naannawa Kiriyiviitti namoota 12 galaafatuu himan.

   Waraana waggaa sadii ture dhaabsisuuf hanguma Tiraamp sochii eegalaniin Raashiyaafi Yukireen haleellaa walirratti cimsaniiru.

6. 5 Ebla 2025Raashiyaan bakka dhaloota Zeleeniski haleeltee daa'imman dabalatee 18 ajjeefaman

   Haleellaa Raashiyaan magaalaa Kireyiveyi Rih bakka dhaloota pireezidaantii Yuukireen Vooladimir Zeleenisikitti raawwatteen namoota 18 ajjeefamuun hedduun miidhamuu anga'ootni Yukireen mirkaneessaniiru.

   Namoota du'an keessaa sagal daa'imman akka ta'anis himameera. Akka qondaaltonni naannichaa jedhanitti misaa'elli Raashiyaa kun naannoo mana jireenyaa irratti qiyyaafachuun haleele.

   Viidiyoowwan bahan akka agarsiisanitti gamoo caccabee fi namootni daandiirratti kukkufanii yeroo cicciisan mul'isa.

   Garuu ministirri ittisaa Raashiyaa ''haleellaan misaa'elaa ogummaa olaanaa qabu'' walga'ii "ajajootaa fi leenjistoota kutaa waraana dhihaa" mana nyaataa tokkotti gaggeeffame irratti kan xiyyeeffate ta'uufi, namoonni 85 ta'an akka ajjeefamuu hin oollee ibse.

   Haa ta'u malee, ragaa tokkollee hin dhiheessine.

   Waraanni Yukireen deebii kenneen Raashiyaan ''yakka isaa dhofkachuuf jecha odeeffannoo sobaa facaasaa jira'' jedhe.

   Haleellaan kun yeroo Pirezidaantiin Ameerikaa Doonaald Tiraamp dhukaasa dhaabuuf dhiibbaa taasisaa jiranitti kan raawwatame.

   Zeleeniskiin haalli kun Raashiyaan dhukaasa dhaabuu akka hin barbaadne agarsiisa jedhan..

7. 5 Ebla 2025TikTok US keessatti akka itti fufuuf yeroo lammataaf eeyyamni dheerateef

   Appiin viidiyoo gaggabaabaa addunyaa irratti baay'ee jaallatame, TikTok, seera daldala isaa kaampaanii Ameerikaatti akka gurguru ykn US keessatti akka dhorkamuu dirqisiisuf bahe prezidaantiin Ameerikaa Doonaald Tiraampiin yeroof akka dheereffamu taasisan.

   Tiraamp ammas guyyoota 75f yeroo lammataaf akka dheereffamu ajaja dabarsan.

   Tiraamp, "TikTok akka cufamu hin barbaannu," jechuun fuula miidiyaa hawaasaa 'Truth' irratti maxxansan.

   "Dhimma kana goolabuuf TikTok fi Chaayinaan nu waliin hojjechuuf eeyyamamoo akka ta'an hawwii guddaan eegganna" jedhan.

   TikTok yeroo ammaa kan korporeeshiniin Chaayinaa 'ByteDance' jedhamuuti.

   Tiraamp hanga dhaabbatichi murteerra ga'utti jechuun turtiin kana dura baatii Amajjii keessa murteessan sambata kana xumurame.

   Ammas guyyota 75 yeroo lammaffaaf kan dheereffame yoo ta'u, yoo akka wixinee seeraa Kongireesii Ameerikaatti, US keessaa miseensota miliyoona 170 ol qaba kan jedhu marsariitiin hawaasaa kun yoo namni bitu argame malee US keessatti ni cufama jedhame.

8. 5 Ebla 2025Akkam ooltan?

   Tamsaasni kallattii BBC Afaan Oromoo eegaleera.

   Oduuwwan biyya keessaafi alaa jala jalaan isin biraan geenya.

   Chaanaalii WhatsApp akkasumas fuula Facebook keenya hordofaa.

   Lafa nagaa oolaa.

9. 4 Ebla 2025Imbaappeen fi Rudigar adabaman, Viniishiyees bilisa bahe

   Taphattoonni Riyaal Maadiriid afur tapha Atileetikoo Maadiriid injifatan irratti erga badii homaatuu hin raawwanne jedhaman booda tapha deebii Arsenaal irratti hirmaachuufi.

   Taphattoonni sadii garuu adabamaniiru.

   Himannaan erga dhihaate booda Waldaan Kubbaa Miilaa Awurooppaa qorannoo akka eegalu beeksisee ture.

   Kanneen qorachuu eegalamanis Antoonii Rudigar, Kiiliyaan Imbaappee, Vinishiiyas Juuniyar fi Daani Sebaayyos fa'idha.

   Waldaan kuni guyyaa Jimaataa Viinishiyas irratti adabbiin darbe hin jiru jedhe.

   Taphattoonni Riyaal Maadiriid sadii biroo garuu ''qajeelfama naamusaa'' cabsuu ibse.

   Imbaappeen tapha tokko akka hin taphanneefi yuuroo 30,000 akka kaffalu adabame.

   Rudigar immoo tapha tokko akka hin taphanneefi yuuroo 40,000 adabame.

   Utubaan Ispeen Sebaayyos immoo yuuroo 20,000 adabame.

   Arsenaal tapha marsaa duraa hirboo maayii (nuusa xumuraa) Chaampiyeens Liigii dirree ofiirratti Kibxata dhufu taphata.

   Taphni deebii immoo torban lama booda Bernaabootti taphatama.

   Oduuwwan ispoortii biroof:

10. 4 Ebla 2025Keevin De Biruuna Maan Siitii akka gadhiisuuf jedhu mirkaneesse

    Taphataan Maanchistar Siitii Keevin De Biruuna xumura bara dorgommii kana kontiraatni isaa gaafa xumuramu kilabicha akka gadhiisu beeksise.

    Taphataan kuni erga bara 2015 Woolfisbarg irraa Siitii seene as waancaawwan 16 injifateera.

    Kanneen keessaa 16 Waancaa Pirimeer Liigiiti. Tokkommoo Chaampiyeens Liigiidha.

    Waa'ee taphataa kanaa leenjisaan Siitii Gaardiyoolaan yoo dubbatu akkana jedhe:

    ''Utubdoota ijoo biyya kana keessatti taphatan keessaa tokko,'' jechuun jaje.

    Utubaan lammii Beeljiyeem Siitiif taphoota 413 taphatee galchii 106 galcheera.

    ''Kubbaan miilaa gara keessanitti na fide, magaalaa kanattis,'' jechuun Debiruunaan miidiyaa hawaasummaa gubbaa katabe.

    Waa'ee taphataa kanaa kana beektuu?

11. 4 Ebla 2025Chaayinaan dogongortee rom'ite - Tiraamp

    Qaraxi yookiin taarifi Pirezidantiin Ameerikaa Donaald Tiraamp labsan ijoo dubbii akkuma ta'etti fufeera.

    Bulchiinsi Tiraamp Chaayinaarratti qaraxa 54% erga kaa'e booda Chaayinaan oomisha US irratti qaraxa dabalataa 34% akka keessu ibsiteetti.

    Tiraamp miidiyaa hawaasummaa isaanii Truth Social irratti Chaayinaaf deebii kennaniiru.

    ''Chaayinaan karraa sirrii hin taaneen hubatte, ni rom'ite,'' jedhan Tiraamp.

    Ministirri Faayinaansii Chaayinaa taarifi US oomishaalee Chaayinaarratti keesse ''qajeelfama daldalaa idil-addunyaarraa kan maqe'' jedhaniiru.

12. 4 Ebla 2025Imaammati kiyya yoomiyyuu hin jijjiiramu jedhan Tiraamp

    Pirezidantiin US Donaald Tiraamp ejjennoon isaanii waa'ee taarifa irratti ifa godhan hin jijjiiramu jedhan.

    Tiraamp yaada isaanii kana miidiyaa hawaasummaa isaanii Truth Social irratti ifa godhan.

    ''Invastaroota hedduu gara Yunaayitid Isteet dhufanii maallaqa guddaa invastii tolchaniif, imaammati kiyya yoomiyyuu hin jijjiiramu,'' jedhan.

    ''Yeroon kuni yerootti kan duraanii caalaa baay'ee dureessa itti taatanidha,'' jechuun ibsan.

    Tiraamp taarifa haaraa biyyoota addunyaarratti erga labsan booda gabaan addunyaa warraaqaa jira.

13. 4 Ebla 2025Qonnaan bultoonni Ameerikaa qaraxa Tiraampiin 'mufatan'

    Hogganaan waldaa qonnaan bultootaa US qonnaan bultootni qaraxa pirezidant Doonaald Tiraamp kaahaniin ''mufataniiru'' jechuun BBCtti himan.

    'Sababa damee hedduu tuquufi omishaalee hedduu miidhuuf mufanneerra'' jedhan pirezidantiin waldaa Rocky Mountain Farmers Union Chaad Faankee.

    Sababii yeroo baayyee kan jalqaba miidhaman oomishaalee qonnaa ta'ee, qonnaan bultoonni inni bakka bu'u qaraxa haaloo ba'uu biyyoota biroo irraa dhufuun akka isaan yaaddessu dubbata.

    Qonnaan bultoonni "waggoota dursanii karoorfachuu waan qabaniif" qaraxni hundi indaastiricha irratti miidhaa uumuun isaanii hin oolu jechuun dabalanii, kunis, "dsaffiisaan jijjiiruun dhuguma rakkisaadha" jedha.

14. 4 Ebla 2025Dr Hanii Godaanaa: Hawaasa horsiisee bulaa keessaa dhuftee kollejjii fayyaatti qabxii mul'atee hin beekne galmeessite

    Dr Hanii Godaanaa seenaan duubee ishee Boorana Liibanii, hawaasa horsiisee bulaa keessaa jalqaba. Abbaan isheetiis gosuma isaanii keessaayyuu nama carraa barnootaa argatan kan jalqabaati.

    Hawaasa horsiisee bulaa keessaa carraa barachuu argatanii hojjetaa mootummaa erga ta'aniis bakka adda addaatti socho'anii hojjechaa turan.

    Haniin ammoo intala isaanii hangafaati. Hojiif yeroo Diillaa turanitti achitti dhalatte. Eegasii gara Nagellee Booranaatti wayita jijjiiraman ammoo barnootashee hanga kutaa shanii achitti baratte.

    Shamareen seen-duubeen ishee hawaasa horsiisee bulaa keessaa egalu tun, tibbana Koolleejjii Fayyaa Hospitaala Phaawuloos irraa damee barnoota 'Medicine'n eebbifamte.

    Dr Haniin seenaa koolleejjii isheen itti barattee kanaa keessattis qabxii olaanaa ta'e galmeessisuudhaan meedaaliyaa warqee fi badhaasota garagaraa injifatteetti.

    Dabalataan odeessa Dr Hanii Godaanaa kanarratti asiin cuqaasaa.

15. 4 Ebla 2025Amma nu gahe, Chaayinaan meeshaalee Ameerikaa irratti qaraxa %34 dabalataan kaa'uuf jirti

    Chaayinaan amma Ebla gaafa 10 irraa eegalee meeshaalee Ameerikaa irratti qaraxa %34 akka dabaltu har'a ibsiteetti.

    Ministeerri faayinaansii biyyattii, qaraxa Ameerikaan oomisha Chaayinaa irra keesse, kan ''seera daldala idil-addunyaa waliin wal hin simnedha'' jedha.

    Pirezidantiin Ameerikaa Doonaald Traamp Chaayinaa irratti qaraxa %54 kan labsan yoo ta’u, kunis qaraxa kanaan dura hojiirra ture kan dabalatudha.

16. 4 Ebla 2025Embasiin Ameerikaa 'hegeree keessan hin balleessinaa' jechuun waayee US'tti imaluufi achi turuu akeekkachiise

    Embasiin Ameerikaa Finfinnetti argamu imala seeraan alaa gara US seenuuf godhamu ilaalchisee akeekkachiisa ''hegeree keessan hin balleesiinaa'' jedhu baase.

