Tarkii fi Sooriyaatti lakkoofsi namoota kirkira lafaan du'anii 11,200 gahe

Kirikira lafaa Tarkii fi Sooriyaatti mudateen lakkoofsi namoota du'anii 11,200 gahe.

Ragaa Sooriyaa keessaa argachuun ulfaataa tahus hanga ammaa namotni 2,662 du'uun mirkanaa'eera. Pirezidaantii Tarkii Resip Teyib Erdohaan bakkeewan kirkira lafaan miidhaman daawwataniiru.

Haa tahu malee, kirikira lafaa gurguddoo lama Wixata darbe Tarkiiitti mudate namoonni kumaatamatti lakkaa’aman du‘uu hordofee, mootummaan qophii gahaa hin taasifne jedhamuun qeeqi itti hammaachaa jira.

Tarkiitti lakkoofsi namoota balaa kanaan du’anii 8,500 darbeera.

Lakkoofsi namoota balaa kanaan du’anii guyyoota ittaanaan keessatti akka dabaluutu eegama.

Pirezedantiin Tarkii, Rechep Taayib Erdohaan, lakkoofsa namoota balaa kanaan du’anii kan ibsan naannoo balaa kanaan hunda caala miidhamte daawwachuun ture.

Haa ta’u malee, deebii bulchiinsi Erdohaan kirkira lafaa hordofee kennee fi qophii taasise irrratti, qeeqi uummataa fi qaamolee siyaasa biyyattii irra ka'u dabalaa dhufeera.

Iddoowwan balaa kanaan miidhaman baayyeen, deebiin Abbaa Taayitaa To’annoo Balaa Atattamaa Tarkii (AFAD) irraa argatan kan barfate ture jechuun komii kaasu.

Kibba Tarkii, magaalaa buufata doonii Iskidirun jedhamtu kan jiraattuu Arzu Dedehogilu, ijoolleen obbolaa ishee lama mana jige jalatti ugguramu Kibxata himteetti.

Maatiin ishee maallaqa isaanitiin maashina lafa qotee ijoollee mana jiige jalatti danqaman baasu qopheessanii akka turan himteetti.

Haa ta’u malee, qondaaltonni mootummaa meesha kana akka fayyadamaniif hin eeyyamne jetti.

‘‘Amma galgalaatti eegne, garuu namni dhufe hin turre,‘‘ jette Adde Dedehogilu.

‘‘Konkolaataa lafa qotu maallaqa keenyaan fidne, garuu qondaaltonni akka itti gargaaramnu hin barbaanne, nu dhoowwan. Ijoollee lama mana jijjige jalaa qabna. Ijoolleen lamaanu kan obbooleetti koodha, Aysehul fi Ilaydaa jedhamu‘‘ jette.

Tajaajilli Lubbu baraarsaa adeemsa wayita achi qaqqabutti Adde Dedehogiluun ‘’erga barfatetti as qaqqaban,’’ jette dubbatte.

Hojjattoonni Lubbu baraarsaa yeroof hojii lubbu baraarsa addaan kutan ta'us maatiin ijoollee kanaa akka isaan hin dhiifne kadhatanii hojiitti akka deebisan himu.

‘’Adaraa keessan bakka kana gadhiiftanii hin deeminaa, tarii ammayyuu lubbuun jiraachuu maluu’’ jettee kadhatte haati ijoolle mana jige jalatti ugguramanii.

Kun haala kanaan otoo jiru, namoonni heddu mootummaa kirkira lafaa mudate kanaaf deebii kennuurratti harkifate jedhanii komataa jiru.

Namoonni kaan ammoo mootummaan ga’umsaa barbaachisuun hin qophoofne jedhu.

‘’Namni itti gaafatamu tokkichi Erdohaani,’’jedhe hogganaan garee mormituu guddicha Tarkii Kamaal Kilisdaroglu.

Pirezedant Erdohaan kutaaalee bulchiinsota Tarkiii 10, kanneen balaa kirkira lafaatiin garmalee miidhamanitti labsii yeroo muddamaa ji’oota sadiif turu labsan.

Labsiin yeroo muddamaa kun Caamsaa 2023 otoo filannoon biyyattii hin gaggeeffamiin dursee kan goolabamu yoo ta’u, maanguddoon ganna 68 Erdohaan wagga 20 boodallee aangorra turuuf yaalu.

Filannoo dhufturratti hogganaan garee mormituu guddicha Tarkii Kamaal Kilisdaroglu, pirezedantii biyyattii ta’uuf kadhimamaa ta’ee dhiyaata jedhamee eegama.

Kilisdarogluun viidiyoo toora intarneetiirratti maxxanseen, Pirezedant Erdohaan karaa kamiyyuu haasofsiisuu akka hin feene eeruun ,kirkira lafaa lafaa hordofeee mootummaan hojii gurra tolfachutti ciche jechuun himate.

Kana malees bara 1999 kirkirri lafaa mudachuun lubbuu namoota 17,000 olii wayita dabarse mootummaan balaa sana hordofuun gibira lammilee biyyattiirratti ramadetti dheekkamsi jiru dabaleera.

Biyyattiin to’annoo balaa fi tajaajila yeroo muddamaaf Doolara biliyoona 3.8 baasuun eerameera.

Hogganaan garee mormituu Tarkii Kilisdarogluun garuu bulchiinsi Erdohaan kirkira lafaa waggoota 20 booda mudateef hin qophoofne,’’ jedhee qeeqe.