Россия: Путин, Донецк ва Луганскни мустақил давлат, деб тан олинг Rossiya Ukraina Dunyo Yangiliklar

Россия Давлат Думаси Путинга тўғридан-тўғри мурожаат қилади. Украинанинг икки бўлгинчи минтақаси мустақиллигини тан олишни сўрайди. Дума бошқарувдаги "Единая Россия" партияси эмас, коммунистларнинг мазмунан анчайин кескин бўлган мурожаати учун овоз берди.

Таҳлил:

Россия ҳали ҳам таҳдидми? - Путин, дунё ва геосиёсат

Алоқадор мавзулар:

Путиннинг партиясидан таклиф

Путиннинг партияси сўнггида Россия Давлат Думасига резолюция лойиҳасини киритган.

Унда Украинанинг икки бўлгинчи минтақаси мустақиллигини тан олиш зарурлиги ҳақида сўз борган.

Бу ҳақда Россия президентига мурожаат йўллаш таклиф қилинганди.

Аммо уларники Россия Давлат Думасига бу хусусда тақдим этилган айни мазмундаги биринчи ҳужжат бўлмаган.

Ўтган ой Коммунистик партия депутатлари ҳам худди шундай ташаббус билан чиқишган.

Айни пайтда "Единая Россия"ники Россия ва Украина инқирози ўзининг қиёмига етиб бораётган бир пайтга тўғри келган.

Расмий Москва Путин музокараларга "тайёр", Ғарб эса, ҳали-ҳануз Россиянинг Украинага босқини муқаррар, деб турган вазиятда ўртага чиққан.

Россия ўзининг ҳарбий машғулотларини қисман якунлаб, Украина чегарасидаги айрим ҳарбийларини ортга қайтараётганини баён қилиб турган бир манзарада бўй кўрсатган.

Россия Давлат Думаси ҳар икки партиядан киритилган резолюция лойиҳаларини бугун, сешанба куни муқобил асосда кўриб чиққан.

Дума раиси бундан аввал ўзининг Telegram каналида, "рейтинг овоз бериш жараёнида улардан қай бири энг яхши натижа кўрсатса, ўшаси қабул қилиниши"ни ёзганди.

Рейтинг овоз бериш ортидан "Справедливая Россия" партияси ўзиники эмас, коммунистларникига овоз бергани учун "Единая Россия"га раҳмат айтган.

Халқ Республикалари

Донецк ва Луганск 2014 йилнинг майида ўзларининг Украинадан мустақилликларини эълон қилишган.

Икковлон ҳам ўзларини Халқ Республикалари, деб аташган.

Аммо уларнинг мустақиллигини шу пайтгача дунёнинг бирор бир давлати расман тан олмаган.

Украина шарқидаги бўлгинчиларни дастаклашда эса, айнан Россия айбланади.

Расмий Киев ва Ғарбнинг баён қилишича, Россия уларни ҳарбий жиҳатдан қўллаб келади.

Аммо Москва айни мазмундаги даъволарни ҳеч қачон эътироф этмаган.

Украина шарқидаги қуролли низолар эса, ҳануз тинмаган.

Орада кечган вақт давомида минглаб инсоннинг умрига зомин бўлган.

Худди шу йили Украинанинг Қрим яримороли Россия томонидан босиб олинган.

Бунинг ортидан референдум йўли билан Россиянинг таркибига киритилган, аннексия қилинган.

"Единая Россия"

Путиннинг "Единая Россия"си Россия Давлат Думасидаги энг катта партия бўлади.

Думадаги жами 450 та ўриннинг 326 таси айни шу партия ҳисобига тўғри келади.

Аммо ҳар икки партиянинг резолюция лойиҳаси мазмунан бир-биридан фарқ қилган.

Коммунистик партияники бу хусусда Путинга зудлик билан мурожаат йўллашга чақирган.

Коммунистларнинг фикрича, Донецк ва Луганскнинг Россия томонидан мустақил, деб тан олиниши "оқилона ва маънавий жиҳатдан асосли" бўлади.

"Уларни ташқи таҳдидлардан ҳимоя қилиш учун замин яратади".

"Единая Россия" эса, бу масалани аввалига Россия Мудофаа, Ташқи ишлар вазирликлари ва бошқа ҳукумат идоралари билан маслаҳатлашиб олишни таклиф қилган.

Ҳар икки резолюция лойиҳасининг ҳам Думада биринчи ўқишдаёқ овозга қўйилиши мумкинлиги айтилганди.

Сўнгги янгиликка расмий Киев ва Ғарбнинг муносабати ҳозирча маълум эмас.

Россия Украинанинг бўлгинчилар назорати остидаги шарқий минтақалари аҳолисига аллақачон ўзининг паспортини беришни бошлаб юборган.

Айрим маълумотларга таянилса, у ердаги етмиш мингдан ошиқ одам Россия фуқаросига айланган.

Украина бунгача ҳар икки шарқий минтақасининг Россия томонидан мустақил давлатлар, деб тан олиниши ўз ҳудудида Кремлнинг таъсири сақланиб қолишига замин яратиши ва келажакда ўзининг НАТОга кириш истаги йўлида ғов бўлиши мумкинлигидан хавотир билдириб келган.

Давлат Думасидаги овоз бериш натижалари қонунан масъулловчи эмас.

Путиннинг матбуот котиби ҳам ушбу масалада анчайин эҳтиёткорлик билдирган.

Дмитрий Песков бу хусусда бир қарорга келинмаганини айтган.

Би-би-си таҳлилчиси Жон Кирби фикрича, Россия шундай қилгудек бўлса, Киев билан қачондир бир муросага келиш умиди буткул чиппакка чиқади.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek