Ўзбекистон: қора бозорда доллар кескин кўтарилди
Хабарларга кўра, 1 феврал куни Тошкент қора бозорларида 1 АҚШ долларининг нархи 4 минг сўмдан ошиб кетган.
Пойтахтнинг "Чорсу" бозоридаги савдогарлардан бирининг Би-би-сига айтишича, бугун доллар 3850-3900 сўмдан сотилмоқда.
Ўтган ҳафта бошида 1 долларнинг қора бозордаги қиймати 3720-3750 эди.
Доллар қийматининг кескин кўтарилишига нималар сабаб бўлгани номаълум.
Айни пайтда Ўзбекистон Марказий Банки иккинчи ҳафта кетма-кет долларнинг расмий курсини қарийб 6 сўмга кўтариб, 2442 сўм 13 тийин қилиб белгилаган.
Доллар нархининг кескин кўтарилиши Россиядаги иқтисодий инқироз ва рус рублининг қадрсизланиши манзарасида юз бермоқда.
Мутахассисларнинг фикрича, Ўзбекистон қора бозорларида асосан, АҚШ доллари билан муомала қилинса-да, Россия билан савдо ҳажмининг катталиги боис рубл қадрсизланишининг салбий оқибатлари сўмга таъсир кўрсатмасдан қолмайди.
Аммо иқтисодчиларга кўра, Россиядаги иқтисодий инқирознинг Ўзбекистонга биринчи таъсири пул ўтказмаларинининг камайишидир.
Россия матбуотининг ёзишича, ўтган йил охирига келиб, Россиядаги ўртача меҳнат муҳожири ватанига юбораётган пул маблағлари тенг ярмига қисқарган.
"Бу эса Ўзбекистон валюта бозорида тақчилликни юзага келтирган ва талаб ошиши билан нарх ҳам ўз-ўзидан кўтарилган", -дейди қозоғистонлик иқтисодчи Сапарбой Жубаев.
Унинг айтишича, Ўзбекистонда долларнинг нархини "бозорнинг ўзи кўтармоқда".
"Россия рубли икки бараварга қадрсизланди. Шунинг учун минтақадаги бошқа миллий валюталарнинг ҳам қадрсизланиши табиий", дейди иқтисодчи.
Унинг сўзларига кўра, ҳозирда қозоқ тангасининг АҚШ долларига нисбатан қийматини қайта кўриб чиқиш масаласи муҳокама қилинмоқда.
"Қозоғистон миллий валютанинг қийматини мустаҳкамлаш мақсадига мамлакат барқарорлик фондидан 10-15 миллиард доллар сарфлашни режалаган", дейди иқтисодчи.
Унинг айтишича, Ўзбекистонда бундай жамғарма йўқ ва Марказий Банк валюта бозорига мудохала қилишини кутиш қийин".
Сўнгги ўн йилда Россиядан меҳнат муҳожирлари юборган пул-маблағлар ўзбек сўмини бутунлай барбод бўлишдан асраб қолгани айтилади.
Сапарбой Жубаевга кўра, агар Россиядаги иқтисодий вазият ўнгланмаса, Ўзбекистон қора бозорларида доллар нархи кўтарилишда давом этади.
Би-би-си Ўзбек хизмати билан Whatsapp орқали боғланишни истасангиз телефонимиз: 44 7858 860002