    Ambaasaaddar Erviin Massingaa ibsa akeekkachiisaa baasaniin mootummaan Ameerikaa godaansa seeraan alaa irratti duulaa jiraa jedhaniiru.

    ''Ameerikaa nagaa qabdu, jabduufi badhaatuu gochuuf Pirezidant Tiraamp seerri immigireeshinii US eegamuu mirkaneessuutti jiru'' jedhan Maasiingaan.

    Seeraa ala dachee US seenuufi achi turuuf yaaluun adabbii cimaa qabas jedhan ambaasaaddarichi.

    ''Karaa seeraan alaa US yoo galte, viizaa argachuuf yoo kijibde, hayyama malee hojii yoo hojjetta ta'e, yeroon viizaa kee erga raawwatee achitti yoo argamte adabbii cimaatu jira.''

    Dhimma kanarratti gabaasa guutuu argachuuf asiin seenuu dandeessu.

17. 4 Ebla 2025Walitti dhufeenyi Kaanaadaa-US gonkumaa bakka duriitti hin deebii'u- Ministira dhimma alaa Kaanadaa

    Ministiroonni dhimma alaa Naatoo Jimaataa har’a Biraasilsitti walga’anii dhimma waraana Raashiyaan Yukireen keessatti geggeessitu irratti mari'ataa jiru. Haata'u malee, gariin isaanii qaraxa cimaa Tiraamp kaa’eef deebii kennaa jiru.

    Ministirri Dhimma Alaa UK Deeviid Laamiin, “US keessatti gara ittisaatti deebi'amuusaatti akka gaddan” kan dubbatan yoo ta’u, Ministirri Dhimma Alaa Kaanadaa Méelaaniy Joolii ammoo hariiroon Kaanadaan US waliin qabdu gonkumaa bakka duraaniitti hin deebi'u jedhan.

    Jooliin Kaanadaan bulchiinsa Tiraamp irratti dhiibbaa guddaa gochaa jirti jetti.

    Ministira Dhimma Alaa Ameerikaa Maarkoo Ruubiyoo, kan Biraasils keessa jiran irraa har'a gara waaree booda akka dhagaahamu eeggama.

    Yaadachiisaaf: Kaanadaan tarree qaraxa haaraa torban kana labsame keessa hin turre, haata'u malee Tiraamp meeshaalee Kaanadaa irraa gara US galan irratti qaraxa %25 kaa’aniiru.

    Kanaan duras Kaanadaan kutaa biyyaa ykn bulchiinsa US 51ffaa akka taatu fedhii abaachuu dubbachuunsaanii ni yaadatama.

18. 4 Ebla 2025Taarifni haaraan Tiraamp al-ergii Itoophiyaa ni miidhaa?

    Pirezedaantiin Ameerikaa Doonaald Tiraamp Roobii darbe meeshaalee biyyoota addunyaa adda addaa irraa gara Ameerikaa seenan irratti taarifa haaraa ifoomsaniiru.

    Biyyoota omishaaleesheerra taarifni haaraan kaa'ame keessaa tokko ammoo Itoophiyaadha.

    Tiraamp meeshaaleen Itoophiyaarraa gara Ameerikaa seenan irratti qaraxa haaraa parsatantaa 10 akka ta'u labsaniiru.

    Kun ka'umsa xiqqaa biyyoota addunyaarratti bulchiinsi isaanii kaa'edha. Dhimma kanarratti ammatti gama Itoophiyaan deebiin kenname hin jiru.

    Odeessa kanarratti dabalataan dubbiifachuudhaaf asiin seenuu dandeessu.

19. 4 Ebla 2025Tamsaasa kallattii keenya haaraa eegalleerra.

    Ashamaa hordoftoonni BBC Afaan Oromoo bakka jirtan maratti.

    Tamsaasa kallattii kan ittiin odeessaalee addunyaa gagabaabsinee isin biraan geenyu kunoo amma eegalleerra.

    Odeessaalee kaan argachuudhaaf ammoo marsarii keenya akkasumas Chaanaalii WhatsApp keenya fi fuula Facebook keenya mil'achuu hin dagatiinaa.

    Olmaa gaarii qabaadhaa!